തിരുവനന്തപുരം : വിഴിഞ്ഞം അന്താരാഷ്ട്ര തുറമുഖ പദ്ധതിയിൽ മെഎം എസ് സി കമ്പനിയുമായുള്ള ഓഹരി കൈമാറ്റത്തിൽ നിലപാട് മയപ്പെടുത്തി അദാനി പോർട്സ്. ഓഹരി കൈമാറ്റത്തിൽ സർക്കാർ അതൃപ്തി രേഖപ്പെടുത്തിയതിന് പിന്നാലെ, അനുമതി തേടിക്കൊണ്ട് അദാനി ഗ്രൂപ്പ് സംസ്ഥാന സർക്കാരിന് പുതിയ അപേക്ഷ നൽകി.(Adani ports seeks Kerala government approval for Vizhinjam MSC share transfer)
സംസ്ഥാന സർക്കാരിന്റെ മുൻകൂർ അനുമതി ലഭിച്ചതിന് ശേഷം മാത്രമേ അന്തിമ കരാറിൽ ഒപ്പിടുകയുള്ളൂ എന്ന് അദാനി പോർട്സ് സിഇഒ വ്യക്തമാക്കി. ഓഹരി കൈമാറ്റവുമായി ബന്ധപ്പെട്ട് സെബിക്ക് (SEBI) നൽകിയ കത്ത് കേവലം ഒരു പ്രാഥമിക ധാരണ മാത്രമാണെന്നും അദ്ദേഹം കൂട്ടിച്ചേർത്തു.
ഓഹരികൾ എംഎസ്സിക്ക് കൈമാറിയാലും വിഴിഞ്ഞം തുറമുഖത്ത് അവർക്ക് കുത്തകാവകാശം ലഭിക്കില്ലെന്ന് അദാനി ഗ്രൂപ്പ് ഉറപ്പുനൽകി. എംഎസ്സിയുമായുള്ള പങ്കാളിത്തം തുറമുഖത്തിന്റെ വികസനത്തിന് കൂടുതൽ വേഗത പകരുമെന്നും കമ്പനി വിലയിരുത്തുന്നു. കേരള സർക്കാരുമായി നല്ലൊരു ബന്ധം തുടരാനാണ് അദാനി ഗ്രൂപ്പ് ആഗ്രഹിക്കുന്നത്. സർക്കാരിന്റെ എല്ലാ വ്യവസ്ഥകളും പൂർണ്ണമായി അംഗീകരിക്കുമെന്നും അവർ അറിയിച്ചു.
സർക്കാരിനെ അറിയിക്കാതെ ഓഹരി കൈമാറ്റത്തിന് നീക്കം നടത്തി എന്ന വിമർശനം ഉയർന്നതും, അതൃപ്തി പ്രകടിപ്പിച്ചതുമാണ് അദാനി ഗ്രൂപ്പിനെ നടപടികൾ തിരുത്താൻ പ്രേരിപ്പിച്ചത്. സർക്കാരിന്റെ അനുമതി ലഭ്യമാകുന്ന മുറയ്ക്ക് മാത്രമേ തുടർനടപടികൾ സ്വീകരിക്കുകയുള്ളൂ എന്ന് കമ്പനി ആവർത്തിച്ചു വ്യക്തമാക്കിയിട്ടുണ്ട്.
Story Summary
Adani Ports has submitted a fresh application to the Kerala government seeking approval for its share transfer deal with MSC at the Vizhinjam Port. This move follows criticism from the state government, with the company assuring that no final agreement will be signed without official clearance and emphasizing that the partnership will not grant MSC monopoly rights.
