സംസ്ഥാനത്ത് നിയമസഭാ തിരഞ്ഞെടുപ്പ് നടക്കുന്ന ഇന്ന് കൊല്ലത്ത് റെയിൽവേ സിഗ്നൽ സംവിധാനം തകരാറിലായത് യാത്രക്കാരെ വലച്ചു (Kollam Railway Signal Failure). കൊല്ലം – പരവൂർ റൂട്ടിലെ സിഗ്നൽ സംവിധാനത്തിനാണ് തകരാർ സംഭവിച്ചത്. ട്രെയിൻ കടന്നുപോകാൻ അനുമതി നൽകുന്ന ബ്ലോക്ക് ഇൻസ്ട്രുമെന്റ് പ്രവർത്തനരഹിതമായതോടെ രണ്ട് മണിക്കൂറിലധികമാണ് പല ട്രെയിനുകളും വിവിധയിടങ്ങളിൽ പിടിച്ചിട്ടത്. ഉച്ചയ്ക്ക് 11.42-ന് കൊല്ലത്ത് നിന്ന് പുറപ്പെടേണ്ട ട്രെയിൻ ഏകദേശം മൂന്ന് മണിക്കൂറോളം വൈകി മൂന്ന് മണിയോടെയാണ് യാത്ര തുടങ്ങിയത്.
തകരാർ പൂർണ്ണമായി പരിഹരിക്കാൻ വൈകുന്നതിനാൽ ‘മെമോ’ എഴുതി നൽകിയാണ് നിലവിൽ ട്രെയിനുകൾക്ക് കടന്നുപോകാൻ അനുമതി നൽകുന്നത്. 20636 അനന്തപുരി എക്സ്പ്രസ്സ്, 56101 നാഗർകോവിൽ പാസഞ്ചർ, 56307 തിരുവനന്തപുരം പാസഞ്ചർ എന്നീ ട്രെയിനുകളെ ഈ തകരാർ സാരമായി ബാധിക്കാൻ സാധ്യതയുണ്ട്. കടുത്ത ചൂടിനിടയിൽ യാതൊരു മുന്നറിയിപ്പുമില്ലാതെ ട്രെയിനുകൾ വൈകുന്നത് വോട്ട് രേഖപ്പെടുത്താൻ പോകുന്നവരെയടക്കം വലിയ ദുരിതത്തിലാക്കി.
നിലവിൽ റെയിൽവേ അധികൃതർ തകരാർ പരിശോധിച്ചു വരികയാണ്. ഏകദേശം രണ്ട് മണിക്കൂറിലധികം പിടിച്ചിട്ടിരുന്ന ബാംഗ്ലൂർ – തിരുവനന്തപുരം സ്പെഷ്യൽ ട്രെയിൻ ഇപ്പോൾ യാത്ര തുടർന്നിട്ടുണ്ട്. നിലവിൽ റെഗുലർ ട്രെയിനുകൾ കടത്തിവിടുന്നതിനാണ് മുൻഗണന നൽകുന്നത്. സിഗ്നൽ തകരാർ എപ്പോൾ പൂർണ്ണമായി പരിഹരിക്കുമെന്ന് കൃത്യമായ വിവരം ലഭിക്കാത്തത് യാത്രക്കാരെ ആശങ്കയിലാക്കുന്നു.
Summary: A technical failure in the railway signaling system between Kollam and Paravur disrupted train services on the Kerala Assembly Election day. The block instrument malfunctioned, leading to delays of over two to three hours. Trains like Ananthapuri Express and several passengers were affected, causing immense hardship to voters and commuters in the sweltering heat. Railway authorities are currently manually dispatching trains using memos while repair works continue.
