ഭോപ്പാൽ: ഇന്ത്യൻ ക്രിക്കറ്റ് താരം ജസ്പ്രീത് ബുംറയെ ‘ഫുട്ബോൾ താരം’ എന്ന് വിശേഷിപ്പിച്ച സംഭവത്തിൽ പരസ്യമായി മാപ്പപേക്ഷിച്ച് തെലുങ്ക് സൂപ്പർ താരം രാം ചരൺ. തന്റെ പുതിയ ചിത്രമായ ‘പെദ്ദി’ എന്ന സിനിമയുടെ പ്രമോഷനുമായി ബന്ധപ്പെട്ട് മധ്യപ്രദേശിലെ ഭോപ്പാലിൽ ശനിയാഴ്ച നടന്ന പരിപാടിക്കിടെയായിരുന്നു രാം ചരണിന് നാക്കുപിഴ സംഭവിച്ചത്. ഇതിന്റെ വീഡിയോകൾ സമൂഹമാധ്യമങ്ങളിൽ വൻതോതിൽ പ്രചരിക്കുകയും ട്രോളുകൾക്ക് വഴിവെക്കുകയും ചെയ്തതോടെയാണ് താരം എക്സ് പ്ലാറ്റ്ഫോമിലൂടെ വിശദീകരണവുമായി രംഗത്തെത്തിയത്.(Ram Charan Apologizes Jasprit Bumrah Footballer Comment Viral Video Peddi Bhopal)
ഓസ്കാർ ജേതാവ് എ.ആർ. റഹ്മാൻ, നായിക ജാൻവി കപൂർ എന്നിവരുൾപ്പെടെയുള്ള അണിയറപ്രവർത്തകർ പങ്കെടുത്ത വലിയ വേദിയിലായിരുന്നു സംഭവം. പരിപാടിയുടെ ഇന്ററാക്ടീവ് സെഷനിൽ ഇന്ത്യയിലെ പ്രമുഖ ക്രിക്കറ്റ് താരങ്ങളെക്കുറിച്ച് ചുരുങ്ങിയ വാക്കുകളിൽ വിവരിക്കാൻ രാം ചരണിനോട് ആവശ്യപ്പെട്ടു. സച്ചിൻ ടെണ്ടുൽക്കറുടെ കരിയറിനെ “നീണ്ടതും ഇതിഹാസതുല്യവുമായ പ്രയാണം” എന്നും, എം.എസ്. ധോണിയെ “ശാന്തനും കൂളും” എന്നും വിശേഷിപ്പിച്ച താരം, രോഹിത് ശർമ്മയെ “എല്ലാവരുടെയും പ്രിയങ്കരൻ” എന്നും വിരാട് കോഹ്ലിയെ “തീപ്പൊരി” എന്നുമാണ് വിശേഷിപ്പിച്ചത്. എന്നാൽ, ജസ്പ്രീത് ബുംറയെക്കുറിച്ചുള്ള ചോദ്യം വന്നപ്പോൾ രാം ചരണിന് പിഴച്ചു.
ജസ്പ്രീത് ബുംറ ജി, ഞാൻ നിങ്ങളുടെ ഏറ്റവും വലിയ ആരാധകനാണ്. എനിക്ക് ഫുട്ബോൾ ഒരുപാട് ഇഷ്ടമാണ്. നിങ്ങൾ ഫുട്ബോളിനെ ഇത്രയധികം മുന്നോട്ട് നയിക്കുന്നതിൽ സന്തോഷം. ലവ് യു, എന്നായിരുന്നു റാം ചരൺ വേദിയിൽ പറഞ്ഞത്. ഈ ദൃശ്യങ്ങൾ നിമിഷങ്ങൾക്കകം എക്സിൽ വൈറലായി. വിഷയം ചർച്ചയായതോടെ തനിക്ക് പറ്റിയ അബദ്ധം സമ്മതിച്ച് റാം ചരൺ ബുംറയോട് ക്ഷമ ചോദിച്ചു.
എനിക്ക് ചിലപ്പോഴൊക്കെ പേരുകൾ മാറിപ്പോകുന്ന വലിയൊരു മറവിയുണ്ട്. ആ ആവേശത്തിനിടയിലും ജനക്കൂട്ടത്തിന് നടുവിലും പറ്റിപ്പോയ മനുഷ്യസഹജമായ ഒരു തെറ്റായിരുന്നു അത്. ജസ്പ്രീത് ബുംറ ജി, ആ തെറ്റിദ്ധാരണയ്ക്ക് ഞാൻ ക്ഷമ ചോദിക്കുന്നു. ഞാൻ നിങ്ങളുടെ കളിയുടെ വലിയൊരു ആരാധകനാണ്. നിങ്ങൾ സ്ഥിരമായി ബാറ്റ്സ്മാന്മാരെ പ്രതിരോധത്തിലാക്കുമ്പോൾ ഓരോ ഇന്ത്യക്കാരനും വലിയ അഭിമാനമാണ് തോന്നുന്നത്, രാം ചരൺ കുറിച്ചു.
Story Summary
Telugu superstar Ram Charan issued an apology to Indian pacer Jasprit Bumrah on X after mistakenly calling him a football player during a promotional event for his upcoming sports-drama ‘Peddi’ in Bhopal. Ram Charan clarified that it was a “genuine human error” caused by excitement, while reiterating his immense respect for the cricketer.
