കുട്ടികളുടെ താൽപര്യങ്ങളും കുടുംബത്തിന്റെ ദിവസേനയുള്ള പരിപാടികളും ഉൾപ്പെടുത്തി ചാറ്റ്ജിപിടി വഴി വ്യക്തിഗത പോഡ്കാസ്റ്റുകൾ തയ്യാറാക്കാമെന്ന ഓപ്പൺഎഐ സിഇഒ സാം ആൾട്ട്മാന്റെ നിർദേശം സോഷ്യൽ മീഡിയയിൽ ചർച്ചയാക്കുന്നു (Sam Altman ChatGPT podcast idea). ആശയത്തെ ചിലർ സൃഷ്ടിപരമായ എഐ ഉപയോഗമെന്ന് വിശേഷിപ്പിച്ചപ്പോൾ, മാതാപിതാക്കളും കുട്ടികളും തമ്മിലുള്ള പ്രധാനപ്പെട്ട ആശയവിനിമയത്തിന് പകരമായി സാങ്കേതികവിദ്യ മാറുമോയെന്ന ആശങ്കയും മറ്റുചിലർ ഉയർത്തി.
സ്കൂളിലേക്ക് കുട്ടികളെ കൊണ്ടുപോകുന്ന രാവിലെ യാത്രയിൽ കുടുംബങ്ങൾക്ക് ചാറ്റ്ജിപിടി ഉപയോഗിക്കാവുന്ന ഒരു മാർഗത്തെക്കുറിച്ചാണ് ആൾട്ട്മാൻ എക്സിൽ പങ്കുവെച്ചത്. കുടുംബത്തിന്റെ കലണ്ടർ ചാറ്റ്ജിപിടിയുമായി ബന്ധിപ്പിക്കുകയും കുട്ടികളുടെ ഇഷ്ടങ്ങളെയും താൽപര്യങ്ങളെയും കുറിച്ചുള്ള വിവരങ്ങൾ നൽകുകയും ചെയ്താൽ, ഓരോ ദിവസവും കുടുംബത്തിന് അനുയോജ്യമായ പോഡ്കാസ്റ്റ് എഐയ്ക്ക് തയ്യാറാക്കാമെന്നായിരുന്നു നിർദേശം.
കുട്ടിയുടെ അന്നത്തെ ഫുട്ബോൾ മത്സരം, വരാനിരിക്കുന്ന പിറന്നാൾ, പ്രധാന വാർത്തകൾ, കുടുംബവുമായി ബന്ധപ്പെട്ട മറ്റ് പരിപാടികൾ തുടങ്ങിയ വിഷയങ്ങൾ പോഡ്കാസ്റ്റിൽ ഉൾപ്പെടുത്താമെന്നും അദ്ദേഹം വ്യക്തമാക്കി. കുട്ടികൾക്ക് പ്രസക്തമായ വിവരങ്ങൾ കൂടുതൽ വ്യക്തിഗതവും ആകർഷകവുമായ രീതിയിൽ അവതരിപ്പിക്കാൻ ഇത് സഹായിക്കുമെന്നാണ് ആശയത്തെ പിന്തുണച്ചവരുടെ വിലയിരുത്തൽ.
എന്നാൽ ഈ നിർദേശത്തിനെതിരെ നിരവധി പേർ വിമർശനവുമായി രംഗത്തെത്തി. സ്കൂളിലേക്കുള്ള യാത്രയ്ക്കിടെ മാതാപിതാക്കളും കുട്ടികളും തമ്മിൽ നടത്തുന്ന സംഭാഷണങ്ങൾക്ക് പകരം എഐ ഉള്ളടക്കം വരുന്നത് കുടുംബബന്ധങ്ങളെയും നേരിട്ടുള്ള ആശയവിനിമയത്തെയും ബാധിക്കുമെന്നാണ് വിമർശകരുടെ പ്രധാന വാദം.
“എഐയ്ക്ക് നമ്മുടെ സാമൂഹിക ഇടപെടലുകൾ പോലും ഏറ്റെടുക്കാമെന്നാണോ പറയുന്നത്?” എന്ന തരത്തിലുള്ള പ്രതികരണങ്ങളും പോസ്റ്റിന് ലഭിച്ചു. കുട്ടികളുമായി സംസാരിക്കാനും അവരുടെ ദിവസത്തെക്കുറിച്ച് ചോദിച്ചറിയാനും മാതാപിതാക്കൾക്ക് ലഭിക്കുന്ന സമയം സാങ്കേതികവിദ്യയ്ക്ക് കൈമാറരുതെന്നും ചിലർ അഭിപ്രായപ്പെട്ടു.
അതേസമയം, എഐ പോഡ്കാസ്റ്റിനെ മാതാപിതാക്കളും കുട്ടികളും തമ്മിലുള്ള സംഭാഷണത്തിന് പകരമായല്ല, മറിച്ച് കുടുംബ ചർച്ചകൾക്ക് തുടക്കമിടുന്ന ഒരു സഹായ ഉപകരണമായി ഉപയോഗിക്കാമെന്ന വാദവും ഉയർന്നിട്ടുണ്ട്. വ്യക്തിഗത വിവരങ്ങൾ ഉപയോഗിച്ച് എഐ ഉള്ളടക്കം സൃഷ്ടിക്കുന്നതുമായി ബന്ധപ്പെട്ട സ്വകാര്യതാ ആശങ്കകളും ചർച്ചയുടെ ഭാഗമായി.
Summary: OpenAI CEO Sam Altman suggested that ChatGPT could create personalised daily podcasts for children using family calendars and information about their interests. While some praised the idea as an innovative use of AI, critics argued that it could reduce meaningful conversations between parents and children.
