ജനീവ: ആഗോളതാപനവും കാലാവസ്ഥാ വ്യതിയാനവും മൂലം അടുത്ത അഞ്ച് വർഷത്തിനുള്ളിൽ ഭൂമിയിലെ ശരാശരി താപനില ചരിത്രത്തിലെ ഏറ്റവും ഉയർന്ന നിരക്കിലേക്ക് കുതിച്ചുയരുമെന്ന് ഐക്യരാഷ്ട്രസഭയുടെ കാലാവസ്ഥാ ഏജൻസിയും യുകെ മെറ്റ് ഓഫീസും സംയുക്തമായി പുറത്തുവിട്ട വാർഷിക റിപ്പോർട്ടിൽ മുന്നറിയിപ്പ് നൽകുന്നു (Global Temperatures Rise). വ്യാവസായിക വിപ്ലവത്തിന് മുൻപുള്ള കാലഘട്ടത്തെ അപേക്ഷിച്ച് ആഗോള ഉപരിതല താപനില 1.3 ഡിഗ്രി സെൽഷ്യസിനും 1.9 ഡിഗ്രി സെൽഷ്യസിനും ഇടയിൽ വർദ്ധിക്കാൻ സാധ്യതയുണ്ടെന്നാണ് പുതിയ പഠനങ്ങൾ വ്യക്തമാക്കുന്നത്. ആഗോള ശരാശരിയേക്കാൾ മൂന്നര ഇരട്ടിയിലധികം വേഗതയിലായിരിക്കും ആർട്ടിക് മേഖലയിലെ മഞ്ഞുകാല താപനില ഉയരുക. ഇതിന്റെ ഫലമായി ആർട്ടിക് സമുദ്രത്തിലെ മഞ്ഞുപാളികൾ വൻതോതിൽ ഉരുകുമെന്നും ഇത് ലോകത്തിന്റെ വടക്കൻ മേഖലകളിൽ കടുത്ത പ്രകൃതിദുരന്തങ്ങൾക്കും കാലാവസ്ഥാ വ്യതിയാനങ്ങൾക്കും കാരണമാകുമെന്നും ശാസ്ത്രജ്ഞർ ചൂണ്ടിക്കാണിക്കുന്നു.
ആഗോള താപനില വർദ്ധനവ് 1.5 ഡിഗ്രി സെൽഷ്യസിലേക്ക് പരിമിതപ്പെടുത്തുമെന്ന 2015-ലെ പാരീസ് കാലാവസ്ഥാ കരാറിലെ നിർദ്ദേശങ്ങൾ വരും വർഷങ്ങളിൽ താൽക്കാലികമായെങ്കിലും ലംഘിക്കപ്പെടാൻ വലിയ സാധ്യതയുണ്ടെന്ന് യുകെ മെറ്റ് ഓഫീസിലെ ശാസ്ത്രജ്ഞയായ മെലിസ്സ സീബ്രൂക്ക് വ്യക്തമാക്കി. ചരിത്രത്തിലെ ഏറ്റവും ചൂടേറിയ വർഷമായി രേഖപ്പെടുത്തിയ 2024-ലെ റെക്കോർഡ്, 2026-നും 2030-നും ഇടയിലുള്ള ഏതെങ്കിലും ഒരു വർഷം മറികടക്കുമെന്നാണ് പ്രവചനം. പസഫിക് സമുദ്രത്തിലെ ജലനിരപ്പ് ചൂടുപിടിക്കുന്ന പ്രതിഭാസമായ ‘എൽ നിനോ’ ഈ വർഷം അവസാനത്തോടെ ശക്തമാകാൻ സാധ്യതയുള്ളത് താപനില വീണ്ടും ഉയരാൻ ഇടയാക്കും. വരും വർഷങ്ങളിൽ വടക്കൻ യൂറോപ്പ്, അലാസ്ക, സൈബീരിയ തുടങ്ങിയ പ്രദേശങ്ങളിൽ കടുത്ത മഴയ്ക്കും പ്രളയത്തിനും സാധ്യത പ്രവചിക്കുമ്പോൾ, ആമസോൺ വനമേഖലകളിൽ കടുത്ത വരൾച്ചയായിരിക്കും അനുഭവപ്പെടുകയെന്നും റിപ്പോർട്ടിൽ പറയുന്നു.
Summary: A joint report by the UN weather agency and the UK Met Office predicts that global temperatures are set to reach near-record highs over the next five years. Scientists warn that annual temperatures could temporarily exceed the critical 1.5C Paris Agreement threshold at least once between 2026 and 2030, potentially breaking the heat record set in 2024. This rapid warming, compounded by a projected strong El Niño event, is expected to accelerate Arctic ice melt and trigger more severe weather patterns globally.
