കൊച്ചി: താരസംഘടനയായ ‘അമ്മ’യിൽ തുടരുന്ന ആഭ്യന്തര തർക്കങ്ങൾക്കിടെ നടി അൻസിബ ഹസൻ വീണ്ടും പരാതിയുമായി രംഗത്തെത്തി (Ansiba Hassan). മുൻ അധ്യക്ഷയായ ശ്വേതാ മേനോനും നടി ലക്ഷ്മിപ്രിയക്കുമെതിരെയാണ് അൻസിബ പൊലീസിൽ പരാതി നൽകിയിരിക്കുന്നത്.
തനിക്കെതിരെ ഗൂഢാലോചന നടക്കുകയാണെന്നും വ്യക്തിഹത്യ നടത്താനും സ്ത്രീത്വത്തെ അപമാനിക്കാനുമായി വ്യാജ ആരോപണങ്ങൾ പ്രചരിപ്പിക്കുന്നുവെന്നും പരാതിയിൽ അൻസിബ ആരോപിക്കുന്നു. സമൂഹമാധ്യമങ്ങളിലൂടെ തെറ്റായതും അശ്ലീലത നിറഞ്ഞതുമായ വീഡിയോ ഉള്ളടക്കങ്ങൾ പ്രചരിപ്പിച്ചുവെന്നും, ഇതിനായി തിരുവനന്തപുരം ആസ്ഥാനമായ ഒരു പി.ആർ. ഏജൻസിയുടെ സേവനം ഉപയോഗിച്ചുവെന്നുമാണ് പരാതിയിലെ മറ്റൊരു ആരോപണം.
അതേസമയം, സംഘടനയിലെ പ്രതിസന്ധികൾ പരിഹരിക്കുന്നതിനായി രൂപീകരിച്ച അഡ്ഹോക് കമ്മിറ്റി ആദ്യ യോഗം ഓൺലൈനായി ചേർന്നതായി കൺവീനർ രമേശ് പിഷാരടി അറിയിച്ചു. നിലവിലെ സാഹചര്യങ്ങൾ വിലയിരുത്തുകയും സംഘടനയുടെ മുന്നോട്ടുള്ള പ്രവർത്തനങ്ങൾ സംബന്ധിച്ച് ചർച്ച നടത്തുകയും ചെയ്തതായാണ് വിവരം.
ഇതിനിടെ, ഉയർന്നുവന്ന ആരോപണങ്ങൾക്കിടെ മുൻ അധ്യക്ഷ ശ്വേതാ മേനോൻ വാർത്താസമ്മേളനം നടത്തുമെന്നായിരുന്നു നേരത്തെ അറിയിച്ചിരുന്നത്. എന്നാൽ ആരോഗ്യപ്രശ്നങ്ങളെ തുടർന്ന് അത് മാറ്റിവെച്ചതായി ബന്ധപ്പെട്ട വൃത്തങ്ങൾ അറിയിച്ചു.
സംഘടനയിലെ സാമ്പത്തിക ഇടപാടുകൾ സംബന്ധിച്ചും ചർച്ചകൾ സജീവമാണ്. കഴിഞ്ഞ രണ്ട് ഭരണസമിതികളുടെ കണക്കുകൾ സമഗ്ര ഓഡിറ്റിന് വിധേയമാക്കണമെന്നാണ് ഒരു വിഭാഗത്തിന്റെ പ്രധാന ആവശ്യം. ഈ വിഷയത്തിൽ അഡ്ഹോക് കമ്മിറ്റി സ്വീകരിക്കുന്ന നിലപാട് സംഘടനയിലെ ഭാവി നീക്കങ്ങളിൽ നിർണായകമാകുമെന്നാണ് വിലയിരുത്തൽ.
സ്ത്രീകളുടെ നേതൃത്വത്തിലുള്ള ഭരണസമിതിക്കെതിരെ ബോധപൂർവമായ നീക്കങ്ങളാണ് നടക്കുന്നതെന്ന വാദവും മറുവിഭാഗം ഉയർത്തുന്നുണ്ട്. പരാതികളും പ്രത്യാരോപണങ്ങളും ശക്തമാകുന്നതിനിടെ ‘അമ്മ’യിലെ പ്രതിസന്ധി കൂടുതൽ സങ്കീർണമാകുന്ന സാഹചര്യമാണ് നിലവിലുള്ളത്.
Story Summary: Actress Ansiba has filed a police complaint against Shweta Menon and Lakshmipriya, alleging conspiracy, character assassination, and online harassment. The development comes amid ongoing internal disputes and leadership turmoil within AMMA.
