കീവ്: ഉക്രെയ്ൻ തലസ്ഥാനമായ കീവിൽ റഷ്യ നടത്തിയ അതിശക്തമായ മിസൈൽ, ഡ്രോൺ ആക്രമണത്തിൽ എട്ടുപേർ കൊല്ലപ്പെട്ടു. നിരവധി പേർക്ക് പരിക്കേറ്റതായാണ് റിപ്പോർട്ടുകൾ (Russia Massive Strike Kyiv). കീവിലെ ഏകദേശം മൂന്നര ഡസനോളം സ്ഥലങ്ങളിലാണ് റഷ്യൻ സൈന്യം ആക്രമണം നടത്തിയത്. നഗരത്തിലെ ഒമ്പത് നില കെട്ടിടത്തിൽ ആളുകൾ കുടുങ്ങിക്കിടക്കുന്നതായും, മറ്റൊരു ഉയർന്ന കെട്ടിടത്തിന്റെ വലിയൊരു ഭാഗം ആക്രമണത്തിൽ തകർന്ന് വീണതായും കീവ് മേയർ വിറ്റാലി ക്ലിച്ച്കോ അറിയിച്ചു. നഗരത്തിന്റെ മധ്യ, കിഴക്കൻ മേഖലകളിൽ ഡസൻ കണക്കിന് സ്ഫോടനങ്ങൾ കേട്ടതായി മാധ്യമപ്രവർത്തകർ റിപ്പോർട്ട് ചെയ്തു.
രാജ്യത്ത് റഷ്യ വൻ ആക്രമണം നടത്താൻ സാധ്യതയുണ്ടെന്ന് പ്രസിഡന്റ് വൊളോഡിമിർ സെലെൻസ്കി മുന്നറിയിപ്പ് നൽകി മണിക്കൂറുകൾക്കുള്ളിലാണ് ആക്രമണം ഉണ്ടായത്. അയർലൻഡ് സന്ദർശനം പാതിവഴിയിൽ ഉപേക്ഷിച്ച് അദ്ദേഹം ഉക്രെയ്നിലേക്ക് മടങ്ങിയിരുന്നു. റഷ്യൻ പ്രസിഡന്റ് വ്ളാഡിമിർ പുടിൻ കുറച്ചുനാളായി ഇതിനായുള്ള തയ്യാറെടുപ്പുകൾ നടത്തുകയാണെന്നും, ജനങ്ങൾ ജാഗ്രത പാലിക്കണമെന്നും സെലെൻസ്കി അഭ്യർത്ഥിച്ചിരുന്നു. ആക്രമണ ഭീഷണി നിലനിൽക്കുന്നതിനാൽ ജനങ്ങളോട് സുരക്ഷിതമായ സ്ഥലങ്ങളിൽ അഭയം പ്രാപിക്കാൻ അധികൃതർ നിർദ്ദേശം നൽകി.
റഷ്യൻ ആക്രമണങ്ങൾ ഭയന്ന് തലസ്ഥാന നഗരിയിലെ ജനങ്ങൾ മെട്രോ സ്റ്റേഷനുകളിലും മറ്റും അഭയം തേടി. ആക്രമണത്തെ നേരിടാൻ ഉക്രേനിയൻ സൈന്യം ശ്രമം തുടരുന്നതിനിടയിലാണ് കീവിൽ വൻ നാശനഷ്ടങ്ങളുണ്ടായത്. അയൽരാജ്യമായ പോളണ്ട് മുൻകരുതൽ നടപടിയായി തങ്ങളുടെ യുദ്ധവിമാനങ്ങളെ സജ്ജമാക്കിയിരുന്നു. 2022 ഫെബ്രുവരിയിൽ ആരംഭിച്ച യുദ്ധം അവസാനിപ്പിക്കാൻ ഉക്രെയ്ൻ ശ്രമങ്ങൾ നടത്തിയിട്ടും, റഷ്യ ആക്രമണം തുടരുകയാണെന്ന് സെലെൻസ്കി കുറ്റപ്പെടുത്തി. യുറോപ്പിനെ മൊത്തത്തിൽ ബാധിക്കുന്ന രീതിയിൽ പുടിൻ കൂടുതൽ ആക്രമണങ്ങൾക്ക് മുതിരുകയാണെന്നും അദ്ദേഹം ആരോപിച്ചു.
Summary: At least eight people were killed and dozens injured in a massive Russian missile and drone attack on Kyiv, which occurred shortly after President Volodymyr Zelenskyy warned of an imminent strike. Zelenskyy cut short his visit to Ireland to return to Ukraine, urging citizens to seek shelter as the capital faced strikes targeting over three dozen locations. Amid the devastation, including collapsed buildings and trapped civilians, Zelenskyy accused Putin of escalating aggression and refusing to pursue meaningful negotiations to end the war.
