തിരുവനന്തപുരം: തലസ്ഥാനത്ത് എൻഫോഴ്സ്മെന്റ് ഡയറക്ടറേറ്റ് (ഇ.ഡി) ഉദ്യോഗസ്ഥരെയും അവരുടെ വാഹനങ്ങളെയും ആക്രമിച്ച കേസിൽ 18 സിപിഎം പ്രവർത്തകരെ കോടതി റിമാൻഡ് ചെയ്തു (ED officials attacked Thiruvananthapuram). കഴിഞ്ഞ ദിവസം ഏഴ് പ്രതികളെ റിമാൻഡ് ചെയ്തതിന് പിന്നാലെ, പാളയം ലോക്കൽ കമ്മിറ്റി സെക്രട്ടറിയും മുൻ കൗൺസിലറുമായ ഐ.പി ബിനു ഉൾപ്പെടെ 11 പ്രതികളെക്കൂടിയാണ് ഇന്ന് കോടതി റിമാൻഡ് ചെയ്ത് ജയിലിലടച്ചത്.
പ്രതികൾ കല്ലുകളും മാരകായുധങ്ങളും ഉപയോഗിച്ച് ഇ.ഡി ഉദ്യോഗസ്ഥരെ വധിക്കാൻ ബോധപൂർവ്വം ശ്രമിച്ചുവെന്നും, അറസ്റ്റിലായ പലർക്കും ക്രിമിനൽ പശ്ചാത്തലമുണ്ടെന്നും പോലീസ് കോടതിയിൽ സമർപ്പിച്ച റിമാൻഡ് റിപ്പോർട്ടിൽ വ്യക്തമാക്കുന്നുണ്ട്. ഇന്ന് റിമാൻഡിലായ പ്രതികളെ വൈദ്യപരിശോധനയ്ക്കായി ജനറൽ ആശുപത്രിയിൽ എത്തിച്ചപ്പോൾ, ആശുപത്രി പരിസരത്ത് തടിച്ചുകൂടിയ സിപിഎം പ്രവർത്തകർ ഇവർക്കായി ശക്തമായ മുദ്രാവാക്യം വിളികൾ മുഴക്കിയത് നേരിയ രീതിയിൽ സംഘർഷാവസ്ഥ സൃഷ്ടിച്ചു.
അതേസമയം, ഇ.ഡി ഉദ്യോഗസ്ഥർക്ക് നേരെ നടന്ന അക്രമത്തിലെ മുഖ്യസൂത്രധാരനും ഒന്നാം പ്രതിയുമായ ദിനകറിനെ ഇന്ന് വട്ടിയൂർക്കാവ് പോലീസ് അറസ്റ്റ് ചെയ്തു. ഇ.ഡി ഉദ്യോഗസ്ഥരുടെ വാഹനം റെയ്ഡ് കഴിഞ്ഞ് പുറത്തേക്ക് ഇറങ്ങിയ സമയത്ത് കൈകൊണ്ടും കമ്പുകൊണ്ടും തല്ലിത്തകർക്കാൻ നേതൃത്വം നൽകിയത് വട്ടിയൂർക്കാവ് കൊടുങ്ങാനൂർ ബ്രാഞ്ച് അംഗമായ ഈ ദിനകറാണെന്ന് പോലീസ് കണ്ടെത്തി. വട്ടിയൂർക്കാവ് പോലീസ് സ്റ്റേഷനിലെ റൗഡി ലിസ്റ്റിൽ ഉൾപ്പെട്ടിട്ടുള്ള സ്ഥിരം കുറ്റവാളിയാണ് ഇയാൾ. കേസിൽ ഉൾപ്പെട്ട ആറ്റുകാൽ മുൻ കൗൺസിലർ ഉണ്ണി, പാളയം സന്തോഷ് എന്നിവരുൾപ്പെടെയുള്ള മറ്റ് പ്രതികളെ പിടികൂടാനായി പോലീസ് തിരച്ചിൽ ഊർജ്ജിതമാക്കിയിട്ടുണ്ട്.
Story Summary: Eighteen CPI(M) workers, including local committee secretary I.P. Binu, have been remanded in custody for attacking ED officials in Thiruvananthapuram. The main accused, Dinakaran, a branch member with a criminal record, was arrested today.
