തിരുവനന്തപുരം: സംസ്ഥാനത്തെ ഹയർ സെക്കൻഡറി പ്ലസ് വൺ പ്രവേശനത്തിനുള്ള സപ്ലിമെന്ററി അലോട്ട്മെന്റിനായുള്ള അപേക്ഷകൾ ഇന്ന് മുതൽ സമർപ്പിക്കാം. മുഖ്യ അലോട്ട്മെന്റുകളിൽ അപേക്ഷിച്ചിട്ടും സീറ്റ് ലഭിക്കാത്തവർക്കും വിവിധ കാരണങ്ങളാൽ ഇതുവരെ അപേക്ഷിക്കാൻ കഴിയാത്തവർക്കും ഈ ഘട്ടത്തിൽ അപേക്ഷ നൽകാം. ഓൺലൈൻ അപേക്ഷാ പ്രക്രിയ ജൂലൈ 15 വൈകിട്ട് 5 മണി വരെ തുടരും.(Plus One Admission Kerala Supplementary Allotment Application Starts Today)
സപ്ലിമെന്ററി അലോട്ട്മെന്റിനായി വിവിധ സ്കൂളുകളിലുള്ള നിലവിലെ ഒഴിവുകളുടെ വിവരങ്ങൾ രാവിലെ പൊതുവിദ്യാഭ്യാസ വകുപ്പിന്റെ ഔദ്യോഗിക അഡ്മിഷൻ വെബ്സൈറ്റായ https://hscap.kerala.gov.in-ൽ പ്രസിദ്ധീകരിക്കും. നിലവിൽ ലഭ്യമായ സ്കൂൾ, കോമ്പിനേഷൻ ഒഴിവുകൾ നോക്കി മാത്രമേ അപേക്ഷകർ പുതിയ ഓപ്ഷനുകൾ സമർപ്പിക്കാവൂ.
ഇതുവരെ അപേക്ഷിക്കാൻ കഴിയാത്തവർ വെബ്സൈറ്റിലെ ‘Create Candidate Login-SWS’ വഴി ലോഗിൻ രൂപീകരിച്ച ശേഷം ‘APPLY ONLINE’ ലിങ്കിലൂടെ അപേക്ഷ സമർപ്പിക്കണം. മുൻപ് അപേക്ഷിച്ചിട്ടും സീറ്റ് കിട്ടാത്തവർ കാൻഡിഡേറ്റ് ലോഗിനിലെ ‘RENEW APPLICATION’ വഴി പുതിയ ഓപ്ഷനുകൾ നൽകി അപേക്ഷ പുതുക്കണം. തെറ്റായ വിവരങ്ങൾ കാരണം അലോട്ട്മെന്റ് റദ്ദാക്കപ്പെട്ടവർക്ക് ‘RENEW APPLICATION’ വഴി തെറ്റുകൾ തിരുത്തി പുതിയ ഓപ്ഷനുകൾ നൽകാം.
നിലവിൽ ഏതെങ്കിലും ക്വാട്ടയിൽ പ്രവേശനം നേടിയവർ, മുഖ്യഘട്ടത്തിൽ അലോട്ട്മെന്റ് ലഭിച്ചിട്ടും ചേരാത്തവർ, പ്രവേശനം റദ്ദാക്കിയവർ, ടി.സി വാങ്ങിയവർ എന്നിവർക്ക് ഈ ഘട്ടത്തിൽ അപേക്ഷിക്കാൻ സാധിക്കില്ല. മെറിറ്റ് ക്വാട്ടയുടെ സപ്ലിമെന്ററി അലോട്ട്മെന്റിനൊപ്പം മോഡൽ റസിഡൻഷ്യൽ സ്കൂളുകളിലേക്കുള്ള സപ്ലിമെന്ററി പ്രവേശനത്തിനായുള്ള അപേക്ഷകളും ഇന്നുമുതൽ സമർപ്പിക്കാവുന്നതാണെന്ന് പൊതുവിദ്യാഭ്യാസ വകുപ്പ് അറിയിച്ചു.
Story Summary
Online applications for the plus one supplementary allotment in Kerala have commenced today and will close on July 15. Candidates who failed to secure admission in the main rounds, new applicants, and those whose admissions were rejected due to data errors can apply through the official HSCAP website based on the vacancy list published today.
