തിരുവനന്തപുരം: സംസ്ഥാനത്തെ ഗ്രാമപ്രദേശങ്ങളിലെ യാത്രാക്ലേശം പരിഹരിക്കുന്നതിനും പൊതുഗതാഗത സൗകര്യം ശക്തിപ്പെടുത്തുന്നതിനുമായി ‘ഗ്രാമവണ്ടി’ പദ്ധതി കൂടുതൽ വ്യാപകമാക്കാൻ യുഡിഎഫ് സർക്കാരിന്റെ തീരുമാനം (KSRTC Gramavandi project expansion Kerala). ഇതിനൊപ്പം കെഎസ്ആർടിസിയുടെ (KSRTC) സാമ്പത്തിക സ്ഥിതി, ദൈനംദിന പ്രവർത്തനങ്ങൾ, നവീകരണ സാധ്യതകൾ എന്നിവ ശാസ്ത്രീയമായി പഠിക്കുന്നതിനായി വിദഗ്ധരെ ഉൾപ്പെടുത്തി പ്രത്യേക റിസർച്ച് വിംഗ് ആരംഭിക്കാനും തീരുമാനമായിട്ടുണ്ട്. ഗതാഗതമന്ത്രി സി.പി. ജോണിന്റെ അധ്യക്ഷതയിൽ, കെഎസ്ആർടിസി സിഎംഡിയുടെയും മറ്റ് ഉന്നത ഉദ്യോഗസ്ഥരുടെയും സാന്നിധ്യത്തിൽ ചേർന്ന പ്രത്യേക അവലോകന യോഗത്തിലാണ് ഈ നിർണ്ണായക തീരുമാനങ്ങൾ കൈക്കൊണ്ടത്.
വരാനിരിക്കുന്ന ശബരിമല മണ്ഡലകാല സർവീസുകൾ കൂടുതൽ കാര്യക്ഷമവും സുരക്ഷിതവുമാക്കുന്നതിനായി മോട്ടോർ വാഹന വകുപ്പുമായി (MVD) സഹകരിച്ച് മുന്നൊരുക്ക പ്രവർത്തനങ്ങൾ ഉടൻ ആരംഭിക്കും. ഇതിന് പുറമെ, ആധുനിക സാങ്കേതികവിദ്യ പ്രയോജനപ്പെടുത്തി ഹൈഡ്രജൻ ഉൾപ്പെടെയുള്ള ഹരിത ഇന്ധനങ്ങൾ (Green Fuels) ഉപയോഗിച്ചുള്ള പരിസ്ഥിതി സൗഹൃദ പൊതുഗതാഗത സംവിധാനം ഘട്ടംഘട്ടമായി സംസ്ഥാനത്ത് നടപ്പിലാക്കാനും യോഗം തീരുമാനിച്ചു.
ജനകീയവും ആധുനികവുമായ പൊതുഗതാഗത സംവിധാനമായി കെഎസ്ആർടിസിയെ മാറ്റിയെടുക്കുന്നതിനുള്ള സമഗ്ര നടപടികളാണ് സർക്കാർ സ്വീകരിച്ചുവരുന്നതെന്ന് ഗതാഗത മന്ത്രി സി.പി. ജോൺ അറിയിച്ചു. കെഎസ്ആർടിസിയിലെ ആശ്രിത നിയമനത്തിനായി ഗുണഭോക്താക്കൾ നേരിട്ട് സമർപ്പിച്ച നിവേദനങ്ങളുടെ അടിസ്ഥാനത്തിൽ, നിലവിലുള്ള ആശ്രിത നിയമന നടപടികൾ വേഗത്തിലാക്കാൻ മന്ത്രി കർശന നിർദേശം നൽകി. കൂടാതെ, കെഎസ്ആർടിസിയിലെ നിലവിലെ ഒഴിവുകളിലേക്ക് പി.എസ്.സി (PSC) മുഖേന നേരിട്ടുള്ള നിയമന നടപടികൾ അടിയന്തരമായി ആരംഭിക്കുന്നതിനാവശ്യമായ ഫയൽ നീക്കങ്ങൾ നടത്താനും അവലോകന യോഗത്തിൽ തീരുമാനമായിട്ടുണ്ട്.
Story Summary: The Kerala government has decided to expand the ‘Gramavandi’ project to improve rural public transport. In a high-level meeting chaired by Transport Minister C.P. John, decisions were made to set up a KSRTC research wing, initiate green fuel initiatives like hydrogen, and fast-track PSC and compassionate appointments.
