മുംബൈ: മഹാരാഷ്ട്രയിലെ താനെ ജില്ലയിലുള്ള മിരാ റോഡിലെ പൂനം ക്ലസ്റ്റർ റസിഡൻഷ്യൽ സൊസൈറ്റിയിൽ ബക്രീദ് ആഘോഷങ്ങളുമായി ബന്ധപ്പെട്ട് കഴിഞ്ഞ രണ്ടു ദിവസമായി കടുത്ത വർഗ്ഗീയ സംഘർഷാവസ്ഥ നിലനിൽക്കുന്നു (Thane Bakrid Goat Protest). സൊസൈറ്റി വളപ്പിൽ ബലിമൃഗങ്ങളായ ആടുകളെ കൊണ്ടുവരുന്നതിനും താൽക്കാലിക ഷെഡ്ഡ് നിർമ്മിക്കുന്നതിനുമെതിരെ ഒരു വിഭാഗം താമസക്കാരും ഹൈന്ദവ സംഘടനകളും ശക്തമായ എതിർപ്പുമായി രംഗത്തെത്തിയതാണ് പ്രശ്നങ്ങൾക്ക് കാരണമായത്.
പ്രതിഷേധത്തെ തുടർന്ന് താൽക്കാലിക ഷെഡ്ഡ് പൊളിച്ചുമാറ്റിയെങ്കിലും, മറ്റൊരു വിഭാഗം ആളുകൾ ഇതിനെതിരെ പോലീസിൽ പരാതി നൽകിയതോടെ ഇരുവിഭാഗങ്ങളും തമ്മിൽ വാക്കേറ്റവും കൈയാങ്കളിയുമുണ്ടായി. സംഘർഷാവസ്ഥ കണക്കിലെടുത്ത് മുൻകരുതലായി പ്രദേശത്ത് കൂട്ടംകൂടുന്നതും മുദ്രാവാക്യം വിളിക്കുന്നതും അധികൃതർ നിരോധിച്ചിട്ടുണ്ട്. നിലവിൽ മുനിസിപ്പൽ കോർപ്പറേഷന്റെ വാഹനങ്ങളിൽ 51 ആടുകളെ സൊസൈറ്റിയിൽ നിന്നും മാറ്റിയിട്ടുണ്ടെങ്കിലും പ്രദേശത്ത് ഇരുന്നൂറോളം പോലീസ് ഉദ്യോഗസ്ഥരെ സുരക്ഷയ്ക്കായി വിന്യസിച്ചിട്ടുണ്ട്.
പ്രതിഷേധത്തിനിടെ വിശ്വഹിന്ദു പരിഷത്ത്, ബജ്റംഗ്ദൾ പ്രവർത്തകർ സൊസൈറ്റി ഗേറ്റിൽ തടിച്ചുകൂടി ഹനുമാൻ ചാലീസ ജപിക്കുകയും മുദ്രാവാക്യം വിളിക്കുകയും ചെയ്തതോടെ സ്ഥിതിഗതികൾ കൂടുതൽ സങ്കീർണ്ണമായി. ഇതിനിടയിലാണ് ആടുകളെ കൊണ്ടുവന്നതിൽ പ്രതിഷേധിച്ച് ഒരു വിഭാഗം ആളുകൾ സൊസൈറ്റിക്ക് ഉള്ളിലേക്ക് ഒരു പന്നിയെ കൊണ്ടുവരാൻ ശ്രമിച്ചതും നാടകീയമായ രംഗങ്ങൾക്ക് വഴിവെച്ചതും.
A policeman saved a pig at Mira road, Thane while protesters were trying to bring pigs near a housing society as retaliation, leaders openly saying “we will answer goats with pigs”, this is what India is being reduced to.
Animals are being turned into tools for communal… pic.twitter.com/RdORIQ9ijc— yash saghal (@YSaghal) May 26, 2026
പ്രതിഷേധക്കാർക്കിടയിൽ നിന്നും പോലീസ് ഉദ്യോഗസ്ഥൻ ഒരു പന്നിക്കുഞ്ഞിനെ കൈകളിൽ കോരിയെടുത്തു സുരക്ഷിത സ്ഥാനത്തേക്ക് ഓടുന്നതിന്റെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിക്കുന്നുണ്ട്. പ്രതിഷേധക്കാരിൽ ചിലർ പോലീസിന്റെ കൈയിൽ നിന്നും പന്നിക്കുഞ്ഞിനെ പിടിച്ച വാങ്ങാൻ ശ്രമിച്ചെങ്കിലും പോലീസ് ഇത് തടഞ്ഞു. ഇതിനിടെയുണ്ടായ സംഘർഷത്തിൽ ഒരു വിഎച്ച്പി ഭാരവാഹിക്കും മറ്റ് രണ്ടുപേർക്കും നേരെ ബ്ലേഡ് ആക്രമണം ഉണ്ടായതായും പ്രദേശവാസികൾ ആരോപിക്കുന്നു. വ്യാഴാഴ്ച ബക്രീദ് ആഘോഷിക്കാനിരിക്കെ സൊസൈറ്റിയിലും പരിസരത്തും കനത്ത സുരക്ഷയാണ് പോലീസ് ഏർപ്പെടുത്തിയിരിക്കുന്നത്.
Summary: Heavy police security has been deployed at a residential society in Thane, Maharashtra, following communal tensions over bringing sacrificial goats for Bakrid. The situation escalated dramatically when protesters gathered at the gates, recited religious hymns, and attempted to bring a pig into the complex as a counter-protest. In a video that went viral, a police officer was seen running through the crowd to rescue a piglet from the demonstrators.
