ന്യൂഡൽഹി: ഇന്ത്യയിൽ ഇക്കൊല്ലത്തെ തെക്ക്-പടിഞ്ഞാറൻ കാലവർഷം പ്രതീക്ഷിച്ചതിലും കുറവായിരിക്കുമെന്ന് ഇന്ത്യൻ കാലാവസ്ഥാ വകുപ്പ്. ദീർഘകാല ശരാശരിയുടെ 90 ശതമാനം മഴ മാത്രമേ ഇത്തവണ ലഭിക്കാനിടയുള്ളൂ എന്നാണ് ഐഎംഡിയുടെ പുതിയ റിപ്പോർട്ട്. ഏപ്രിലിൽ 92 ശതമാനം ലഭിക്കുമെന്നായിരുന്നു കണക്കുകൂട്ടൽ, ഇതിൽ നിന്നാണ് ഇപ്പോൾ കുറവ് വരുത്തിയിരിക്കുന്നത്.(IMD Predicts Below Normal Monsoon 2026 With 90 Percent Rainfall)
എൽ-നിനോ പ്രതിഭാസത്തിന്റെ സ്വാധീനമാണ് കാലവർഷം കുറയാൻ കാരണമാകുന്നതെന്ന് കാലാവസ്ഥാ വിദഗ്ധർ മുന്നറിയിപ്പ് നൽകുന്നു. പസഫിക് സമുദ്രത്തിലെ താപനിലയിലുണ്ടാകുന്ന വർധനവ് മൺസൂൺ കാറ്റിന്റെ ഗതിയെ ബാധിക്കുമെന്നതാണ് ആശങ്കയ്ക്ക് അടിസ്ഥാനം. വടക്കുപടിഞ്ഞാറൻ ഇന്ത്യയിൽ സാധാരണ തോതിലുള്ള മഴ ലഭിക്കും (LPAയുടെ 94-106%). മധ്യ ഇന്ത്യ, തെക്കൻ ഉപദ്വീപ്, വടക്കുകിഴക്കൻ ഇന്ത്യ എന്നിവയിൽ സാധാരണയിൽ താഴെ മഴ ലഭിക്കാൻ ആണ് സാധ്യത.
കൃഷിയെ ആശ്രയിക്കുന്ന മൺസൂൺ കോർ സോൺ മേഖലയിൽ മഴ 94 ശതമാനത്തിൽ താഴെയായിരിക്കും. ഇത് കാർഷിക മേഖലയ്ക്ക് കനത്ത വെല്ലുവിളിയാണ് ഉയർത്തുന്നത്. ജൂൺ മാസത്തിലും രാജ്യത്ത് മഴ കുറവായിരിക്കുമെന്നും, പലയിടത്തും താപനില സാധാരണയേക്കാൾ ഉയർന്നുനിൽക്കുമെന്നും ഐഎംഡി മുന്നറിയിപ്പ് നൽകുന്നു. അതേസമയം, അടുത്തയാഴ്ചയോടെ കേരളത്തിൽ കാലവർഷം എത്താൻ അനുകൂലമായ സാഹചര്യമാണുള്ളതെന്ന് ഐഎംഡി മേധാവി വ്യക്തമാക്കി.
രാജ്യത്തെ വാർഷിക മഴയുടെ 70 ശതമാനവും നൽകുന്നത് കാലവർഷമാണ്. നെല്ല്, പയർവർഗങ്ങൾ, എണ്ണക്കുരുക്കൾ തുടങ്ങിയ ഖാരിഫ് വിളകളുടെ വിതരണത്തെയും വിളവെടുപ്പിനെയും ഈ മഴക്കുറവ് പ്രതികൂലമായി ബാധിച്ചേക്കാം. ജലസേചന സൗകര്യങ്ങളെയും ഗ്രാമീണ സമ്പദ്വ്യവസ്ഥയെയും ഇത് സാരമായി ബാധിക്കുമെന്നതിനാൽ വരും മാസങ്ങളിൽ ഭക്ഷ്യവിലക്കയറ്റത്തിന് സാധ്യതയുണ്ടെന്നും വിദഗ്ധർ ചൂണ്ടിക്കാട്ടുന്നു. എൽ-നിനോയുടെ സാഹചര്യം ഐഎംഡി തുടർന്നും നിരീക്ഷിച്ചുവരികയാണ്.
Story Summary
The India Meteorological Department has downgraded its 2026 monsoon forecast to 90% of the Long Period Average due to the impact of El Nino. While the onset of monsoon over Kerala is expected next week, the projected rainfall deficiency poses significant risks to agriculture and water resources across India’s core farming regions.
