തിരുവനന്തപുരം: നിയമസഭാ തിരഞ്ഞെടുപ്പിൽ കെപിസിസി അധ്യക്ഷൻ സണ്ണി ജോസഫ് പേരാവൂർ മണ്ഡലത്തിൽ സ്ഥാനാർത്ഥിയായതോടെ, പാർട്ടിയുടെ അമരത്തേക്ക് പുതിയൊരാളെ കണ്ടെത്താനുള്ള നീക്കങ്ങൾ കോൺഗ്രസ് ഊർജിതമാക്കി. കെപിസിസി അധ്യക്ഷന്റെ താൽക്കാലിക ചുമതല മുതിർന്ന നേതാവ് ബെന്നി ബെഹനാൻ എംപിക്ക് നൽകാനാണ് നിലവിൽ ആലോചിക്കുന്നത് എന്നാണ് സൂചന.(Sunny Joseph to contest in Assembly elections, Benny Behanan to take charge as KPCC president? )
പേരാവൂർ മണ്ഡലത്തിൽ യുഡിഎഫ് സ്ഥാനാർത്ഥിയായി മത്സരിക്കുന്ന സണ്ണി ജോസഫിന് ശക്തമായ പോരാട്ടമാണ് നേരിടേണ്ടി വരുന്നത്. എൽഡിഎഫ് സ്ഥാനാർത്ഥിയായി മുൻ മന്ത്രി കെ.കെ. ശൈലജ ആണ് ഇവിടെ അദ്ദേഹത്തിന്റെ മുഖ്യ എതിരാളി.
ബെന്നി ബെഹനാനെ കൂടാതെ കൊടിക്കുന്നിൽ സുരേഷ് എംപിയുടെ പേരും അധ്യക്ഷ സ്ഥാനത്തേക്ക് പരിഗണിച്ചിരുന്നു. സ്ഥാനാർത്ഥി നിർണ്ണയത്തെച്ചൊല്ലി കോൺഗ്രസിനുള്ളിൽ ഗ്രൂപ്പ് തർക്കങ്ങൾ രൂക്ഷമായി തുടരുകയാണ്. കെ. സുധാകരനടക്കം അതൃപ്തിയിലാണ്.
