ജനീവ: പാകിസ്ഥാൻ സൈനിക മേധാവി ഫീൽഡ് മാർഷൽ അസിം മുനീറിനെയും അദ്ദേഹത്തിന്റെ സംഘത്തെയും ജനീവയിൽ വെച്ച് വധിക്കാൻ ഇസ്രയേലിന്റെ രഹസ്യാന്വേഷണ ഏജൻസിയായ മൊസാദ് പദ്ധതിയിട്ടിരുന്നുവെന്ന ഞെട്ടിക്കുന്ന വെളിപ്പെടുത്തലുമായി ബ്രസീലിയൻ ജിയോപൊളിറ്റിക്കൽ അനലിസ്റ്റ് പെപ്പെ എസ്കോബാർ. അമേരിക്കയും ഇറാനും തമ്മിലുള്ള സമാധാന ചർച്ചകളിൽ മധ്യസ്ഥത വഹിക്കുന്നതിനിടെയാണ് പാകിസ്ഥാൻ സംഘത്തിന് നേരെ ഇത്തരമൊരു നീക്കമുണ്ടായതെന്ന് ഇദ്ദേഹം അവകാശപ്പെടുന്നു. എന്നാൽ, ഈ വാദങ്ങളെ പാകിസ്ഥാനിലെ മുതിർന്ന മാധ്യമപ്രവർത്തകർ ശക്തമായി തള്ളിക്കളഞ്ഞു.(Mossad Plot Against Asim Munir Claim Rejected)
ഒരു പോഡ്കാസ്റ്റ് അഭിമുഖത്തിലാണ് പെപ്പെ എസ്കോബാർ ഇത്തരമൊരു ഗുരുതര ആരോപണം ഉന്നയിച്ചത്. സ്വിറ്റ്സർലൻഡിൽ നടന്ന ഉന്നതതല ചർച്ചകളിൽ പങ്കെടുക്കവെ അസിം മുനീറിനെ വധിക്കാൻ ബെഞ്ചമിൻ നെതന്യാഹുവിന്റെ നിർദ്ദേശപ്രകാരം മൊസാദ് പദ്ധതി തയ്യാറാക്കിയെന്നും, ഇതിനെക്കുറിച്ച് പാക് രഹസ്യാന്വേഷണ ഏജൻസികൾക്ക് വ്യക്തമായ വിവരം ലഭിച്ചിരുന്നുവെന്നുമാണ് എസ്കോബാർ പറയുന്നത്.
ഈ വിവരം ലഭിച്ച ഉടൻ തന്നെ പാകിസ്ഥാൻ ഒമാൻ പോലുള്ള നയതന്ത്ര ചാനലുകൾ വഴി ഇസ്രയേലിന് കടുത്ത മുന്നറിയിപ്പ് നൽകിയെന്നും അദ്ദേഹം അവകാശപ്പെടുന്നു. “ഞങ്ങളുടെ പ്രതിനിധി സംഘത്തെ തൊട്ടാൽ ഇസ്രയേലിനെ ഭൂപടത്തിൽ നിന്ന് തന്നെ തുടച്ചുനീക്കും” എന്ന് പാകിസ്ഥാൻ വ്യക്തമാക്കിയതായും ഇദ്ദേഹം അവകാശപ്പെടുന്നു. എന്നാൽ, എസ്കോബാറിന്റെ ഈ വെളിപ്പെടുത്തലുകൾക്ക് യാതൊരുവിധ തെളിവുകളുമില്ലെന്നും വെറും കെട്ടുകഥയാണെന്നും പാകിസ്ഥാനിലെ മാധ്യമപ്രവർത്തകർ പ്രതികരിച്ചു. മുതിർന്ന മാധ്യമപ്രവർത്തകൻ സയ്യിദ് തലത്ത് ഹുസൈൻ ഉൾപ്പെടെയുള്ളവർ ഈ ആരോപണത്തെ “അസംബന്ധം” എന്നാണ് വിശേഷിപ്പിച്ചത്. പാക് സൈനിക വൃത്തങ്ങൾ ഈ വാർത്തയെ “ദുരുദ്ദേശ്യപരമായ പ്രചാരണം” എന്നാണ് തള്ളിക്കളയുന്നത്. പാക് സർക്കാരോ ഇസ്രയേൽ ഭരണകൂടമോ ഈ വിഷയത്തിൽ ഔദ്യോഗികമായി പ്രതികരിച്ചിട്ടില്ല.
ഇറാനും അമേരിക്കയും തമ്മിലുള്ള മധ്യസ്ഥ ചർച്ചകളിൽ പാകിസ്ഥാൻ വഹിക്കുന്ന പങ്കിനെ ഇസ്രയേൽ നേരത്തെ വിമർശിച്ചിരുന്നു. പാക് പ്രതിരോധ മന്ത്രി ഖ്വാജ ആസിഫ് ഇസ്രയേലിനെതിരെ രൂക്ഷമായ പരാമർശങ്ങൾ നടത്തിയതും ഇരുരാജ്യങ്ങളും തമ്മിലുള്ള നയതന്ത്ര ഭിന്നത വർദ്ധിപ്പിച്ചിരുന്നു.
Story Summary
A Brazilian analyst has claimed that the Israeli intelligence agency Mossad plotted to assassinate Pakistan’s Army Chief Asim Munir during diplomatic talks in Geneva, an allegation that has been strongly rejected by Pakistani journalists and officials. Experts and media personnel in Pakistan have dismissed the report as baseless propaganda, noting that no official government statements have confirmed such an incident.
