ഐച്ചി-നഗോയ (ജപ്പാൻ): 2026 ഏഷ്യൻ ഗെയിംസ് കബഡി മത്സരങ്ങളുടെ ഗ്രൂപ്പ് നറുക്കെടുപ്പ് പ്രഖ്യാപിച്ചു. നിലവിലെ ചാമ്പ്യൻമാരായ ഇന്ത്യൻ വനിതാ ടീം ശക്തരായ ഇറാനൊപ്പം ഗ്രൂപ്പ് എയിൽ ഇടംപിടിച്ചതോടെ കിരീടപ്പോരാട്ടത്തിന് തുടക്കത്തിലേ കടുത്ത വെല്ലുവിളി നേരിടേണ്ട സാഹചര്യമാണുള്ളത്. അതേസമയം, പുരുഷ വിഭാഗത്തിൽ ഇന്ത്യയും ഇറാനും വ്യത്യസ്ത ഗ്രൂപ്പുകളിലാണ് ഉൾപ്പെട്ടിരിക്കുന്നത്. (Asian Games 2026 Kabaddi Draw)
പുരുഷ വിഭാഗത്തിൽ ഇന്ത്യ ബംഗ്ലാദേശ്, ദക്ഷിണ കൊറിയ, ചൈനീസ് തായ്പേയ്, ആതിഥേയരായ ജപ്പാൻ എന്നിവർക്കൊപ്പമാണ് ഗ്രൂപ്പ് എയിൽ. നിലവിലെ സ്വർണമെഡൽ ജേതാക്കളായ ഇന്ത്യക്ക് ഗ്രൂപ്പ് ഘട്ടത്തിൽ താരതമ്യേന അനുകൂല മത്സരങ്ങളാണ് ലഭിച്ചിരിക്കുന്നത്. കഴിഞ്ഞ ഏഷ്യൻ ഗെയിംസിലെ വെള്ളിമെഡൽ ജേതാക്കളായ ഇറാൻ നേപ്പാൾ, തായ്ലൻഡ്, പാകിസ്താൻ, മലേഷ്യ എന്നിവർക്കൊപ്പമാണ് ഗ്രൂപ്പ് ബിയിൽ. വനിതാ വിഭാഗത്തിൽ ഇന്ത്യ, ഇറാൻ, ജപ്പാൻ, ബംഗ്ലാദേശ് എന്നിവരാണ് ഗ്രൂപ്പ് എയിൽ. നിലവിലെ സ്വർണമെഡൽ ജേതാക്കളായ ഇന്ത്യയ്ക്ക് ഇറാനാണ് പ്രധാന എതിരാളികൾ. 2018 ഏഷ്യൻ ഗെയിംസിൽ സ്വർണം നേടിയ ഇറാൻ കഴിഞ്ഞ പതിപ്പിൽ വെങ്കല മെഡലാണ് സ്വന്തമാക്കിയത്. അതിനാൽ തന്നെ ഈ ഗ്രൂപ്പിലെ ഇന്ത്യ-ഇറാൻ പോരാട്ടം ടൂർണമെന്റിലെ ശ്രദ്ധേയ മത്സരങ്ങളിലൊന്നാകുമെന്നാണ് വിലയിരുത്തൽ.
2026 ഏഷ്യൻ ഗെയിംസ് സെപ്റ്റംബർ 19 മുതൽ ഒക്ടോബർ 4 വരെ ജപ്പാനിലെ ഐച്ചി-നഗോയ നഗരങ്ങളിലായാണ് നടക്കുന്നത്. കബഡിയിൽ ഇരുവിഭാഗങ്ങളിലും സ്വർണം നിലനിർത്തുകയെന്ന ലക്ഷ്യത്തോടെയാണ് ഇന്ത്യൻ ടീമുകൾ ടൂർണമെന്റിലിറങ്ങുന്നത്.
Summary: The draw for the 2026 Asian Games kabaddi competition has been announced. India’s women’s team has been placed in a tough group alongside Iran, while the men’s team has avoided Iran in the league stage after being drawn into separate groups.
