മലപ്പുറം: സംസ്ഥാനത്തിന്റെ വടക്കൻ ജില്ലകളിൽ കാലവർഷം അതിശക്തമായി തുടരുന്ന സാഹചര്യത്തിൽ മലപ്പുറം, കോഴിക്കോട്, വയനാട് ജില്ലകളിലെ വിദ്യാഭ്യാസ സ്ഥാപനങ്ങൾക്ക് ഇന്ന് അവധി പ്രഖ്യാപിച്ചു. കനത്ത മഴയെത്തുടർന്നുണ്ടാകാനിടയുള്ള അപകടങ്ങൾ ഒഴിവാക്കാനാണ് അതത് ജില്ലാ കളക്ടർമാർ അവധി നൽകി ഉത്തരവിട്ടത്.(Heavy Rain Kerala School Holiday Declared For Malappuram Kozhikode And Wayanad Today)
പ്രൊഫഷണൽ കോളേജുകൾ, സ്കൂളുകൾ, അങ്കണവാടികൾ, മദ്രസകൾ, ട്യൂഷൻ സെന്ററുകൾ, സ്പെഷ്യൽ ക്ലാസുകൾ ഉൾപ്പെടെയുള്ള എല്ലാ വിദ്യാഭ്യാസ സ്ഥാപനങ്ങൾക്കും അവധി ബാധകമാണ്. എന്നാൽ മുൻകൂട്ടി നിശ്ചയിച്ച സർവകലാശാലാ പരീക്ഷകൾക്കും പി.എസ്.സി പരീക്ഷകൾക്കും മാറ്റമുണ്ടായിരിക്കില്ല.
വയനാട് ജില്ലയിൽ റസിഡൻഷ്യൽ സ്കൂളുകൾക്കും കോളേജുകൾക്കും അവധി ബാധകമല്ലെന്ന് കളക്ടർ അറിയിച്ചു. കോഴിക്കോട് ജില്ലയിൽ സ്കൂളുകൾക്ക് അവധിയാണെങ്കിലും ഓൺലൈൻ ക്ലാസുകൾ തടസ്സമില്ലാതെ നടത്താമെന്ന് കളക്ടർ വ്യക്തമാക്കിയിട്ടുണ്ട്. മഴ മൂലം നഷ്ടപ്പെടുന്ന പ്രവൃത്തിദിനങ്ങൾ പിന്നീട് നികത്താൻ സ്ഥാപന മേധാവികൾ നടപടി സ്വീകരിക്കണം. വടക്കൻ കേരളത്തിൽ വരും മണിക്കൂറുകളിലും ശക്തമായ കാറ്റിനും മഴയ്ക്കും സാധ്യതയുള്ളതിനാൽ പൊതുജനങ്ങൾ അതീവ ജാഗ്രത പാലിക്കണമെന്ന് അധികൃതർ നിർദേശിച്ചു.
Story Summary
Educational institutions in Malappuram, Kozhikode, and Wayanad districts have been granted a holiday today, July 9, due to heavy rainfall and safety warnings. The holiday applies to professional colleges and tuition centers, while university and PSC exams will proceed as scheduled.
