കോഴിക്കോട്: കുറ്റ്യാടി ചുരത്തിൽ എട്ടാം വളവിന് സമീപം 160-ലധികം യാത്രക്കാരുമായി സഞ്ചരിച്ച കെഎസ്ആർടിസി പ്രിയദർശിനി ബസിന്റെ ബ്രേക്ക് തകരാറിലായി (Kuttiyadi ghat ksrtc bus accident). ഡ്രൈവറുടെ അവസരോചിതമായ ഇടപെടലും മനോധൈര്യവും മൂലം വലിയൊരു വൻ ദുരന്തം വഴിമാറി. ബുധനാഴ്ച രാവിലെ പത്തരയോടെയാണ് സംഭവം നടന്നത്. തൊട്ടിൽപ്പാലത്തുനിന്ന് മാനന്തവാടിക്ക് പോകുകയായിരുന്ന ബസാണ് അപകടത്തിൽപ്പെട്ടത്.
ചുരത്തിനു താഴെ പൂതംപാറയിൽ മാനന്തവാടി ഡിപ്പോയുടെ മറ്റൊരു ബസ് ബ്രേക്ക്ഡൗണായി കിടന്നതിനെ തുടർന്നാണ് യാത്രക്കാർ ഈ ബസിലേക്ക് കയറിയത്. ബസിൽ ഉൾക്കൊള്ളാവുന്നതിലും അധികം ആളുകൾ കയറിയതോടെ കുറച്ചുപേരോട് ഇറങ്ങാൻ ഡ്രൈവറും കണ്ടക്ടറും അഭ്യർത്ഥിച്ചെങ്കിലും കനത്ത മഴയായിരുന്നതിനാൽ ആരും ഇറങ്ങാൻ തയ്യാറായില്ല. തുടർന്ന് അമിതഭാരവുമായി ചുരം കയറിയ ബസിന്റെ ജോയിന്റും എയർ പൈപ്പും ഒടിയുകയായിരുന്നു.
ബ്രേക്ക് തകരാറിലായി ബസ് നിയന്ത്രണം വിട്ട് പിന്നിലേക്ക് ഉരുണ്ടുനീങ്ങിയതോടെ യാത്രക്കാർക്കിടയിൽ കൂട്ടനിലവിളി ഉയർന്നു. എന്നാൽ ഒട്ടും പരിഭ്രമിക്കാതെ ഡ്രൈവറായ പേരാമ്പ്ര സ്വദേശി എൻ.പി. സുധീർ സമയോചിതമായി ഇടപെട്ട് ബസിന്റെ പിൻഭാഗം വലതുഭാഗത്തെ സംരക്ഷണ ഭിത്തിയിലേക്ക് ഇടിച്ചുനിർത്തുകയായിരുന്നു. ഡ്രൈവറുടെ ഈ ഉറച്ച തീരുമാനം താഴ്ചയിലേക്ക് ബസ് മറിയാതെ യാത്രക്കാരുടെ ജീവൻ രക്ഷിച്ചു. അപകടത്തെ തുടർന്ന് ചുരത്തിൽ ഒരു മണിക്കൂറോളം ഗതാഗതം തടസ്സപ്പെട്ടു.
Story Summary: A major disaster was averted on the Kuttiyadi Ghat road after an overcrowded KSRTC bus carrying over 160 passengers suffered a brake failure. Driver N.P. Sudheer skillfully stopped the reversing bus by crashing its rear into the side wall, saving everyone onboard.
