കൊച്ചി: സിനിമാ രംഗത്തെ വിവാദങ്ങൾ പുതിയ തലത്തിലേക്ക്. പൊലീസിനും നടി ലക്ഷ്മിപ്രിയക്കുമെതിരെ മുഖ്യമന്ത്രി വിഡി സതീശനും ഡിജിപിക്കും ഔദ്യോഗികമായി പരാതി നൽകി നടി അൻസിബ ഹസൻ (Actress Ansiba complaint Chief Minister Kerala). തൃപ്പൂണിത്തുറ സബ് ഇൻസ്പെക്ടർ (SI) രേഷ്മക്കെതിരെയാണ് അൻസിബ ഗുരുതരമായ ആരോപണങ്ങളോടെ പരാതി നൽകിയിരിക്കുന്നത്. തന്നെ പൊലീസ് സ്റ്റേഷനിൽ നിയമവിരുദ്ധമായി തടഞ്ഞു വച്ചുവെന്നും, തനിക്കെതിരെ ഉയർന്ന വ്യാജ പരാതിക്ക് പിന്നിൽ കൃത്യമായ ഗൂഢാലോചനയുണ്ടെന്നും അൻസിബ പരാതിയിൽ ചൂണ്ടിക്കാണിക്കുന്നു.
അതേസമയം, നടൻ ടിനി ടോമിനെതിരെ അൻസിബ നൽകിയ പരാതിയിൽ നേരിട്ട് ഹാജരാകാൻ താരസംഘടനയായ ‘അമ്മ’ (AMMA) അൻസിബയ്ക്ക് കർശന നിർദ്ദേശം നൽകിയിട്ടുണ്ട്. പരാതിയുമായി ബന്ധപ്പെട്ട് എന്തെങ്കിലും തെളിവുകളുണ്ടെങ്കിൽ അത് എക്സിക്യൂട്ടീവ് കമ്മിറ്റിക്ക് മുന്നിൽ സമർപ്പിക്കാനും ആവശ്യപ്പെട്ടിട്ടുണ്ട്. വരുന്ന ജൂൺ ഒന്നു മുതൽ മൂന്നു വരെയുള്ള ദിവസങ്ങളിൽ ഏതെങ്കിലും ഒരു ദിവസം നേരിട്ടെത്താനാണ് നിർദ്ദേശം.
അതേസമയം , തന്റെ ഭാഗം പൂർണ്ണമായും നിഷ്പക്ഷമായി കേൾക്കണമെന്നാണ് അൻസിബയുടെ പ്രധാന ആവശ്യം. നിലവിലെ എക്സിക്യൂട്ടീവ് കമ്മിറ്റിക്ക് പകരം തന്റെ പരാതി അന്വേഷിക്കാൻ പ്രത്യേക സമിതി രൂപീകരിക്കണമെന്ന് അൻസിബ ‘അമ്മ’യ്ക്ക് മറുപടി നൽകി. രമേശ് പിഷാരടി, മാലാ പാർവ്വതി, ധ്യാൻ ശ്രീനിവാസൻ എന്നിവർ ഉൾപ്പെടുന്ന നിഷ്പക്ഷമായ ഒരു സമിതി വേണമെന്നാണ് അൻസിബയുടെ ആവശ്യം. കൂടാതെ ഹിയറിങ് പൂർണ്ണമായും ഓഡിയോ-വീഡിയോ റെക്കോഡിങ് ആയിരിക്കണമെന്നും അവർ ആവശ്യപ്പെട്ടിട്ടുണ്ട്. ജൂൺ ഒന്നിനോ അല്ലെങ്കിൽ ജൂൺ 7-ന് ശേഷമോ താൻ കമ്മിറ്റിക്ക് മുന്നിൽ ഹാജരാകുമെന്നും അൻസിബ അറിയിച്ചു.
അതിനിടെ, താരസംഘടനയായ ‘അമ്മ’യ്ക്കുള്ളിൽ ഭിന്നതയും ഗ്രൂപ്പ് പോരും രൂക്ഷമായിരിക്കുകയാണ്. ‘അമ്മ’ പ്രസിഡന്റ് ശ്വേതാ മേനോനും ജനറൽ സെക്രട്ടറി കുക്കു പരമേശ്വരനും രണ്ട് തട്ടിലായതോടെ സംഘടനയ്ക്കുള്ളിലെ തർക്കങ്ങൾ കൈവിട്ട അവസ്ഥയിലാണ്.
വിഷയത്തിൽ മറ്റ് അമ്മ പ്രതിനിധികളും പരസ്യ പ്രതികരണങ്ങളുമായി രംഗത്ത് വന്നതോടെ കാര്യങ്ങൾ കൂടുതൽ സങ്കീർണ്ണമാകുമെന്ന് ബോധ്യപ്പെട്ട നേതൃത്വം ഒടുവിൽ നിലപാട് കടുപ്പിച്ചു. സംഘടനയിലെ ആഭ്യന്തര പ്രശ്നങ്ങൾ വഴിമാറിപ്പോകാതിരിക്കാൻ മാധ്യമങ്ങൾക്ക് മുന്നിൽ യാതൊരുവിധ പരസ്യ പ്രതികരണങ്ങളും നടത്തരുതെന്ന് പ്രസിഡന്റും സെക്രട്ടറിയും ചേർന്ന് അംഗങ്ങൾക്ക് കർശന നിർദ്ദേശം നൽകിയിട്ടുണ്ട്. ഈ ആഭ്യന്തര തർക്കങ്ങൾ പുകയുന്നതിനിടയിലാണ് അൻസിബയുടെ പരാതി കേൾക്കാനുള്ള നീക്കങ്ങളുമായി സംഘടന മുന്നോട്ട് പോകുന്നത്.
Story Summary: Actress Ansiba has filed a complaint with the Chief Minister and DGP against the Thrippunithura SI and Lakshmi Priya, alleging illegal detention and conspiracy. Meanwhile, the actors’ association ‘AMMA’ directed Ansiba to appear before the executive committee regarding her complaint against Tini Tom. Ansiba demanded a special committee comprising Ramesh Pisharody, Mala Parvathy, and Dhyan Sreenivasan to hear her case, amidst growing internal rifts between AMMA President Shwetha Menon and Gen Secretary Kuku Parameswaran.
