Follow on Google News
തിരുപ്പൂർ: അമിതമായ ജനത്തിരക്കിനെത്തുടർന്നും കടുത്ത ചൂട് മൂലം പ്രവർത്തകർ കുഴഞ്ഞുവീണതിനെത്തുടർന്നും തമിഴക വെട്രി കഴകം അധ്യക്ഷൻ വിജയ്യുടെ തിരുപ്പൂരിലെ പ്രചാരണ പരിപാടികൾ റദ്ദാക്കി. ചൊവ്വാഴ്ച നടത്താനിരുന്ന ആറ് കിലോമീറ്റർ നീളുന്ന റോഡ്ഷോയാണ് സുരക്ഷാ കാരണങ്ങളാൽ പോലീസ് നിർദ്ദേശപ്രകാരം വേണ്ടെന്നുവെച്ചത്.(Vijay’s roadshow in Tiruppur cancelled, 15 people collapse due to overcrowding and heat)
രാവിലെ 10 മണി മുതൽ തന്നെ വിജയ്യെ കാണാൻ വൻ ജനക്കൂട്ടം തടിച്ചുകൂടിയിരുന്നു. വൈകുന്നേരം 4 മണിക്ക് എത്തുമെന്ന് കരുതിയിരുന്ന വിജയ് 4.45-ഓടെയാണ് സ്ഥലത്തെത്തിയത്. കടുത്ത ചൂടിൽ 13 സ്ത്രീകളും രണ്ട് പുരുഷന്മാരും ബോധരഹിതരായി വീണു. ഇവരെ ഉടൻ തന്നെ സമീപത്തെ പ്രാഥമിക ആരോഗ്യ കേന്ദ്രങ്ങളിൽ പ്രവേശിപ്പിച്ചു. ഇവരുടെ നില നിലവിൽ തൃപ്തികരമാണ്.
കരൂരിൽ നടന്ന തിക്കിലും തിരക്കിലും പെട്ട് 41 പേർ മരിച്ച സംഭവത്തിന്റെ പശ്ചാത്തലത്തിൽ, സ്ഥിതിഗതികൾ വഷളാകുന്നത് തടയാൻ വിജയ് തന്നെ ഇടപെട്ട് പ്രസംഗം ഒഴിവാക്കുകയായിരുന്നു. പെരുമാനെല്ലൂർ ഫോർ റോഡ് ജങ്ഷനിലെ പരിപാടിക്ക് ശേഷം പൂളുവപ്പട്ടിയിലേക്കായിരുന്നു റോഡ്ഷോ നിശ്ചയിച്ചിരുന്നത്. എന്നാൽ പെരുമാനെല്ലൂർ-തിരുപ്പൂർ പാതയിൽ പ്രവർത്തകർ നിറഞ്ഞതോടെ ഗതാഗതം പൂർണ്ണമായും സ്തംഭിച്ചു. തിരക്ക് നിയന്ത്രിക്കാൻ കഴിയില്ലെന്ന് വ്യക്തമായതോടെ പോലീസ് റോഡ്ഷോയ്ക്ക് അനുമതി നിഷേധിച്ചു. തുടർന്ന് സേലം-കൊച്ചി ദേശീയപാത വഴി വിജയ് കോയമ്പത്തൂരിലേക്ക് തിരിച്ചു.
