തിരുവനന്തപുരം: സംസ്ഥാനത്ത് ഷിഗെല്ല രോഗബാധ വീണ്ടും വർധിക്കുന്നതായി ആരോഗ്യവകുപ്പിന്റെ മുന്നറിയിപ്പ് (Shigella Cases Kerala). പുതുതായി എട്ട് പേർക്ക് കൂടി രോഗം സ്ഥിരീകരിച്ചതോടെ ഈ വർഷം രോഗബാധിതരുടെ എണ്ണം 256 ആയി ഉയർന്നു. കോഴിക്കോട് മൂന്ന് പേരിലും വയനാട്ടിൽ രണ്ട് പേരിലും എറണാകുളം, തൃശൂർ, മലപ്പുറം ജില്ലകളിൽ ഓരോരുത്തരിലുമാണ് പുതിയ കേസുകൾ റിപ്പോർട്ട് ചെയ്തത്.
ജൂൺ മാസത്തിൽ മാത്രം 180 പേർക്ക് രോഗം സ്ഥിരീകരിക്കുകയും ആറു മരണങ്ങൾ റിപ്പോർട്ട് ചെയ്യപ്പെടുകയും ചെയ്ത സാഹചര്യത്തിൽ ആരോഗ്യവകുപ്പ് ജാഗ്രതാ നിർദേശം ശക്തമാക്കിയിട്ടുണ്ട്. രോഗം വേഗത്തിൽ പടരാൻ സാധ്യതയുള്ളതിനാൽ പൊതുജനങ്ങൾ ആരോഗ്യ നിർദേശങ്ങൾ കർശനമായി പാലിക്കണമെന്ന് അധികൃതർ അറിയിച്ചു.
ഷിഗെല്ല ബാക്ടീരിയ മൂലമുണ്ടാകുന്ന ‘ഷിഗെല്ലോസിസ്’ എന്ന അണുബാധയാണ് രോഗത്തിന് കാരണം. പ്രധാനമായും മലിനമായ വെള്ളം, ശുചിത്വമില്ലാത്ത ഭക്ഷണം, രോഗബാധിതരുമായി നേരിട്ടുള്ള സമ്പർക്കം എന്നിവ വഴിയാണ് രോഗം പകരുന്നത്. രോഗാണു ശരീരത്തിൽ പ്രവേശിച്ചതിന് ശേഷം സാധാരണയായി ഒന്നോ രണ്ടോ ദിവസങ്ങൾക്കുള്ളിൽ ലക്ഷണങ്ങൾ പ്രകടമാകുമെങ്കിലും ചിലരിൽ ഇത് ഒരാഴ്ച വരെ വൈകാം.
അഞ്ച് വയസ്സിൽ താഴെയുള്ള കുട്ടികൾ, വയോധികർ, പ്രതിരോധശേഷി കുറഞ്ഞവർ തുടങ്ങിയവരാണ് രോഗബാധയ്ക്ക് കൂടുതൽ സാധ്യതയുള്ള വിഭാഗങ്ങൾ. കടുത്ത വയറിളക്കം, പനി, വയറുവേദന, ഛർദ്ദി, മലത്തോടൊപ്പം രക്തമോ ചലമോ കാണുക തുടങ്ങിയവയാണ് പ്രധാന ലക്ഷണങ്ങൾ.
മുട്ട, ഇറച്ചി, മത്സ്യം, പാൽ എന്നിവ ഉപയോഗിക്കുമ്പോൾ പ്രത്യേക ശ്രദ്ധ വേണമെന്ന് ആരോഗ്യ വിദഗ്ധർ നിർദേശിക്കുന്നു. ഭക്ഷണസാധനങ്ങൾ നന്നായി വേവിച്ചശേഷം മാത്രം കഴിക്കണമെന്നും കുടിവെള്ളത്തിന്റെ ശുചിത്വം ഉറപ്പാക്കണമെന്നും നിർദേശമുണ്ട്. വ്യക്തിശുചിത്വവും പരിസരശുചിത്വവും കൃത്യമായി പാലിക്കുന്നത് രോഗപ്രതിരോധത്തിൽ നിർണായകമാണ്.
രോഗലക്ഷണങ്ങൾ അനുഭവപ്പെടുന്നവർ ശരീരത്തിലെ ജലാംശം നിലനിർത്താൻ ഒആർഎസ് ലായനി, ഉപ്പിട്ട കഞ്ഞിവെള്ളം, നാരങ്ങാവെള്ളം തുടങ്ങിയവ ധാരാളമായി കുടിക്കണം. എന്നാൽ സ്വയം ചികിത്സയ്ക്ക് ശ്രമിക്കാതെ എത്രയും വേഗം സമീപത്തെ ആരോഗ്യകേന്ദ്രത്തിൽ എത്തി വൈദ്യസഹായം തേടണമെന്നും ആരോഗ്യവകുപ്പ് നിർദേശിച്ചു.
Story Summary : Eight new Shigella cases have been reported in Kerala, taking the total number of infections this year to 256. Health authorities have urged the public to maintain strict hygiene and seek immediate medical care if symptoms appear.
