കൊച്ചി: വൈദ്യുതി മേഖലയിലെ ഉൽപ്പാദന-വിതരണ തടസ്സങ്ങൾ നീക്കി ജനങ്ങൾക്ക് തടസ്സമില്ലാത്ത വൈദ്യുതി ഉറപ്പാക്കാൻ ജനപ്രതിനിധികളും ഉദ്യോഗസ്ഥരും ഒന്നിച്ച് പ്രവർത്തിക്കണമെന്ന് വൈദ്യുതി വകുപ്പ് മന്ത്രി സണ്ണി ജോസഫ്. എറണാകുളം, ഇടുക്കി ജില്ലകളിലെ വിവിധ വിഷയങ്ങൾ ചർച്ച ചെയ്യാൻ വിളിച്ചുചേർത്ത അവലോകന യോഗത്തിൽ സംസാരിക്കുകയായിരുന്നു അദ്ദേഹം.(Minister Sunny Joseph calls for collective effort to solve electricity sector issues in Kochi)
പകൽ സമയങ്ങളിൽ സ്ട്രീറ്റ് ലൈറ്റുകൾ കത്തുന്നതടക്കമുള്ള വൈദ്യുതി ദുരുപയോഗം തടയാൻ കർശന നടപടി സ്വീകരിക്കണം. കുറ്റക്കാർക്കെതിരെ കാരണം കാണിക്കൽ നോട്ടീസ് നൽകാൻ ഉദ്യോഗസ്ഥർക്ക് മന്ത്രി നിർദേശം നൽകി. ഉപഭോക്താക്കളുടെ പരാതികൾ കേൾക്കാൻ കെഎസ്ഇബി ഓഫീസുകൾ കൂടുതൽ ജാഗ്രത പുലർത്തണം. മഴക്കാലത്ത് മരം വീണും പോസ്റ്റുകൾ ഒടിഞ്ഞും ഉണ്ടാകുന്ന തടസ്സങ്ങൾ അടിയന്തരമായി പരിഹരിക്കണം.
വൈദ്യുതി രംഗത്തെ വികസന പ്രവർത്തനങ്ങൾ ജനങ്ങളെ ബാധിക്കാത്ത രീതിയിൽ മാത്രമേ നടപ്പിലാക്കൂ. നഷ്ടപരിഹാരം നൽകിയും ചർച്ചകളിലൂടെയും മാത്രമേ വികസനവുമായി മുന്നോട്ട് പോകൂ എന്ന് മന്ത്രി വ്യക്തമാക്കി. കണ്ടെയ്നർ ടെർമിനൽ റോഡിലെ സ്ട്രീറ്റ് ലൈറ്റിംഗ് പദ്ധതി അനിശ്ചിതത്വത്തിലാണെന്നും ഇത് വലിയ സുരക്ഷാ ഭീഷണിയാണെന്നും ഹൈബി ഈഡൻ എംപി ചൂണ്ടിക്കാട്ടി. ലൈൻ വലിക്കാൻ എംഎൽഎ ഫണ്ട് ഉപയോഗിക്കുന്നതിലെ നിയമപരമായ തടസ്സം നീക്കണമെന്നും അദ്ദേഹം ആവശ്യപ്പെട്ടു.
വൈദ്യുതി പോസ്റ്റുകളിൽ കേബിളുകൾ വലിക്കുന്നതിൽ തദ്ദേശ സ്ഥാപനങ്ങൾക്ക് നിയന്ത്രണമില്ലാത്തത് വലിയ അപകടങ്ങൾ ക്ഷണിച്ചുവരുത്തുന്നുണ്ടെന്ന് കൊച്ചി മേയർ വി.കെ. മിനിമോൾ വ്യക്തമാക്കി. വീടുകളിൽ സോളാർ പാനലുകൾ സ്ഥാപിച്ച ഉപഭോക്താക്കൾ നേരിടുന്ന ട്രാൻസ്ഫോർമർ ശേഷിക്കുറവ് അടിയന്തരമായി പരിഹരിക്കണമെന്നും ആവശ്യമുയർന്നു. കോതമംഗലം ഭൂതത്താൻകെട്ട് ജലവൈദ്യുത പദ്ധതി, കുട്ടമ്പുഴയിൽ പുതിയ സെക്ഷൻ ഓഫീസ്, മൂവാറ്റുപുഴ ആറ്റിലെ റൂൾകർവ് നിശ്ചയിക്കൽ, സ്റ്റാഫ് ക്ഷാമം പരിഹരിക്കൽ തുടങ്ങിയ വിവിധ വിഷയങ്ങളും യോഗത്തിൽ ചർച്ചയായി.
Story Summary
Electricity Minister Sunny Joseph has urged officials and public representatives to work together to resolve power distribution and production issues in Ernakulam and Idukki districts. During a high-level review meeting, key concerns including the lack of street lighting on major roads, illegal cable laying on electric posts, and infrastructure shortages like transformers were discussed, with a call for urgent administrative action.
