ചേർത്തല: മലിനജലവും മാലിന്യവും നീക്കം ചെയ്യുന്ന വാഹനം വിട്ടുനൽകാൻ ലക്ഷങ്ങൾ കൈക്കൂലി വാങ്ങുന്നതിനിടെ ചേർത്തല ഡിവൈഎസ്പി വിജിലൻസിന്റെ പിടിയിലായി (Cherthala DYSP Anilkumar arrested). ചേർത്തല ഡിവൈഎസ്പി അനിൽകുമാറാണ് അതിനാടകീയമായ രംഗങ്ങൾക്കൊടുവിൽ അറസ്റ്റിലായത്.
മാലിന്യം നീക്കം ചെയ്യുന്ന ചില വാഹനങ്ങൾ കഴിഞ്ഞ ദിവസം ചേർത്തല പൊലീസ് കസ്റ്റഡിയിലെടുത്തിരുന്നു. ഈ വാഹനങ്ങൾ വിട്ടുകിട്ടുന്നതിനായി ഡിവൈഎസ്പി രണ്ട് ലക്ഷം രൂപ കൈക്കൂലി ആവശ്യപ്പെട്ടതായി വാഹന ഉടമ വിജിലൻസിനെ അറിയിക്കുകയായിരുന്നു. തുടർന്ന് വിജിലൻസ് നൽകിയ കെണിയൊരുക്കി പണം കൈമാറാൻ ഉടമ തയ്യാറായി.
ആവശ്യപ്പെട്ട തുകയുടെ അഡ്വാൻസായി 50,000 രൂപ തന്റെ ഔദ്യോഗിക വസതിയിൽ എത്തിച്ചു നൽകാനാണ് ഡിവൈഎസ്പി നിർദ്ദേശിച്ചിരുന്നത്. പണവുമായി വാഹന ഉടമ ഡിവൈഎസ്പിയുടെ വീട്ടിലെത്തിയപ്പോൾ വിജിലൻസ് സംഘവും ഒപ്പം ഒളിച്ചെത്തിയിരുന്നു. എന്നാൽ പണം വാങ്ങുന്നതിനിടെ വിജിലൻസിനെ കണ്ട അനിൽകുമാർ പെട്ടെന്ന് തന്നെ വീടിനുള്ളിൽ കയറി കതകടച്ചു.
തുടർന്ന് വീടിന്റെ മേൽക്കൂര പൊളിച്ച് പുറത്തിറങ്ങിയ ഡിവൈഎസ്പി ഓടി രക്ഷപ്പെടാൻ ശ്രമിക്കുകയായിരുന്നു. എന്നാൽ വിജിലൻസ് സംഘം പുറകിൽ നിന്ന് സാഹസികമായി പിന്തുടർന്ന് ഇയാളെ കീഴ്പ്പെടുത്തി. പ്രതിയുടെ വീട്ടിൽ വിജിലൻസ് സംഘം കൂടുതൽ പരിശോധനകൾ നടത്തിവരികയാണ്.
Story Summary: Cherthala DYSP Anilkumar was arrested by Vigilance while accepting a bribe of ₹50,000 as an advance to release seized waste disposal vehicles. In a cinematic turn of events, the officer locked himself inside his house and tried to escape by breaking the roof before being caught.
