കൊച്ചി: സംസ്ഥാനത്ത് സ്വർണവിലയിൽ വീണ്ടും ഇടിവ് രേഖപ്പെടുത്തി. ഒരു ഗ്രാം സ്വർണത്തിന്റെ വിലയിൽ ഇന്ന് 70 രൂപയുടെ കുറവാണുണ്ടായത് (Gold price drop Kerala today). ഇതോടെ ഗ്രാമിന്റെ വില 14,305 രൂപയായി താഴ്ന്നു. പവന്റെ വിലയിൽ 560 രൂപയുടെ ഇടിവാണ് രേഖപ്പെടുത്തിയത്. 1,14,440 രൂപയാണ് നിലവിൽ ഒരു പവൻ സ്വർണത്തിന്റെ വിപണി വില. പണപ്പെരുപ്പം സംബന്ധിച്ച ആഗോള ആശങ്കകളാണ് സ്വർണവിലയെ പ്രധാനമായും സ്വാധീനിക്കുന്നത്.
ആഗോള വിപണിയിലെ സ്പോട്ട് ഗോൾഡ് വിലയിൽ 1.7 ശതമാനത്തിന്റെ ഇടിവുണ്ടായി. രാജ്യാന്തര വിപണിയിൽ ഔൺസിന് 4,380 ഡോളറായാണ് സ്വർണവില ഇടിഞ്ഞത്. യുഎസ് ഗോൾഡ് ഫ്യൂച്ചർ നിരക്കും 1.6 ശതമാനം ഇടിഞ്ഞ് 4,377.10 ഡോളറിലേക്ക് വീണു. ഇറാനും യുഎസും തമ്മിൽ വീണ്ടും ആക്രമണങ്ങളും പ്രത്യാക്രമണങ്ങളുമായി രംഗത്തെത്തിയതും ഇതിനോടനുബന്ധിച്ചുള്ള യുദ്ധപ്പേടിയും ആഗോള വിപണിയെ ഉറ്റുനോക്കുന്ന നിക്ഷേപകരെ സ്വാധീനിക്കുന്നുണ്ട്.
യുദ്ധസാഹചര്യം വീണ്ടും ശക്തമായാൽ അത് ക്രൂഡ് ഓയിൽ (എണ്ണ) വില കുതിച്ചുയരാൻ ഇടയാക്കുമെന്നാണ് സാമ്പത്തിക വിദഗ്ധരുടെ ആശങ്ക. എണ്ണവില വർദ്ധിക്കുന്നത് വിവിധ രാജ്യങ്ങളിലെ പണപ്പെരുപ്പം വൻതോതിൽ ഉയർത്തും. പണപ്പെരുപ്പം നിയന്ത്രണവിധേയമാക്കാൻ വിവിധ രാജ്യങ്ങളിലെ കേന്ദ്രബാങ്കുകൾ പലിശനിരക്ക് വീണ്ടും വർദ്ധിപ്പിച്ചേക്കുമെന്ന സൂചനകളാണ് സ്വർണവിപണിയിൽ നിലവിലെ വിലയിടിവിന് കാരണമാകുന്നത്.
Story Summary: Gold prices in Kerala witnessed a further decline, with sovereign prices dropping by ₹560 to reach ₹1,14,440 and gram rates falling by ₹70 to ₹14,305. The drop reflects global market trends where spot gold fell 1.7% to $4,380 per ounce due to geopolitical tensions and inflation worries.
