ഗാസയിൽ ബഹുരാഷ്ട്ര സുരക്ഷാസേനയെ വിന്യസിക്കാൻ അനുമതി നൽകുന്ന നിയമപരമായ ചട്ടക്കൂടിന് ഇസ്രായേൽ സുരക്ഷാ മന്ത്രിസഭ അംഗീകാരം നൽകിയതായി ഇസ്രായേൽ ഉദ്യോഗസ്ഥനെ ഉദ്ധരിച്ച് റോയിട്ടേഴ്സ് റിപ്പോർട്ട് ചെയ്തു. അമേരിക്കൻ പ്രസിഡന്റ് ഡോണൾഡ് ട്രംപ് മുന്നോട്ടുവച്ച വെടിനിർത്തൽ പദ്ധതിയുടെ ഭാഗമായാണ് ഈ നീക്കമെന്നാണ് റിപ്പോർട്ടുകൾ സൂചിപ്പിക്കുന്നത്. ( Israel Gaza International Security Force)
ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു അമേരിക്കൻ സന്ദർശനത്തിന് പുറപ്പെടുന്നതിന് തൊട്ടുമുമ്പാണ് ഈ തീരുമാനം വന്നത്. നെതന്യാഹു തിങ്കളാഴ്ച വാഷിംഗ്ടണിലേക്ക് യാത്രതിരിക്കുമെന്നും ചൊവ്വാഴ്ച പ്രസിഡന്റ് ട്രംപുമായി കൂടിക്കാഴ്ച നടത്തുമെന്നും പ്രതീക്ഷിക്കുന്നു. ഗാസയിലെ സുരക്ഷാ സാഹചര്യവും വെടിനിർത്തൽ ചർച്ചകളുമാകും കൂടിക്കാഴ്ചയിലെ പ്രധാന വിഷയങ്ങളെന്നാണ് വിലയിരുത്തൽ.
റിപ്പോർട്ട് പ്രകാരം, ഗാസയിൽ പ്രവേശിക്കുന്ന ബഹുരാഷ്ട്ര സുരക്ഷാസേനയിൽ ഏകദേശം 200 അംഗങ്ങളുണ്ടാകും. മൊറോക്കോ, ഉഗാണ്ട എന്നിവ ഉൾപ്പെടെയുള്ള രാജ്യങ്ങൾ സേനയിലേക്ക് അംഗങ്ങളെ നൽകുമെന്നാണ് ബന്ധപ്പെട്ട ഉദ്യോഗസ്ഥൻ വ്യക്തമാക്കിയത്.
സുരക്ഷ ഉറപ്പാക്കുന്നതിനും വെടിനിർത്തൽ കരാർ നടപ്പാക്കുന്നതിനും മാനുഷിക സഹായ വിതരണത്തിന് അനുകൂല സാഹചര്യം സൃഷ്ടിക്കുന്നതിനുമാണ് സേനയെ വിന്യസിക്കാൻ ലക്ഷ്യമിടുന്നത്. അന്താരാഷ്ട്ര സുരക്ഷാസേനയുടെ പ്രവർത്തനപരിധി, അധികാരങ്ങൾ, വിന്യാസത്തിന്റെ സമയക്രമം തുടങ്ങിയ കൂടുതൽ വിശദാംശങ്ങൾ ഇതുവരെ ഔദ്യോഗികമായി പുറത്തുവിട്ടിട്ടില്ല. ട്രംപ്-നെതന്യാഹു കൂടിക്കാഴ്ചയ്ക്ക് ശേഷമാകും വിഷയത്തിൽ കൂടുതൽ വ്യക്തത ലഭിക്കുമെന്നാണ് നയതന്ത്ര വൃത്തങ്ങൾ പ്രതീക്ഷിക്കുന്നത്.
Summary: Israel has approved the legal framework to allow a multinational security force into Gaza under US President Donald Trump’s proposed ceasefire plan. Prime Minister Benjamin Netanyahu is expected to discuss the initiative with President Trump during his Washington visit.
