ചെന്നൈയിൽ താമസിക്കുന്ന ദക്ഷിണ കൊറിയൻ യുവതിയായ ജങ് ഏയ്ക്ക് ഇന്ത്യൻ സിനിമ തിയേറ്ററുകൾ നൽകിയത് കൗതുകകരമായ ഒരനുഭവമായിരുന്നു. പ്രവേശന കവാടം, ടിക്കറ്റ് കൗണ്ടറുകൾ, പോസ്റ്ററുകൾ, പോപ്കോൺ കൗണ്ടറുകൾ എന്നിവയെല്ലാം ദക്ഷിണ കൊറിയയിലെ തിയേറ്ററുകൾക്ക് സമാനമാണെങ്കിലും, സിനിമയുടെ ഇടവേളയാണ് അവരെ ശരിക്കും അത്ഭുതപ്പെടുത്തിയത്. (Indian Cinema Intermission)
സിനിമ പകുതിയായപ്പോൾ പെട്ടെന്ന് സ്ക്രീൻ ഇരുളുകയും ലൈറ്റുകൾ തെളിയുകയും ആളുകൾ സീറ്റുകളിൽ നിന്ന് എഴുന്നേൽക്കുകയും ചെയ്തപ്പോൾ എന്തോ അടിയന്തരാവസ്ഥയാണെന്നാണ് ജങ് ഏ കരുതിയത്. ദക്ഷിണ കൊറിയയിൽ മണിക്കൂറുകൾ നീളുന്ന സിനിമകൾക്ക് പോലും ഇടവേളകളില്ലെന്നും, ആർക്കെങ്കിലും അത്യാവശ്യമുണ്ടെങ്കിൽ മാത്രം നിശബ്ദമായി പുറത്തുപോവുകയാണ് പതിവെന്നും അവർ പറയുന്നു. എന്നാൽ, ഇന്ത്യയിലെ ഈ ഇടവേള സംവിധാനം പിന്നീട് അവർക്ക് ഏറെ പ്രിയപ്പെട്ടതായി മാറി. സിനിമ ആസ്വദിക്കുന്നതിനിടയിൽ വിശ്രമിക്കാനും സ്നാക്സ് വാങ്ങാനും ലഭിക്കുന്ന ഈ സമയം മികച്ചൊരു ആശയമാണെന്ന് ജങ് ഏ അഭിപ്രായപ്പെടുന്നു.
യുവതിയുടെ വീഡിയോ സോഷ്യൽ മീഡിയയിൽ വലിയ ചർച്ചയായിട്ടുണ്ട്. ഇടവേള എന്നത് മികച്ചൊരു ആശയമാണെന്നും, സിനിമയുടെ കഥാഗതി ആസ്വദിക്കാനും ചിന്തിക്കാനും ഇത് സഹായിക്കുമെന്നും നിരവധിപേർ കമന്റ് ചെയ്തു. ഇന്ത്യൻ സിനിമകളിലെ ഇടവേളകൾ കൃത്യമായ സമയത്താണ് ഡിസൈൻ ചെയ്തിരിക്കുന്നതെന്നും ചിലർ അഭിപ്രായപ്പെടുന്നു.
