വാഷിംഗ്ടൺ: അമേരിക്കയിലേക്ക് കുടിയേറാൻ ആഗ്രഹിക്കുന്ന പ്രൊഫഷണലുകൾക്കും വിദ്യാർത്ഥികൾക്കും കനത്ത പ്രതിസന്ധി സൃഷ്ടിച്ചുകൊണ്ട് വിസ നിയമങ്ങൾ കർശനമാക്കാൻ ഒരുങ്ങി ട്രംപ് ഭരണകൂടം. യു.എസ് ഡിപ്പാർട്ട്മെന്റ് ഓഫ് ഹോംലാൻഡ് സെക്യൂരിറ്റി (DHS), ലേബർ ഡിപ്പാർട്ട്മെന്റ് എന്നിവ പുറത്തുവിട്ട പുതിയ നിയന്ത്രണ അജണ്ടയിലാണ് ഇത് സംബന്ധിച്ച വ്യക്തമായ സൂചനകളുള്ളത്. എച്ച്-1ബി വിസ (H-1B), എൽ-1 വിസ, സ്റ്റുഡന്റ് വിസ എന്നിവയെ ലക്ഷ്യമിട്ടുള്ള പരിഷ്കാരങ്ങൾ അമേരിക്കയിലെ ഏറ്റവും വലിയ കുടിയേറ്റ സമൂഹങ്ങളിലൊന്നായ ഇന്ത്യക്കാരെയാണ് ഏറ്റവും കൂടുതൽ ബാധിക്കുക.(Trump administration proposes stricter US immigration rules targeting H1B and student visas)
ഐടി പ്രൊഫഷണലുകൾ ഉൾപ്പെടെയുള്ള വിദേശ വിദഗ്ധരെ നിയമിക്കാൻ യു.എസ് കമ്പനികൾ ഉപയോഗിക്കുന്ന എച്ച്-1ബി വിസ പ്രോഗ്രാമിൽ ഓഗസ്റ്റ് മാസത്തോടെ വലിയ മാറ്റങ്ങൾ വരുത്താനാണ് ഹോംലാൻഡ് സെക്യൂരിറ്റി വിഭാഗം ലക്ഷ്യമിടുന്നത്. ഇന്ത്യൻ ഐടി കമ്പനികൾ വ്യാപകമായി ഉപയോഗിക്കുന്ന തേർഡ് പാർട്ടി പ്ലേസ്മെന്റ് മാതൃകയ്ക്ക് പുതിയ നിയമം കടുത്ത വെല്ലുവിളിയാകും. ജീവനക്കാരെ ക്ലയന്റ് സൈറ്റുകളിൽ നിയമിക്കുന്ന കമ്പനികൾ ഇനി മുതൽ കൂടുതൽ രേഖകൾ ഹാജരാക്കേണ്ടി വരും.
ഇതിനുപുറമെ വിസ കാലാവധി നീട്ടുന്നതിനുള്ള അപേക്ഷകൾക്ക് വലിയ കമ്പനികൾ ഇനി മുതൽ അധിക ഫീസ് നൽകേണ്ടി വരും. 50-ലധികം ജീവനക്കാരുള്ളതും അതിൽ പകുതിയിലധികം പേർ എച്ച്-1ബി അല്ലെങ്കിൽ എൽ-1 വിസക്കാരുമായ ഔട്ട്സോഴ്സിങ് കമ്പനികൾക്കാണ് ഈ സാമ്പത്തിക ബാധ്യത വരിക. ഗ്രീൻ കാർഡ് സ്പോൺസർഷിപ്പിനുള്ള കുറഞ്ഞ ശമ്പള നിരക്ക് വർദ്ധിപ്പിക്കാനും ലേബർ ഡിപ്പാർട്ട്മെന്റ് നിർദ്ദേശിക്കുന്നുണ്ട്.
അമേരിക്കയിലെ അന്താരാഷ്ട്ര വിദ്യാർത്ഥികളിൽ ഭൂരിഭാഗവും ഇന്ത്യക്കാരാണ്. നിലവിലെ നിയമപ്രകാരം വിദ്യാർത്ഥികൾക്ക് കോഴ്സ് കാലാവധി തീരുന്നത് വരെ വിസ പുതുക്കാതെ രാജ്യത്ത് തുടരാം. എന്നാൽ പുതിയ പരിഷ്കാരം വഴി വിദ്യാർത്ഥികൾക്ക് നിശ്ചിത കാലാവധിയുള്ള വിസ മാത്രമേ അനുവദിക്കൂ. ഇത് കഴിഞ്ഞാൽ രാജ്യത്ത് തുടരുന്നതിനായി പ്രത്യേകം അപേക്ഷ നൽകി അനുമതി വാങ്ങേണ്ടി വരും. വിദ്യാഭ്യാസം പൂർത്തിയാക്കിയ ശേഷം അമേരിക്കയിൽ ജോലി ചെയ്യാൻ വിദ്യാർത്ഥികളെ അനുവദിക്കുന്ന ഓപ്ഷണൽ പ്രാക്ടിക്കൽ ട്രെയിനിങ്, കരിക്കുലർ പ്രാക്ടിക്കൽ ട്രെയിനിങ് എന്നിവയുടെ നിയമങ്ങളും വരും വർഷങ്ങളിൽ കർശനമാക്കാൻ ഭരണകൂടം ആലോചിക്കുന്നുണ്ട്.
എച്ച്-1ബി വിസക്കാരുടെ പങ്കാളികൾക്ക് നൽകുന്ന എച്ച്-4 (H-4) വിസക്കാരുടെ തൊഴിൽ അനുമതി പത്രത്തിന്റെ കാലാവധി തനിയെ നീട്ടിനൽകുന്ന താത്കാലിക സംവിധാനം ഈ മാസം അവസാനത്തോടെ നിർത്തലാക്കും. ഇതോടെ ഗ്രീൻ കാർഡിനായി കാത്തിരിക്കുന്ന ആയിരക്കണക്കിന് ഇന്ത്യൻ വംശജരായ ദമ്പതികൾക്ക്, പുതുക്കൽ നടപടികളിലെ താമസം മൂലം താൽക്കാലികമായി ജോലി നഷ്ടപ്പെടുന്ന സാഹചര്യം ഉണ്ടായേക്കാം. ഈ നിർദ്ദേശങ്ങൾ പൂർണ്ണമായും നിയമമായി മാറിയിട്ടില്ലെങ്കിലും, വരും മാസങ്ങളിൽ യു.എസ് കുടിയേറ്റ രംഗത്ത് വരാനിരിക്കുന്ന കടുത്ത നിയന്ത്രണങ്ങളുടെ വ്യക്തമായ സൂചനയാണിത്.
Story Summary
The Trump administration is proposing stricter US immigration rules targeting H-1B, L-1, and student visas, which could significantly impact Indian professionals and students. The planned updates include higher minimum wage requirements for sponsorship, fixed periods of stay for students, and the termination of automatic extensions for H-4 dependent work permits.
