പ്യോങ്യാങ്: ചൈനീസ് പ്രസിഡന്റ് ഷി ജിൻപിങ് രണ്ട് ദിവസത്തെ ഔദ്യോഗിക സന്ദർശനത്തിനായി ഉത്തര കൊറിയൻ തലസ്ഥാനമായ പ്യോങ്യാങ്ങിൽ എത്തി (Xi Jinping North Korea Visit). ഏഴ് വർഷത്തെ നീണ്ട ഇടവേളയ്ക്ക് ശേഷമാണ് ഒരു ചൈനീസ് ഭരണാധികാരി ഉത്തര കൊറിയ സന്ദർശിക്കുന്നത്. പ്യോങ്യാങ് വിമാനത്താവളത്തിൽ ഇറങ്ങിയ ഷി ജിൻപിങ്ങിനെയും ഭാര്യ പെങ് ലിയുവാനെയും ഉത്തര കൊറിയൻ പരമാധികാരി കിം ജോങ് ഉന്നും ഭാര്യ റീ സോൾ ജുവും ചേർന്ന് നേരിട്ടെത്തി സ്വീകരിച്ചു. ഇരുരാജ്യങ്ങളും തമ്മിലുള്ള പരമ്പരാഗത സൗഹൃദം പുതുക്കുന്നതിനും ആഗോള രാഷ്ട്രീയ മാറ്റങ്ങൾക്കിടയിൽ ഉഭയകക്ഷി ബന്ധം ശക്തമാക്കുന്നതിനുമാണ് ഈ സന്ദർശനം.
വിമാനത്താവളത്തിൽ നിന്ന് കിം ഇൽ സുങ് സ്ക്വയറിലേക്ക് ഒൻപത് നിരകളായുള്ള വൻ മോട്ടോർ വാഹന വ്യൂഹത്തിന്റെ അകമ്പടിയോടെയാണ് ചൈനീസ് പ്രതിനിധി സംഘത്തെ ആനയിച്ചത്. പ്രധാന ചത്വരത്തിൽ 21 ഗൺ സല്യൂട്ടോടെയും സൈനിക ബാൻഡിന്റെ അകമ്പടിയോടെയും ചുവപ്പുനാട വിരിച്ചുള്ള വലിയ സ്വീകരണ ചടങ്ങുകളാണ് കിം ജോങ് ഉൻ ചൈനീസ് പ്രസിഡന്റിനായി ഒരുക്കിയത്. പരമ്പരാഗത കൊറിയൻ വസ്ത്രങ്ങളണിഞ്ഞ ആയിരക്കണക്കിന് തൊഴിലാളികളും സ്കൂൾ കുട്ടികളും ഇരുരാജ്യങ്ങളുടെയും പതാകകളേന്തി തെരുവുകളിൽ അണിനിരന്നു. ഇരു നേതാക്കളുടെയും ഭീമാകാരമായ ചിത്രങ്ങളും ‘ചൈന-ഉത്തര കൊറിയ ശാശ്വത സൗഹൃദം’ എന്ന് എഴുതിയ ബാനറുകളും നഗരത്തിലുടനീളം സ്ഥാപിച്ചിട്ടുണ്ട്.
റഷ്യയുമായി ഉത്തര കൊറിയ അടുത്ത കാലത്തായി സൈനിക സഹകരണം ശക്തമാക്കുന്ന പശ്ചാത്തലത്തിൽ, തങ്ങളുടെ ഏറ്റവും വലിയ സാമ്പത്തിക രക്ഷാകവചമായ ചൈനയുമായുള്ള ബന്ധത്തിന് ഇളക്കം തട്ടിയിട്ടില്ലെന്ന് വ്യക്തമാക്കാനാണ് കിം ജോങ് ഉൻ ഈ വിപുലമായ സ്വീകരണം ഒരുക്കിയതെന്നാണ് അന്താരാഷ്ട്ര നിരീക്ഷകർ വിലയിരുത്തുന്നത്. ചൈനീസ് വിദേശകാര്യമന്ത്രി വാങ് യി ഉൾപ്പെടെയുള്ള ഉന്നതതല സംഘം ഷി ജിൻപിങ്ങിനൊപ്പമുണ്ട്. സന്ദർശന വേളയിൽ കുംസുസാൻ സ്റ്റേറ്റ് ഗസ്റ്റ് ഹൗസിലാണ് ചൈനീസ് പ്രസിഡന്റും സംഘവും താമസിക്കുന്നത്.
Summary: Chinese President Xi Jinping received a lavish red-carpet welcome in Pyongyang as he commenced a highly anticipated two-day state visit to North Korea, marking his first trip to the isolated nation in nearly seven years. Xi and First Lady Peng Liyuan were personally greeted at the airport by North Korean leader Kim Jong Un and his wife Ri Sol Ju, before being escorted by a massive motorcade to Kim Il Sung Square for a formal 21-gun salute welcome ceremony.
