ന്യൂഡൽഹി: പ്രധാനമന്ത്രി നരേന്ദ്ര മോദിയുടെ ഇസ്രായേൽ സന്ദർശന വേളയിൽ ഇറാനെതിരായ സൈനിക നീക്കത്തെക്കുറിച്ച് ധാരണയുണ്ടായിരുന്നില്ലെന്ന് ഇന്ത്യയിലെ ഇസ്രായേൽ അംബാസഡർ റൂവൻ അസർ. സന്ദർശനം കഴിഞ്ഞ് പ്രധാനമന്ത്രി രാജ്യം വിട്ടതിന് തൊട്ടുപിന്നാലെയാണ് ആക്രമണത്തിനുള്ള അവസരം ഒത്തുവന്നതെന്ന് അഭിമുഖത്തിൽ അദ്ദേഹം വെളിപ്പെടുത്തി.(Israel envoy Reuven Azar on ‘right moment’ for strike on Iran)
പ്രധാനമന്ത്രി മോദി അവിടെയുള്ളപ്പോൾ ഓപ്പറേഷൻ ഉടൻ നടക്കുമെന്ന് ഇസ്രായേലിന് അറിയില്ലായിരുന്നു. അദ്ദേഹം പോയതിന് ശേഷം ശനിയാഴ്ച രാവിലെയാണ് സുരക്ഷാ മന്ത്രിസഭ ആക്രമണത്തിന് അംഗീകാരം നൽകിയത്. സന്ദർശന വേളയിൽ പ്രാദേശിക വികസനങ്ങളെക്കുറിച്ച് സംസാരിച്ചിരുന്നു. എന്നാൽ അന്ന് അറിവില്ലാത്ത ഒരു കാര്യത്തെക്കുറിച്ച് ഇന്ത്യയുമായി പങ്കുവെക്കാൻ കഴിയില്ലായിരുന്നുവെന്നും അദ്ദേഹം വ്യക്തമാക്കി.
ഏറെ നാളത്തെ നിരീക്ഷണത്തിന് ശേഷം ശരിയായ നിമിഷത്തിലാണ് ആക്രമണം ഉണ്ടായതെന്നും അദ്ദേഹം കൂട്ടിച്ചേർത്തു. സന്ദർശനം കഴിഞ്ഞ് രണ്ട് ദിവസത്തിന് ശേഷമാണ് അമേരിക്കയും ഇസ്രായേലും സംയുക്ത ആക്രമണം ആരംഭിച്ചത്. ഫെബ്രുവരി 26-ന് പ്രധാനമന്ത്രി നരേന്ദ്ര മോദിയും ബെഞ്ചമിൻ നെതന്യാഹുവും നടത്തിയ ചർച്ചകൾക്ക് പിന്നാലെ ഇന്ത്യയും ഇസ്രായേലും തമ്മിലുള്ള ബന്ധം തന്ത്രപരമായ പങ്കാളിത്തത്തിലേക്ക് ഉയർത്തിയിരുന്നു. ഇതിന്റെ ഭാഗമായി 17 സുപ്രധാന കരാറുകളിലാണ് ഇരുരാജ്യങ്ങളും ഒപ്പുവെച്ചത്.
ഇറാനിൽ നിന്ന് നേരിടുന്ന ഭീഷണികളെ നേരിടാൻ ഇസ്രായേൽ കോടിക്കണക്കിന് ഡോളർ ചെലവഴിച്ചിട്ടുണ്ടെന്ന് അംബാസഡർ പറഞ്ഞു. ഇറാന്റെ സൈനിക സംവിധാനത്തെയും ഭരണകൂടത്തെയും മനസ്സിലാക്കാൻ എല്ലാ മാർഗ്ഗങ്ങളും സ്വീകരിച്ചു. ഇറാന്റെ വ്യോമ പ്രതിരോധ സംവിധാനങ്ങളെ മറികടക്കാൻ ആവശ്യമായ അത്യാധുനിക സാങ്കേതികവിദ്യകളും സൈനിക ശേഷിയും ഇസ്രായേൽ വർഷങ്ങളായി വികസിപ്പിച്ചെടുത്തിട്ടുണ്ടെന്നും അദ്ദേഹം വിശദീകരിച്ചു.
