തിരുവനന്തപുരം: വെമ്പായത്ത് പ്രവർത്തിക്കുന്ന പ്രമുഖ വിനോദകേന്ദ്രമായ ഹാപ്പിലാൻഡ് അമ്യൂസ്മെന്റ് പാർക്കിൽ യന്ത്ര ഊഞ്ഞാൽ (ഹൈ-റൈഡ്) പൊട്ടി വീണ് 12 പേർക്ക് പരിക്കേറ്റ സംഭവത്തിൽ സംസ്ഥാന മനുഷ്യാവകാശ കമ്മീഷൻ സ്വമേധയാ കേസെടുത്തു (Happyland amusement park accident). മാധ്യമ വാർത്തകളുടെ അടിസ്ഥാനത്തിൽ വിഷയത്തിൽ അടിയന്തിരമായി ഇടപെട്ട കമ്മീഷൻ ചെയർപേഴ്സൺ ജസ്റ്റിസ് അലക്സാണ്ടർ തോമസ്, അപകടത്തെക്കുറിച്ച് സമഗ്രമായ അന്വേഷണം നടത്താൻ നിർദേശം നൽകി. റവന്യൂ ഡിവിഷണൽ ഓഫീസർ (ആർ.ഡി.ഒ) തലത്തിൽ വിശദമായ അന്വേഷണം നടത്തി റിപ്പോർട്ട് സമർപ്പിക്കാൻ തിരുവനന്തപുരം ജില്ലാ കളക്ടർക്കാണ് കമ്മീഷൻ നിർദ്ദേശം നൽകിയിരിക്കുന്നത്.
അപകടത്തിന്റെ കൃത്യമായ കാരണം, അമ്യൂസ്മെന്റ് പാർക്കിന്റെ നിലവിലെ പ്രവർത്തന ലൈസൻസ്, അപകടത്തിൽപ്പെട്ട റൈഡിന്റെ ഫിറ്റ്നസ് സർട്ടിഫിക്കറ്റ്, പരിക്കേറ്റവരുടെ നിലവിലെ വിവരങ്ങൾ, ഭാവിയിൽ ഇത്തരം വൻ അപകടങ്ങൾ ഒഴിവാക്കാനായി സ്വീകരിക്കേണ്ട മുൻകരുതൽ നടപടികൾ, പാർക്കിലെ നീന്തൽക്കുളത്തിന്റെ ഉപയോഗക്ഷമത എന്നിവ ആർ.ഡി.ഒ സംഘം നേരിട്ടെത്തി പരിശോധിക്കണം. ഇതിനായി പാർക്ക് മാനേജ്മെന്റ്, മാണിക്കൽ പഞ്ചായത്ത് സെക്രട്ടറി, ബന്ധപ്പെട്ട എസ്.എച്ച്.ഓ എന്നിവർക്ക് കൃത്യമായ നോട്ടീസ് നൽകിയ ശേഷമായിരിക്കും ആർ.ഡി.ഒ സ്ഥലം സന്ദർശിച്ച് പരിശോധന നടത്തുക. ആർ.ഡി.ഒ കണ്ടെത്തുന്ന വിവരങ്ങളുടെ അടിസ്ഥാനത്തിൽ 3 ആഴ്ചയ്ക്കുള്ളിൽ വിശദമായ റിപ്പോർട്ട് സമർപ്പിക്കാൻ ജില്ലാ കളക്ടറോട് കമ്മീഷൻ ആവശ്യപ്പെട്ടിട്ടുണ്ട്.
റൈഡുകൾക്ക് ആവശ്യമായ സുരക്ഷാ-ഫിറ്റ്നസ് സർട്ടിഫിക്കറ്റ് കൃത്യമായി ലഭിച്ച ശേഷമാണോ പഞ്ചായത്ത് അധികൃതർ പാർക്കിന് പ്രവർത്തന ലൈസൻസ് പുതുക്കി നൽകിയതെന്ന് വ്യക്തമാക്കാനും, അപകടത്തിന് ശേഷം സ്വീകരിച്ച അടിയന്തിര നടപടികളെക്കുറിച്ച് മൂന്ന് ആഴ്ചയ്ക്കുള്ളിൽ മറുപടി നൽകാനും മാണിക്കൽ ഗ്രാമപഞ്ചായത്ത് സെക്രട്ടറിയോട് കമ്മീഷൻ ആവശ്യപ്പെട്ടു. ഇതിന് പുറമെ, സംഭവത്തിൽ ഡിവൈ.എസ്.പി തലത്തിൽ പ്രത്യേക അന്വേഷണം നടത്താനും, റിപ്പോർട്ട് സമർപ്പിക്കാനും തിരുവനന്തപുരം റൂറൽ ജില്ലാ പോലീസ് മേധാവിക്ക് കമ്മീഷൻ കർശന നിർദ്ദേശം നൽകിയിട്ടുണ്ട്. തുടർനടപടികൾക്കായി വരും ജൂലൈ 4-ന് നടക്കുന്ന സിറ്റിങ്ങിൽ ജില്ലാ കളക്ടറുടെയും റൂറൽ പോലീസ് മേധാവിയുടെയും പ്രതിനിധികളും, മാണിക്കൽ ഗ്രാമപഞ്ചായത്ത് സെക്രട്ടറിയും കമ്മീഷന് മുന്നിൽ നേരിട്ട് ഹാജരാകണം.
Story Summary: The Kerala State Human Rights Commission has registered a suo motu case into the Happyland amusement park accident in Vembayam, where 12 people were injured after a high-ride collapsed. Commission Chairperson Justice Alexander Thomas directed the District Collector to launch an RDO-level probe and submit a report within 3 weeks.
