ടെഹ്റാൻ: പശ്ചിമേഷ്യയിലെ സംഘർഷം കൂടുതൽ വ്യാപിക്കുന്നതിനിടെ യെമനിലെ ഹൂത്തി സായുധസംഘവും ആക്രമണം ശക്തമാക്കി. ബാബ് അൽ മന്ദബ് കടലിടുക്കിലൂടെ സഞ്ചരിച്ചിരുന്ന സൗദി അറേബ്യയുടെ രണ്ട് ചരക്കുകപ്പലുകൾ ഉൾപ്പെടെ കപ്പലുകൾ ആക്രമിച്ചതായി ഹൂത്തികൾ അവകാശപ്പെട്ടു ( Houthi Attack On Saudi Ships). ഇതോടെ ഹോർമുസ് കടലിടുക്കിന് പുറമെ ബാബ് അൽ മന്ദബ് മേഖലയിലും സുരക്ഷാ പ്രതിസന്ധി രൂക്ഷമാകുകയാണ്. ഹൂത്തികളുടെ അവകാശവാദമനുസരിച്ച് ‘ലൈല’, ‘എൻസലിയ’ എന്നീ സൗദി കപ്പലുകളെയാണ് ലക്ഷ്യമിട്ടത്. ആക്രമണത്തിൽ ഒരു കപ്പലിന് കേടുപാടുകൾ സംഭവിച്ചതായി സൗദി അധികൃതർ സ്ഥിരീകരിച്ചിട്ടുണ്ടെങ്കിലും നാശനഷ്ടത്തിന്റെ വിശദാംശങ്ങൾ പുറത്തുവിട്ടിട്ടില്ല. ലോക വ്യാപാരത്തിനും എണ്ണക്കയറ്റുമതിക്കും നിർണായകമായ സമുദ്രപാതകളിലൊന്നായ ബാബ് അൽ മന്ദബിൽ വീണ്ടും ആക്രമണം ഉണ്ടായത് അന്താരാഷ്ട്ര തലത്തിൽ ആശങ്ക ഉയർത്തിയിരിക്കുകയാണ്.
ഹൂത്തികൾക്ക് ഇറാന്റെ പിന്തുണ ലഭിക്കുന്നുവെന്ന ആരോപണം അമേരിക്ക വീണ്ടും ആവർത്തിച്ചു. മേഖലയിൽ സംഘർഷം വ്യാപിപ്പിക്കാൻ ഇറാൻ ഹൂത്തി സംഘത്തെ പ്രേരിപ്പിക്കുകയാണെന്ന് അമേരിക്ക ആരോപിച്ചു. അതേസമയം, ഹൂത്തി ആക്രമണം തുടർന്നാൽ സൗദി അറേബ്യയുടെ സുരക്ഷയ്ക്കായി പാകിസ്ഥാൻ സൈന്യം ഇടപെടാൻ സാധ്യതയുണ്ടെന്ന റിപ്പോർട്ടുകളും പശ്ചിമേഷ്യൻ മാധ്യമങ്ങളിൽ പുറത്തുവന്നിട്ടുണ്ട്. എന്നാൽ ഇക്കാര്യത്തിൽ ഔദ്യോഗിക സ്ഥിരീകരണമൊന്നും ലഭ്യമായിട്ടില്ല.
ഇറാനിൽ തുടർച്ചയായ 12-ാം രാത്രിയും വ്യോമാക്രമണം
ഇതിനിടെ അമേരിക്ക തുടർച്ചയായ പന്ത്രണ്ടാം രാത്രിയും ഇറാനിൽ വ്യോമാക്രമണം നടത്തി. ബുഷെഹർ ആണവനിലയത്തിന് സമീപമുള്ള വൈദ്യുതി സബ്സ്റ്റേഷനും തെക്കൻ ഇറാനിലെ ഇറാഖ് അതിർത്തിയിലുള്ള ശലാംഷേ പ്രദേശവും ആക്രമണത്തിന് വിധേയമായതായി റിപ്പോർട്ടുകളുണ്ട്. ചില മേഖലകളിൽ ശക്തമായ സ്ഫോടനങ്ങൾ ഉണ്ടായതായും പ്രാദേശിക മാധ്യമങ്ങൾ അറിയിച്ചു.
ഹോർമുസ് കടലിടുക്കിലൂടെ സഞ്ചരിക്കുന്ന കപ്പലുകൾക്ക് നേരെ ഇറാൻ ആക്രമണം നടത്തിയാൽ മറുപടിയായി ഇറാന്റെ പാലങ്ങൾ, വൈദ്യുതിനിലയങ്ങൾ ഉൾപ്പെടെയുള്ള നിർണായക അടിസ്ഥാനസൗകര്യങ്ങൾ ലക്ഷ്യമിടുമെന്ന് അമേരിക്കൻ പ്രസിഡന്റ് ഡോണൾഡ് ട്രംപ് വീണ്ടും മുന്നറിയിപ്പ് നൽകി. അതിന് മറുപടിയായി ഇറാന്റെ വിദേശകാര്യ മന്ത്രി അബ്ബാസ് അരാഗ്ചി, രാജ്യത്തിന്റെ അടിസ്ഥാനസൗകര്യങ്ങൾ ആക്രമിക്കപ്പെട്ടാൽ ശക്തമായ തിരിച്ചടി നൽകുമെന്നും ഇറാന്റെ നയം “കണ്ണിന് കണ്ണ്” എന്നതാണെന്നും വ്യക്തമാക്കി. അതിർത്തി പ്രദേശങ്ങളിലുണ്ടായ ആക്രമണങ്ങളിൽ രണ്ട് പേർ കൊല്ലപ്പെടുകയും 11 പേർക്ക് പരിക്കേൽക്കുകയും ചെയ്തതായി ഇറാൻ അറിയിച്ചു.
ഇറാന്റെ അവകാശവാദമനുസരിച്ച് ഹോർമുസ് കടലിടുക്കിലൂടെ മുന്നറിയിപ്പ് അവഗണിച്ച് കടന്നുപോകാൻ ശ്രമിച്ച മൂന്ന് കപ്പലുകളിൽ ഒന്നിൽ സ്ഫോടനം ഉണ്ടായെന്നും മറ്റ് രണ്ട് കപ്പലുകൾ പിന്നീട് പിൻവാങ്ങിയെന്നും അധികൃതർ അറിയിച്ചു. ഈ അവകാശവാദങ്ങൾ സ്വതന്ത്രമായി സ്ഥിരീകരിക്കപ്പെട്ടിട്ടില്ല. ഹോർമുസ് കടലിടുക്കും ബാബ് അൽ മന്ദബും ഒരേസമയം സംഘർഷ മേഖലയായി മാറുന്നത് ആഗോള ചരക്കുകടത്തിനും എണ്ണവിതരണ ശൃംഖലയ്ക്കും വലിയ വെല്ലുവിളിയാകുമെന്നാണ് അന്താരാഷ്ട്ര സുരക്ഷാ വിദഗ്ധരുടെ വിലയിരുത്തൽ.
Summary: Regional tensions in the Middle East have escalated further after Yemen’s Houthi rebels claimed attacks on Saudi-linked ships in the Bab al-Mandab Strait, while the US continued airstrikes inside Iran. The simultaneous instability in Hormuz and Bab al-Mandab has raised fresh concerns over global shipping and energy security.
