ചെന്നൈ: പ്രധാനമന്ത്രി നരേന്ദ്ര മോദിയുമായി ഡൽഹിയിൽ നടത്തിയ കൂടിക്കാഴ്ചയ്ക്ക് പിന്നാലെ തമിഴ്നാട് മുഖ്യമന്ത്രി സി. ജോസഫ് വിജയ് തനിക്കൊപ്പം ഫോണിൽ ബന്ധപ്പെട്ടതായി കേന്ദ്രമന്ത്രിയും നടനുമായ സുരേഷ് ഗോപി (Suresh Gopi on CM Joseph Vijay). വെറുമൊരു സൗഹൃദസംഭാഷണത്തിനപ്പുറം രാജ്യത്തിന്റെയും ജനങ്ങളുടെയും ഉന്നമനത്തിനായി എങ്ങനെ ഒരുമിച്ച് പ്രവർത്തിക്കാം എന്നതിനെക്കുറിച്ചാണ് തങ്ങൾ പ്രധാനമായും സംസാരിച്ചതെന്ന് അദ്ദേഹം തന്റെ ഫെയ്സ്ബുക്ക് കുറിപ്പിലൂടെ വ്യക്തമാക്കി. വിജയ്ക്കൊപ്പമുള്ള ഒരു ചിത്രം പങ്കുവെച്ചുകൊണ്ടാണ് സുരേഷ് ഗോപി ഈ വിവരങ്ങൾ മാധ്യമങ്ങളുമായി പങ്കുവെച്ചത്. കേരളം, തമിഴ്നാട് സംസ്ഥാനങ്ങളുടെ സമഗ്ര വികസനത്തിനും ഭാരതത്തിന്റെ പുരോഗതിക്കുമായി ഒരേ മനസോടെ കൈകോർത്ത് മുന്നോട്ട് പോകുമെന്ന് ഇരുവരും ഉറപ്പുനൽകിയതായും, തമിഴ്നാട് മുഖ്യമന്ത്രിയുടെ ജനസേവന യാത്രകൾക്ക് ഹൃദയം നിറഞ്ഞ ആശംസകൾ നേരുന്നതായും സുരേഷ് ഗോപി കൂട്ടിച്ചേർത്തു.
ബുധനാഴ്ച ഡൽഹിയിലെ സേവാ തീർഥിലുള്ള പ്രധാനമന്ത്രിയുടെ ഓഫീസിൽ വെച്ചായിരുന്നു തമിഴ്നാട് മുഖ്യമന്ത്രി ജോസഫ് വിജയ്യും നരേന്ദ്ര മോദിയും തമ്മിലുള്ള നിർണ്ണായക കൂടിക്കാഴ്ച നടന്നത്. ഏകദേശം 20 മിനിറ്റോളം നീണ്ടുനിന്ന ചർച്ചയിൽ തമിഴ്നാടിന്റെ വിവിധ ആവശ്യങ്ങളും ആശങ്കകളും വിജയ് പ്രധാനമന്ത്രിയെ ധരിപ്പിച്ചു. മേക്കെദാട്ട് അണക്കെട്ട് വിഷയം, വന്ദേമാതരം വിവാദം, തമിഴ് മത്സ്യത്തൊഴിലാളികൾക്ക് നേരെ ശ്രീലങ്കൻ നാവികസേന നടത്തുന്ന തുടർച്ചയായ ആക്രമണങ്ങൾ എന്നിവ ചർച്ചയിൽ പ്രധാന വിഷയങ്ങളായി വന്നു. തമിഴ്നാട് മുഖ്യമന്ത്രിയായി സ്ഥാനമേറ്റ ശേഷമുള്ള വിജയ്യുടെ ആദ്യ ഡൽഹി യാത്രയായിരുന്നു ഇത്. നൂറ്റാണ്ടുകൾ പഴക്കമുള്ള ചോള കാലഘട്ടത്തിലെ ചെമ്പോലകൾ നെതർലൻഡ്സിൽ നിന്ന് ഇന്ത്യയിലേക്ക് മടക്കിക്കൊണ്ടുവന്നതിന് അദ്ദേഹം പ്രധാനമന്ത്രിക്ക് നേരിട്ട് നന്ദി അറിയിക്കുകയും ചെയ്തു.
Summary: Union Minister Suresh Gopi revealed that Tamil Nadu Chief Minister Joseph Vijay contacted him via phone following Vijay’s official meeting with PM Narendra Modi in Delhi. The duo discussed collaborative efforts for the holistic development of Kerala and Tamil Nadu, promising to work together for national progress. During his 20-minute meeting with the Prime Minister, CM Vijay highlighted key state issues including the Mekedatu dam dispute and frequent attacks on Tamil fishermen.
