മുംബൈ: നീറ്റ് പരീക്ഷാ ക്രമക്കേടിനെതിരായ പ്രതിഷേധങ്ങൾ രാജ്യവ്യാപകമായി ശക്തമാകുന്നതിനിടെ, മുംബൈയിൽ പൊലീസ് വാനിന് മുന്നിൽ ഒറ്റയ്ക്ക് നിന്ന യുവതിയുടെ വീഡിയോ സമൂഹമാധ്യമങ്ങളിൽ വൈറലായി ( Riya Yadav Mumbai Protest). കനത്ത മഴയിൽ ഹുഡിയും തൊപ്പിയും ധരിച്ച് പ്രതിഷേധക്കാരെ കൊണ്ടുപോകുന്ന പൊലീസ് വാനിന് മുന്നിൽ വഴിമുടക്കി നിന്ന യുവതിയെ പിന്നീട് റിയ യാദവ് എന്ന നടിയും മോഡലും സംരംഭകയുമാണെന്ന് തിരിച്ചറിഞ്ഞു.
ഡൽഹിയിൽ കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ രാജിവെക്കണമെന്നാവശ്യപ്പെട്ട് വിദ്യാർത്ഥികളും വിവിധ സംഘടനകളും നടത്തിയ പ്രതിഷേധത്തിനിടെ പൊലീസ് ലാത്തിച്ചാർജും കണ്ണീർവാതക പ്രയോഗവും നടത്തിയിരുന്നു. ഇതിനെതിരായ പ്രതിഷേധമാണ് പിന്നീട് മുംബൈയിലും വ്യാപിച്ചത്. ദാദറിലെ ശിവാജി പാർക്ക്, ചൈത്യഭൂമി, ചെമ്പൂർ, ശിവസേന ഭവൻ എന്നിവിടങ്ങളിൽ തുടർച്ചയായി വിദ്യാർത്ഥി പ്രതിഷേധങ്ങൾ നടന്നു.
പ്രതിഷേധത്തിനിടെ ചില വിദ്യാർത്ഥികളെ പൊലീസ് കസ്റ്റഡിയിലെടുത്ത് വാഹനത്തിൽ കയറ്റി കൊണ്ടുപോകുകയായിരുന്നു. ഇതിനിടെയാണ് റിയ യാദവ് ഓടിയെത്തി പൊലീസ് വാനിന് മുന്നിൽ നിന്ന് വാഹനം തടഞ്ഞത്. മാറിനിൽക്കാൻ ആവശ്യപ്പെട്ടിട്ടും അവർ പിൻവാങ്ങാൻ തയ്യാറായില്ല. സംഭവസ്ഥലത്തുണ്ടായിരുന്ന പ്രതിഷേധക്കാർ മുദ്രാവാക്യം മുഴക്കി റിയയ്ക്ക് പിന്തുണ പ്രഖ്യാപിക്കുകയും ചെയ്തു. പ്രാദേശിക മാധ്യമ റിപ്പോർട്ടുകൾ പ്രകാരം, പ്രതിഷേധം ശക്തമായതിനെ തുടർന്ന് കസ്റ്റഡിയിലെടുത്തിരുന്ന ചിലരെ പിന്നീട് വിട്ടയച്ചതായും പറയുന്നു. എന്നാൽ ഇത് സംബന്ധിച്ച് ഔദ്യോഗിക സ്ഥിരീകരണം ലഭ്യമായിട്ടില്ല.
हिम्मत मुंबईची…@Dev_Fadnavis आमची मुंबई मोदीं शहांच्या हुकुमशाहीला आता घाबरत नाही!
जय महाराष्ट्र! pic.twitter.com/aM5tHMkKAD— Sanjay Raut (@rautsanjay61) July 22, 2026
സംഭവത്തിന് പിന്നാലെ റിയ യാദവിന്റെ പ്രതികരണവും ശ്രദ്ധനേടി. “ഞാൻ ഒരു വിദ്യാർത്ഥിയല്ല, എന്റെ അച്ഛൻ കർഷകനല്ല, ഞാൻ ദളിതോ ഒബിസിയോ അല്ല. എന്നിരുന്നാലും ഞാൻ ഈ പ്രതിഷേധത്തിൽ പങ്കെടുക്കുന്നു. കാരണം ഇത് വിദ്യാർത്ഥികളുടെയും രാജ്യത്തിന്റെ ഭാവിയുടെയും പ്രശ്നമാണ്,” എന്നാണ് അവർ മാധ്യമങ്ങളോട് പറഞ്ഞത്.
വീഡിയോ വൈറലായതോടെ “ഈ ധീരയായ യുവതി ആരാണ്?” എന്ന ചോദ്യമാണ് സമൂഹമാധ്യമങ്ങളിൽ വ്യാപകമായി ഉയർന്നത്. റിയ യാദവ് ഒരു നടിയും മോഡലും സംരംഭകയുമാണ്. ‘ദിൽബറ’ എന്ന മ്യൂസിക് വീഡിയോയിലൂടെ ശ്രദ്ധ നേടിയ അവർ, കൈകൊണ്ട് നിർമിക്കുന്ന വസ്ത്രങ്ങളുടെ ‘റിയാസത്’ എന്ന സ്വന്തം ഫാഷൻ ബ്രാൻഡും നടത്തുന്നു. ഇൻസ്റ്റഗ്രാമിൽ ലക്ഷത്തോളം ആളുകൾ അവരെ പിന്തുടരുന്നുണ്ട്.
സംഭവത്തെ തുടർന്ന് നിരവധി പ്രമുഖരും റിയയെ അഭിനന്ദിച്ച് രംഗത്തെത്തി. മുംബൈയിലെ യുവജനങ്ങളുടെ പ്രതിഷേധ മനോഭാവത്തിന്റെ പ്രതീകമായാണ് പലരും ഈ സംഭവത്തെ വിശേഷിപ്പിച്ചത്. സോഷ്യൽ മീഡിയയിൽ നിരവധി പേർ റിയയെ “പ്രതിഷേധത്തിന്റെ മുഖം” എന്നും വിശേഷിപ്പിച്ചു.
അതേസമയം, ഡൽഹിയിലെ സംഭവങ്ങളിൽ പ്രതിഷേധിച്ച് മുംബൈയിൽ രാഷ്ട്രീയ പാർട്ടികളും വിദ്യാർത്ഥി സംഘടനകളും സാമൂഹിക പ്രവർത്തകരും പ്രതിഷേധം തുടരുകയാണ്. ജൂലൈ 18 മുതൽ 22 വരെ അനധികൃതമായി പ്രതിഷേധം നടത്തിയതും നിരോധനാജ്ഞ ലംഘിച്ചതുമായി ബന്ധപ്പെട്ട് മുംബൈ പൊലീസ് 13 കേസുകൾ രജിസ്റ്റർ ചെയ്തതായും 400-ലധികം പേർക്കെതിരെ നടപടി സ്വീകരിച്ചതായും റിപ്പോർട്ടുകളുണ്ട്.
Summary: A video of actress and entrepreneur Riya Yadav standing in front of a police van during student protests in Mumbai has gone viral. The incident occurred while police were detaining protesters, making Riya a widely discussed face of the demonstrations on social media.
