ന്യൂഡൽഹി: പശ്ചിമേഷ്യൻ പ്രതിസന്ധി മൂലം രാജ്യത്തിന്റെ സമ്പദ്വ്യവസ്ഥയ്ക്കുണ്ടായ തിരിച്ചടികൾ നേരിടാൻ കേന്ദ്രസർക്കാർ കർശന നടപടികളിലേക്ക്. വിവിധ സാമ്പത്തിക പാക്കേജുകൾക്കായി ചെലവായ തുക തിരിച്ചുപിടിക്കുന്നതിനും അധിക വരുമാനം കണ്ടെത്തുന്നതിനുമായി പൊതുമേഖലാ സ്ഥാപനങ്ങളുടെ ഓഹരി വിറ്റഴിക്കാനും ഭൂമിയും മറ്റ് ആസ്തികളും പണമാക്കി മാറ്റാനുമാണ് സർക്കാരിന്റെ തീരുമാനം. ഇതിന്റെ ഭാഗമായി ബന്ധപ്പെട്ട വകുപ്പുകൾ യോഗങ്ങൾ ആരംഭിച്ചു കഴിഞ്ഞു.(Central government plans asset monetization and disinvestment to tackle economic crisis)
2027 സാമ്പത്തിക വർഷത്തിൽ ഓഹരി വിറ്റഴിക്കലിലൂടെ 80,000 കോടി രൂപ സമാഹരിക്കാനാണ് ബജറ്റിലൂടെ ലക്ഷ്യമിടുന്നത്. മുമ്പ് നിർത്തിവെച്ചിരുന്ന ഐഡിബിഐ ബാങ്കിന്റെ ഓഹരി വിൽപന പുനരാരംഭിക്കാൻ സർക്കാർ ആലോചിക്കുന്നുണ്ട്. 2026 മുതൽ 2030 വരെയുള്ള അഞ്ചു വർഷ കാലയളവിൽ ആസ്തികൾ വിറ്റഴിച്ച് 10 ലക്ഷം കോടി രൂപ കണ്ടെത്താനാണ് ലക്ഷ്യം. നാഷണൽ ലാൻഡ് മോണിറ്റൈസേഷൻ കോർപ്പറേഷൻ വഴി ഉപയോഗശൂന്യമായ സർക്കാർ ഭൂമിയും മറ്റ് ആസ്തികളും വേഗത്തിൽ പണമാക്കി മാറ്റും.
രാജ്യത്തിന്റെ സാമ്പത്തിക സ്ഥിരത ഉറപ്പാക്കാനായി സർക്കാർ അടുത്തിടെ ചില അടിയന്തര പദ്ധതികൾ പ്രഖ്യാപിച്ചിരുന്നു. അടിയന്തര സാഹചര്യങ്ങൾക്കായി 1 ലക്ഷം കോടി രൂപയുടെ ഫണ്ട് രൂപീകരിച്ചു. ഇതിൽ നിന്ന് 10,000 കോടി രൂപ വിമാന ഇന്ധന വില സ്ഥിരപ്പെടുത്തുന്നതിനായി എണ്ണ വിപണന കമ്പനികൾക്ക് നൽകി. എംഎസ്എംഇ (MSME) മേഖലയെയും വ്യോമയാന മേഖലയെയും സഹായിക്കുന്നതിനായി 18,000 കോടി രൂപയാണ് വകയിരുത്തിയത്. എൻഎംപി (NMP) 1.0 പദ്ധതിയിലൂടെ ലക്ഷ്യമിട്ട തുകയുടെ 90 ശതമാനവും നേടാൻ കഴിഞ്ഞുവെന്നത് സർക്കാരിന് വലിയ ആത്മവിശ്വാസം നൽകുന്നുണ്ട്. ഇതേ മാതൃകയിൽ പുതിയ സാമ്പത്തിക വെല്ലുവിളികളെ അതിജീവിക്കാനാണ് കേന്ദ്രത്തിന്റെ ശ്രമം.
Story Summary
To tackle the economic strain caused by the West Asian crisis and fund recent emergency schemes, the Indian government has accelerated plans to monetize assets and divest shares in public sector units. With a target of raising 80,000 crore rupees through disinvestment in fiscal year 2027 and 10 lakh crore rupees under the National Monetization Pipeline 2.0, the government aims to ensure fiscal stability.
