തിരുവനന്തപുരം: മഴക്കാലത്ത് വാഹനമോടിക്കുന്നവർ പാലിക്കേണ്ട സുരക്ഷാ മുൻകരുതലുകളെക്കുറിച്ച് കർശന മുന്നറിയിപ്പുമായി മോട്ടോർ വാഹന വകുപ്പ്. റോഡിൽ ചെറിയ രീതിയിലാണെങ്കിൽ പോലും വെള്ളക്കെട്ടുണ്ടെങ്കിൽ അതിലൂടെ അമിതവേഗതയിൽ വാഹനം ഓടിക്കരുതെന്ന് എംവിഡി നിർദ്ദേശിക്കുന്നു. ഇത് വാഹനത്തിന്റെ നിയന്ത്രണം പൂർണ്ണമായി നഷ്ടപ്പെടുത്തുന്ന ‘അക്വാപ്ലെയിനിങ്’ അഥവാ ജലപാളി പ്രവർത്തനം എന്ന അപകടകരമായ പ്രതിഭാസത്തിന് കാരണമായേക്കാം.(Kerala MVD issues monsoon driving guidelines and warns against aquaplaning on waterlogged roads)
മഴയത്ത് എപ്പോഴും വേഗത കുറച്ച്, മുൻപിലുള്ള വാഹനവുമായി കൃത്യമായ അകലം പാലിച്ചുമാത്രമേ ഡ്രൈവ് ചെയ്യാവൂ. മുൻപിലെ വാഹനങ്ങളിൽ നിന്ന് തെറിക്കുന്ന ചെളിവെള്ളം വിൻഡ്ഷീൽഡിൽ വീണ് കാഴ്ച മറയാൻ സാധ്യതയുണ്ട്. കൂടാതെ ഈർപ്പം കാരണം ബ്രേക്കിന്റെ കാര്യക്ഷമത കുറയുമെന്നതിനാൽ, വിചാരിച്ച സ്ഥലത്ത് വാഹനം പെട്ടെന്ന് നിർത്താൻ കഴിഞ്ഞെന്നു വരില്ല. മഴക്കാലത്ത് മുൻപിലെ വാഹനങ്ങളുടെ ബ്രേക്ക് ലൈറ്റുകൾ പ്രവർത്തിക്കാതിരിക്കാനുള്ള സാധ്യതയും മുൻകൂട്ടി കാണണം.
സുരക്ഷിത യാത്രയ്ക്കായി ശ്രദ്ധിക്കേണ്ട 10 പ്രധാന കാര്യങ്ങൾ
വെള്ളം കവിഞ്ഞൊഴുകുന്ന പാലങ്ങളിലൂടെയോ റോഡുകളിലൂടെയോ യാതൊരു കാരണവശാലും വാഹനം ഓടിക്കരുത്. ശക്തമായ മഴയുള്ളപ്പോൾ മരങ്ങളോ ഇലക്ട്രിക് ലൈനുകളോ ഇല്ലാത്ത സുരക്ഷിതമായ റോഡരികിൽ ഹസാർഡ് ലൈറ്റുകൾ ഓൺ ചെയ്ത് വാഹനം നിർത്തിയിടുക. പെട്ടെന്ന് ബ്രേക്ക് ചവിട്ടുന്നത് വാഹനം തെന്നിമാറാൻ കാരണമാകും. അതിനാൽ സഡൻ ബ്രേക്കിംഗ് ഒഴിവാക്കുന്ന രീതിയിൽ വേഗത ക്രമീകരിക്കുക.
മലഞ്ചെരുവുകളിലോ, വലിയ മരങ്ങളുടെ കീഴിലോ, ഹൈടെൻഷൻ ലൈനുകൾക്ക് താഴെയോ വാഹനം പാർക്ക് ചെയ്യരുത്. ഒഴിവാക്കാൻ കഴിയാത്ത സാഹചര്യത്തിൽ വെള്ളക്കെട്ടിലൂടെ പോകേണ്ടി വന്നാൽ വാഹനം ഫസ്റ്റ് ഗിയറിൽ മാത്രം ഓടിക്കുക. വെള്ളത്തിൽ വെച്ച് വണ്ടി ഓഫ് ആയാൽ വീണ്ടും സ്റ്റാർട്ട് ചെയ്യാൻ ശ്രമിക്കാതെ, ഇറങ്ങി തള്ളി മാറ്റുക. ബ്രേക്കിനുള്ളിൽ വെള്ളം കയറിയാൽ കുറച്ചുദൂരത്തേക്ക് ബ്രേക്ക് പതിയെ ചവിട്ടിക്കൊണ്ട് ഫസ്റ്റ് ഗിയറിൽ ഓടിക്കുക. പിന്നീട് ഒന്നുകൂടി ചവിട്ടിപ്പിടിച്ച് കാര്യക്ഷമത ഉറപ്പാക്കുക.
മഴക്കാലത്ത് ട്രാഫിക് ബ്ലോക്ക് കൂടാൻ സാധ്യതയുള്ളതിനാൽ വേഗത കൂട്ടാതെ, സമയം കണക്കാക്കി മുൻകൂട്ടി യാത്ര തിരിക്കുക. പാർക്ക് ചെയ്തിരുന്ന വാഹനത്തിൽ വെള്ളം കയറിയിട്ടുണ്ടെങ്കിൽ മെക്കാനിക്കിനെ കാണിക്കാതെ ഒരു കാരണവശാലും സ്റ്റാർട്ട് ചെയ്യരുത്. യാത്രയ്ക്ക് മുൻപ് ടയറുകളുടെ അവസ്ഥയും, വാഹനത്തിന്റെ ഇലക്ട്രിക്കൽ, മെക്കാനിക്കൽ ഭാഗങ്ങളുടെ ക്ഷമതയും ഉറപ്പുവരുത്തുക.
Story Summary
The Kerala Motor Vehicles Department (MVD) has issued a safety advisory for driving during heavy rains, warning motorists about the dangers of aquaplaning on waterlogged roads. The department listed ten essential precautions, including maintaining safe distance, avoiding sudden braking, checking brake efficiency, and cautioning against blindly relying on Google Maps during harsh weather.
