ന്യൂഡൽഹി: മുനമ്പത്തെ പാവപ്പെട്ട മനുഷ്യരെ സ്വന്തം മണ്ണിൽ നിന്ന് ഇറക്കിവിടുന്ന ഒരു സാഹചര്യവും ഉണ്ടാകില്ലെന്ന് ഉറപ്പുനൽകുന്നതായി മുഖ്യമന്ത്രി വി.ഡി സതീശൻ (Kerala Chief Minister VD Satheesan Delhi press meet). എത്രയും പെട്ടെന്ന് അവർക്ക് ഭൂമിനികുതി അടയ്ക്കുന്നതിനുള്ള സംവിധാനമൊരുക്കുമെന്നും അവരുടെ ഭൂമിയിൽ പൂർണ്ണാവകാശം വാങ്ങിക്കൊടുക്കുമെന്നും ഡൽഹി കേരള ഹൗസിൽ ചേർന്ന വാർത്താസമ്മേളനത്തിൽ മുഖ്യമന്ത്രി വ്യക്തമാക്കി.
ഇതോടൊപ്പം കേരളത്തിന്റെ സാമ്പത്തികാവസ്ഥയെയും സംസ്ഥാനത്തിന്റെ വികസന പദ്ധതികളെയും കുറിച്ചുള്ള പുതിയ യുഡിഎഫ് സർക്കാരിന്റെ ധവളപത്രം (White Paper) ജൂൺ ആദ്യവാരത്തിൽ പുറത്തിറക്കുമെന്നും അദ്ദേഹം പറഞ്ഞു. കേരളത്തിന്റെ വികസനവുമായി ബന്ധപ്പെട്ട ആവശ്യങ്ങൾക്കായി പ്രധാനമന്ത്രിയെയും കേന്ദ്ര ധനമന്ത്രിയെയും നേരിൽക്കണ്ട് സംസാരിച്ചതായും അദ്ദേഹം വ്യക്തമാക്കി.
പ്രധാനമന്ത്രിയോട് പ്രത്യേക അഭ്യർത്ഥന കേരളത്തിന്റെ സാമ്പത്തിക പ്രതിസന്ധി മറികടക്കാൻ കേന്ദ്രത്തിന്റെ ഭാഗത്തുനിന്ന് അനുകൂലമായ നിലപാടുണ്ടാകുമെന്നാണ് പ്രതീക്ഷയെന്ന് മുഖ്യമന്ത്രി പറഞ്ഞു. ദേശീയപാത വികസനവുമായി ബന്ധപ്പെട്ട് സുപ്രധാനമായ ഒരു ആവശ്യം പ്രധാനമന്ത്രിക്ക് മുന്നിൽ സംസ്ഥാന സർക്കാർ വെച്ചിട്ടുണ്ട്. ദേശീയപാത വികസനത്തിനായി ഭൂമി ഏറ്റെടുക്കുന്നതിന് വിഹിതമായി 5,580 കോടി രൂപ (25 ശതമാനം തുക) കേരളം നൽകിയിട്ടുണ്ട്. ഈ തുക സംസ്ഥാനത്തിന്റെ പൊതുവായ കടമെടുപ്പ് പരിധിയിൽ നിന്ന് അടിയന്തരമായി ഒഴിവാക്കണമെന്ന് പ്രധാനമന്ത്രിയോട് അഭ്യർത്ഥിച്ചു- മുഖ്യമന്ത്രി പറഞ്ഞു.
നിലവിൽ ജി.എസ്.ഡി.പിയുടെ (GSDP) 3.5 ശതമാനമാണ് കേരളത്തിന്റെ കടമെടുപ്പ് പരിധി. ഇതിൽ 0.5 ശതമാനം വൈദ്യുതി മേഖലയിലെ പരിഷ്കാരങ്ങൾക്കായി മാറ്റിവെച്ചിട്ടുള്ളതാണ്. എന്നാൽ കിഫ്ബിയും (KIIFB) പെൻഷൻ ഫണ്ടും വരുത്തിവെച്ച ബാധ്യതകൾ കൂടി ഈ പൊതുപരിധിയിൽ മുൻ സർക്കാർ ഉൾപ്പെടുത്തിയത് കേരളത്തിന്റെ കടമെടുപ്പ് ശേഷിയെ സാരമായി ബാധിച്ചിട്ടുണ്ടെന്ന് വി.ഡി സതീശൻ ചൂണ്ടിക്കാട്ടി.
ജൂൺ ആദ്യം സർക്കാർ ധവളപത്രം ഇറക്കിയശേഷം ഇതിന്റെ കൂടുതൽ സാമ്പത്തിക വിശദാംശങ്ങൾ കേന്ദ്ര സർക്കാരിനെ ഔദ്യോഗികമായി ധരിപ്പിക്കുമെന്നും അദ്ദേഹം അറിയിച്ചു.
Story Summary: Kerala Chief Minister VD Satheesan announced that the new UDF government will release a white paper on the state’s finances in June. Speaking at Delhi Kerala House, he assured that Munambam residents will not be evicted and urged the PM to exclude the ₹5,580 crore NH fund from Kerala’s borrowing limit.
