റിയാദ്: ലോകമെമ്പാടുമുള്ള മലയാളികൾ ഒന്നടങ്കം പ്രാർത്ഥനയോടെ കാത്തിരുന്ന ആ വലിയ വാർത്ത ഒടുവിൽ യാഥാർത്ഥ്യമായി (Abdul Rahim Kozhikode Saudi jail release order updates). സൗദി ജയിലിൽ കഴിഞ്ഞിരുന്ന കോഴിക്കോട് കോടമ്പുഴ സ്വദേശി അബ്ദുൽ റഹീമിന്റെ മോചന ഉത്തരവിൽ സൗദി അധികൃതർ ഔദ്യോഗികമായി ഒപ്പുവെച്ചു. ജയിലിൽ നിന്നുള്ള ഇമിഗ്രേഷൻ ഉൾപ്പെടെയുള്ള അടിയന്തര നിയമനടപടികൾ അതിവേഗം പൂർത്തിയാക്കി അദ്ദേഹത്തെ വൈകാതെ തന്നെ നാട്ടിലെത്തിക്കാനുള്ള ശ്രമങ്ങൾ പൂർത്തിയായി വരികയാണ്. സാധ്യമെങ്കിൽ ഇന്ന് തന്നെ റഹീമിനെ നാട്ടിലേക്ക് കൊണ്ടുവരാനാണ് റിയാദിലെ നിയമസഹായ സമിതി ഇപ്പോൾ ശ്രമിക്കുന്നത്. നീണ്ട 20 വർഷത്തെ അനിശ്ചിതത്വങ്ങൾക്കും ജയിൽവാസത്തിനും ശേഷമാണ് അബ്ദുൽ റഹീം ഒടുവിൽ സ്വതന്ത്രനാകുന്നത്.
2006 നവംബറിലാണ് സൗദി ബാലൻ മരിക്കാനിടയായ കേസിൽ അബ്ദുൽ റഹീമിനെ റിയാദ് പോലീസ് അറസ്റ്റ് ചെയ്യുന്നത്. തുടർന്ന് നടന്ന നീണ്ട വിചാരണയ്ക്കൊടുവിൽ റിയാദിലെ കോടതി റഹീമിന് വധശിക്ഷ വിധിക്കുകയായിരുന്നു. 2006-ൽ ഹൗസ് ഡ്രൈവർ വിസയിൽ സൗദിയിലെത്തിയതായിരുന്നു റഹീം. തന്റെ സ്പോൺസറുടെ ഭിന്നശേഷിക്കാരനായ മകനെ പരിചരിക്കുന്നതിനിടെ, കഴുത്തിൽ ഘടിപ്പിച്ചിരുന്ന ജീവൻരക്ഷാ ഉപകരണത്തിൽ മനഃപൂർവ്വമല്ലാതെ കൈ തട്ടുകയും കുട്ടി മരണപ്പെടുകയുമായിരുന്നു. ഒരു കൈപ്പിഴ മാത്രമായിരുന്നു അപകടകാരണമെന്ന് വ്യക്തമായിരുന്നെങ്കിലും സൗദി നിയമപ്രകാരം റഹീമിന് വധശിക്ഷയാണ് വിധിക്കപ്പെട്ടത്.
കുട്ടിയുടെ കുടുംബം മുന്നോട്ടുവെച്ച ഭീമമായ മോചനദ്രവ്യം (ദിയാധനം) കണ്ടെത്താൻ റഹീമിന്റെ കുടുംബത്തിന് സാധിക്കുമായിരുന്നില്ല. എന്നാൽ ലോകത്തിന്റെ വിവിധ കോണുകളിലുള്ള മലയാളികൾ ഒന്നടങ്കം കൈകോർത്ത് ചരിത്രത്തിലെ ഏറ്റവും വലിയ ക്രൗഡ് ഫണ്ടിംഗിലൂടെ 34 കോടി രൂപ ദിയാധനമായി സമാഹരിച്ച് നൽകുകയായിരുന്നു.
ദിയാധനം കോടതിയിൽ സമർപ്പിച്ചതോടെ റഹീമിന്റെ വധശിക്ഷ നേരത്തെ തന്നെ കോടതി ഔദ്യോഗികമായി ഒഴിവാക്കി നൽകിയിരുന്നു. ഇതിനുപിന്നാലെ റിയാദിലെ ക്രിമിനൽ കോടതി, റഹീമിന് സൗദി പൊതുനിയമപ്രകാരമുള്ള (Public Law) തടവുശിക്ഷ കൂടി അനുഭവിക്കണമെന്ന് വിധിക്കുകയുണ്ടായി.വർഷങ്ങളായി ജയിലറയ്ക്കുള്ളിൽ ഒരമ്മയുടെയും നാടിന്റെയും കണ്ണീരായി കഴിഞ്ഞിരുന്ന റഹീം വൈകാതെ തന്നെ കരിപ്പൂർ വിമാനത്താവളത്തിൽ ഇറങ്ങുമെന്ന വാർത്ത കോഴിക്കോട്ടെ അദ്ദേഹത്തിന്റെ ജന്മനാടായ കോടമ്പുഴയെ വലിയ ആഹ്ലാദത്തിലാഴ്ത്തിയിരിക്കുകയാണ്.
Story Summary: Abdul Rahim from Kozhikode, who was facing the death penalty in a Saudi jail, is finally set to return home as officials signed his release order. His life was saved after global Malayalis crowdfunded ₹34 crore for his blood money (Diyyah).
