ന്യൂഡൽഹി: രാജ്യസഭയിലെ ആം ആദ്മി പാർട്ടിയുടെ ഡെപ്യൂട്ടി ലീഡറായി എംപി അശോക് മിത്തലിനെ നിയമിക്കാൻ ആവശ്യപ്പെട്ട് കത്ത്. നിലവിൽ ഈ പദവി വഹിച്ചിരുന്ന രാഘവ് ഛദ്ദയ്ക്ക് പകരമാണ് മിത്തലിന്റെ നിയമനം. ഇതുസംബന്ധിച്ച് പാർട്ടി നൽകിയ കത്തിൽ, ഇനിമുതൽ പാർട്ടിയുടെ ക്വാട്ടയിൽ സഭയിൽ സംസാരിക്കാൻ രാഘവ് ഛദ്ദയ്ക്ക് സമയം അനുവദിക്കരുതെന്നും പ്രത്യേകം ആവശ്യപ്പെട്ടിട്ടുണ്ട്.(AAP writes to Rajya Sabha Secretariat to remove Raghav Chadha as deputy leader)
പഞ്ചാബിൽ നിന്നുള്ള രാജ്യസഭാ എംപിയാണ് അശോക് മിത്തൽ. 2022 ഏപ്രിലിലാണ് അദ്ദേഹം സഭയിലേക്ക് തിരഞ്ഞെടുക്കപ്പെട്ടത്. നിലവിൽ പ്രതിരോധം, ധനകാര്യം തുടങ്ങിയ സുപ്രധാന പാർലമെന്ററി കമ്മിറ്റികളിൽ അദ്ദേഹം അംഗമാണ്. കഴിഞ്ഞ വർഷം പഹൽഗാം ഭീകരാക്രമണത്തിന് പിന്നാലെ ഡിഎംകെ എംപി കനിമൊഴിയുടെ നേതൃത്വത്തിൽ റഷ്യ, ലാത്വിയ, സ്ലോവേനിയ, ഗ്രീസ്, സ്പെയിൻ എന്നീ രാജ്യങ്ങൾ സന്ദർശിച്ച സർവ്വകക്ഷി സംഘത്തിലും മിത്തൽ അംഗമായിരുന്നു.
നിലവിൽ രാജ്യസഭയിൽ ആം ആദ്മി പാർട്ടിക്ക് 10 അംഗങ്ങളാണുള്ളത്. ഇതിൽ ഏഴ് പേർ പഞ്ചാബിൽ നിന്നുള്ളവരും മൂന്ന് പേർ ഡൽഹിയിൽ നിന്നുള്ളവരുമാണ്. പാർട്ടിക്കുള്ളിലെ ആഭ്യന്തര മാറ്റങ്ങളുടെ ഭാഗമായാണ് ഈ നീക്കമെന്നാണ് സൂചന. രാഘവ് ചദ്ദയെ മാറ്റി നിർത്താനുള്ള തീരുമാനം രാഷ്ട്രീയ വൃത്തങ്ങളിൽ വലിയ ചർച്ചകൾക്ക് വഴിവെച്ചിട്ടുണ്ട്.
