ന്യൂഡൽഹി: പ്രശസ്ത ബോളിവുഡ് താരം രൺവീർ സിങ്ങിനെതിരെ കടുത്ത നടപടിയുമായി സിനിമാ മേഖലയിലെ പ്രമുഖ സംഘടനയായ ഫെഡറേഷൻ ഓഫ് വെസ്റ്റേൺ ഇന്ത്യ സിനി എംപ്ലോയീസ്. ‘ഡോൺ 3’ സിനിമയിൽ നിന്ന് താരം അവസാന നിമിഷം പിന്മാറിയതിനെത്തുടർന്നുണ്ടായ തർക്കത്തിലാണ് സംഘടന രൺവീറിനെതിരെ ‘സഹകരണമില്ലായ്മ’ പ്രഖ്യാപിച്ചിരിക്കുന്നത്. ഇതോടെ ഫെഡറേഷനുമായി അഫിലിയേറ്റ് ചെയ്തിട്ടുള്ള തൊഴിലാളികളോ സാങ്കേതിക പ്രവർത്തകരോ മറ്റ് അംഗങ്ങളോ തൽക്കാലത്തേക്ക് രൺവീർ സിങ്ങിന്റെ പ്രൊജക്ടുകളുമായി സഹകരിക്കില്ല.(Ranveer Singh Don 3 Controversy, FWICE Issues Non Cooperation Directive)
ഫർഹാൻ അക്തർ സംവിധാനം ചെയ്യാനിരുന്ന ‘ഡോൺ 3’ എന്ന ചിത്രത്തിൽ നിന്ന് രൺവീർ സിങ് പെട്ടെന്ന് പിന്മാറിയതാണ് പ്രശ്നങ്ങളുടെ തുടക്കം. സിനിമയുടെ പ്രീ-പ്രൊഡക്ഷൻ ജോലികൾ അവസാന ഘട്ടത്തിലായിരുന്നു. ഷൂട്ടിങ് ഷെഡ്യൂളും അണിയറപ്രവർത്തകരും നിശ്ചയിക്കപ്പെടുകയും, ചിത്രീകരണത്തിന് മൂന്നാഴ്ച മാത്രം ബാക്കിയുള്ളപ്പോഴാണ് രൺവീറിന്റെ അപ്രതീക്ഷിത പിന്മാറ്റം. തിരക്കഥയുമായി ബന്ധപ്പെട്ട അഭിപ്രായവ്യത്യാസങ്ങളാണ് പിന്മാറ്റത്തിന് കാരണമായി പറയുന്നത്. എന്നാൽ, നായകന്റെ ഈ അവസാന നിമിഷത്തെ തീരുമാനം കാരണം തങ്ങൾക്ക് ഏകദേശം 45 കോടി രൂപയുടെ സാമ്പത്തിക നഷ്ടം ഉണ്ടായതായി നിർമ്മാണ കമ്പനിയായ എക്സൽ എന്റർടൈൻമെന്റ് ആരോപിക്കുന്നു.
സിനിമാ വ്യവസായം പരസ്പര വിശ്വാസത്തിലാണ് മുന്നോട്ട് പോകുന്നതെന്ന് FWICE ചീഫ് അഡ്വൈസർ അശോക് പണ്ഡിറ്റ് വ്യക്തമാക്കി. ഒരു നടനെ കരാറൊപ്പിട്ട ശേഷം കോടിക്കണക്കിന് രൂപ ചിലവഴിച്ചാണ് അണിയറയിൽ ഒരുക്കങ്ങൾ നടത്തുന്നത്. അതുകൊണ്ട് തന്നെ അവസാന നിമിഷം ഒരു താരം സിനിമ ഉപേക്ഷിക്കുമ്പോൾ അത് നിർമ്മാതാവിനെ മാത്രമല്ല, ചിത്രത്തെ ആശ്രയിച്ച് ജീവിക്കുന്ന നൂറുകണക്കിന് സാധാരണ തൊഴിലാളികളെയും ബാധിക്കുമെന്ന് അദ്ദേഹം ഓർമ്മിപ്പിച്ചു. തർക്കം സൗഹാർദ്ദപരമായി പരിഹരിക്കാൻ സംഘടന ശ്രമിച്ചിരുന്നു. വിശദീകരണം തേടി രൺവീറിന് മൂന്ന് തവണ നോട്ടീസുകൾ അയച്ചെങ്കിലും താരം നേരിട്ട് പ്രതികരിച്ചില്ല. ഈ വിഷയം തങ്ങളുടെ പരിധിയിൽ വരുന്നതല്ലെന്നും നിയമപരമായി നേരിടുമെന്നുമാണ് രൺവീറിന്റെ ടീം ഇമെയിൽ വഴി അറിയിച്ചത്. ഇതിൽ അതൃപ്തി രേഖപ്പെടുത്തിക്കൊണ്ടാണ് ഫെഡറേഷൻ കടുത്ത നടപടിയിലേക്ക് നീങ്ങിയത്.
തർക്കം പരിഹരിക്കാൻ നടൻ ആമിർ ഖാൻ ഉൾപ്പെടെയുള്ള പ്രമുഖർ മധ്യസ്ഥതയ്ക്ക് ശ്രമിച്ചെങ്കിലും പരാജയപ്പെടുകയായിരുന്നു. വിവാദങ്ങളോട് അന്തസ്സോടെയും പക്വതയോടെയും പ്രതികരിക്കാനാണ് താരം ആഗ്രഹിക്കുന്നതെന്ന് രൺവീർ സിങ്ങിന്റെ ഔദ്യോഗിക വക്താവ് അറിയിച്ചു. സിനിമയിലെ സഹപ്രവർത്തകരോടും ‘ഡോൺ’ ഫ്രാഞ്ചൈസിയോടും രൺവീറിന് അതീവ ബഹുമാനമാണുള്ളത്. പലവിധത്തിലുള്ള ചർച്ചകളും അഭ്യൂഹങ്ങളും പ്രചരിക്കുന്നുണ്ടെങ്കിലും പരസ്യമായ പ്രതികരണങ്ങൾക്കില്ലെന്നും, വരാനിരിക്കുന്ന പ്രൊജക്ടുകളിലാണ് താരത്തിന്റെ ശ്രദ്ധയെന്നും വക്താവ് വ്യക്തമാക്കി.
Story Summary
The Federation of Western India Cine Employees (FWICE) has issued a non-cooperation directive against Bollywood actor Ranveer Singh following his abrupt exit from Farhan Akhtar’s upcoming movie Don 3. The production house Excel Entertainment claimed a loss of Rs 45 crore due to the last-minute decision, leading to film body intervention.
