ജയ്പുർ: ഇന്ത്യൻ പ്രീമിയർ ലീഗിൽ (IPL 2026) പുതിയ ചരിത്രമെഴുതി രാജസ്ഥാൻ റോയൽസിന്റെ പതിനഞ്ചുകാരൻ കൗമാരതാരം വൈഭവ് സൂര്യവംശി (Vaibhav Sooryavanshi most sixes IPL 2026). ഒരു ഐപിഎൽ സീസണിൽ ഏറ്റവും കൂടുതൽ സിക്സറുകൾ നേടുന്ന ബാറ്ററെന്ന എക്കാലത്തെയും വലിയ റെക്കോർഡാണ് വൈഭവ് സ്വന്തം പേരിൽ കുറിച്ചത്. സൺറൈസേഴ്സ് ഹൈദരാബാദിനെതിരെ നടന്ന ആവേശകരമായ എലിമിനേറ്റർ മത്സരത്തിലാണ് ഈ അപൂർവ്വ നേട്ടം താരം സ്വന്തമാക്കിയത്.
ഹൈദരാബാദിനെതിരായ നിർണ്ണായക മത്സരത്തിന് ഇറങ്ങുന്നതിന് മുൻപ് 53 സിക്സറുകളായിരുന്നു വൈഭവിന്റെ അക്കൗണ്ടിൽ ഉണ്ടായിരുന്നത്. മത്സരത്തിൽ 29 പന്തിൽ 97 റൺസുമായി വെടിക്കെട്ട് ബാറ്റിംഗ് കാഴ്ചവെച്ച വൈഭവ് 12 പടുകൂറ്റൻ സിക്സറുകളാണ് പറത്തിയത്. ഇതോടെ ഈ സീസണിലെ താരത്തിന്റെ ആകെ സിക്സറുകളുടെ എണ്ണം 65 ആയി ഉയർന്നു. ഐപിഎൽ ചരിത്രത്തിൽ മറ്റൊരു താരവും ഒരു സീസണിൽ ഇത്രയധികം സിക്സറുകൾ നേടിയിട്ടില്ല. വെസ്റ്റ് ഇൻഡീസ് ഇതിഹാസം ക്രിസ് ഗെയിലിന്റെ 14 വർഷം പഴക്കമുള്ള റെക്കോർഡാണ് ഈ പതിനഞ്ചുകാരൻ തകർത്തത്.
2012-ൽ റോയൽ ചലഞ്ചേഴ്സ് ബാംഗ്ലൂരിന് വേണ്ടി കളിച്ച ക്രിസ് ഗെയിൽ നേടിയ 59 സിക്സറുകളായിരുന്നു ഇതുവരെയുള്ള റെക്കോർഡ്. ഇതാണ് കൗമാര വിസ്മയം ഇക്കുറി മറികടന്നത്. 2019-ൽ 52 സിക്സറുകൾ നേടിയ മുൻ കൊൽക്കത്ത താരം ആന്ദ്രെ റസ്സലാണ് പട്ടികയിൽ മൂന്നാമതുള്ളത്. നേരത്തെ തന്നെ ഒരു ഐപിഎൽ സീസണിൽ അമ്പതിലധികം സിക്സറുകൾ നേടുന്ന ആദ്യ ഇന്ത്യൻ താരമെന്ന ബഹുമതിയും വൈഭവ് സ്വന്തമാക്കിയിരുന്നു. കൂടാതെ, ഒരു സീസണിൽ 600 റൺസ് തികയ്ക്കുന്ന ഏറ്റവും പ്രായം കുറഞ്ഞ താരമെന്ന റെക്കോർഡും ഇതോടെ വൈഭവിന് സ്വന്തമായി.
Story Summary: Rajasthan Royals’ 15-year-old opener Vaibhav Sooryavanshi scripted history during the IPL 2026 Eliminator against SRH by breaking Chris Gayle’s 14-year-old record for the most sixes in a single IPL season. Smashing 12 sixes in his 97-run knock, he brought his season total to 65 sixes.
