കീവ്: റഷ്യൻ അധിനിവേശ കിഴക്കൻ ഉക്രെയ്നിലെ ആക്രമണങ്ങൾക്ക് പ്രതികാരമായി ഉക്രെയ്ൻ തലസ്ഥാനമായ കീവിൽ പ്രളയസമാനമായ വൻ വ്യോമാക്രമണം അഴിച്ചുവിട്ട് റഷ്യ (Kyiv Hypersonic Missile Attack Oreshnik Russia). കഴിഞ്ഞ ഏതാനും ആഴ്ചകൾക്കിടയിൽ രാജ്യം സാക്ഷ്യം വഹിച്ചതിൽ വെച്ച് ഏറ്റവും ഭീകരമായ രാത്രികാല ബോംബാക്രമണമാണ് കീവിലും പരിസര പ്രദേശങ്ങളിലും ഉണ്ടായത്. ഏകദേശം 600 ഡ്രോണുകളും 90 മിസൈലുകളും ഉപയോഗിച്ചാണ് റഷ്യൻ സേന കീവിനെ ലക്ഷ്യമിട്ടതെന്ന് ഉക്രെയ്ൻ ഔദ്യോഗിക വൃത്തങ്ങൾ സ്ഥിരീകരിച്ചു. ഇതിൽ വലിയൊരു പങ്ക് വ്യോമപ്രതിരോധ സംവിധാനങ്ങൾ വെടിവെച്ചിട്ടെങ്കിലും പല മിസൈലുകളും നഗര ഹൃദയത്തിൽ പതിക്കുകയായിരുന്നു. ആക്രമണത്തിൽ ലൂകിയാനിവ്സ്ക മെട്രോ സ്റ്റേഷന് സമീപമുള്ള ബിസിനസ്സ് കേന്ദ്രവും മാർക്കറ്റും പൂർണ്ണമായി തകർന്നു. മുൻപ് നടന്ന റഷ്യൻ ആക്രമണങ്ങൾക്ക് ശേഷം ആറ് തവണ പുനർനിർമ്മിച്ച് തുറന്ന ഒരു ചെറിയ കഫേയും ഇത്തവണത്തെ മിസൈൽ പതനത്തിൽ പൂർണ്ണമായി ഇല്ലാതായിട്ടുണ്ട്.
ആക്രമണത്തിൽ നാല് പേർ കൊല്ലപ്പെടുകയും നിരവധി പേർക്ക് ഗുരുതരമായി പരിക്കേൽക്കുകയും ചെയ്തു. ജനവാസ മേഖലകൾ, വിദ്യാലയങ്ങൾ, മാർക്കറ്റുകൾ, വാണിജ്യ സമുച്ചയങ്ങൾ എന്നിവയ്ക്ക് വ്യാപകമായ നാശനഷ്ടമാണ് സംഭവിച്ചിട്ടുള്ളത്. ആക്രമണം ശക്തമായതോടെ ജീവൻ രക്ഷിക്കാനായി നഗരവാസികൾ കൂട്ടത്തോടെ മെട്രോ സ്റ്റേഷനുകളിലെ ഭൂഗർഭ ബങ്കറുകളിലേക്ക് അഭയം തേടി. സാധാരണ ജനങ്ങളെയും ജനവാസ കേന്ദ്രങ്ങളെയും ലക്ഷ്യമിട്ടാണ് റഷ്യ ഈ ക്രൂരത കാട്ടിയതെന്ന് ഉക്രെയ്ൻ വിദേശകാര്യ മന്ത്രി ആൻഡ്രി സിബിഹ കുറ്റപ്പെടുത്തി.
കീവിന് പുറമെ ചെർക്കാസി, ഖാർകിവ്, ഒഡേസ, പോൾട്ടാവ, സുമി തുടങ്ങിയ മേഖലകളിലും റഷ്യൻ മിസൈലുകൾ പതിച്ചിട്ടുണ്ട്. ഭൂഗർഭ ബങ്കറുകളെപ്പോലും തകർക്കാൻ ശേഷിയുള്ള, ശബ്ദത്തേക്കാൾ പത്തിരട്ടി വേഗത്തിൽ സഞ്ചരിക്കുന്ന ‘ഒരേഷ്നിക്ക്’ എന്ന മാരകമായ ഹൈപ്പർസോണിക് ബാലിസ്റ്റിക് മിസൈലുകൾ റഷ്യ ഈ ആക്രമണത്തിൽ പ്രയോഗിച്ചതായി ഉക്രെയ്ൻ പ്രസിഡന്റ് വൊളോഡിമിർ സെലൻസ്കി വ്യക്തമാക്കി. എന്നാൽ തങ്ങൾ ഉക്രെയ്ന്റെ സൈനിക കമാൻഡ് സെന്ററുകളും വ്യോമതാവളങ്ങളുമാണ് തകർത്തതെന്നാണ് റഷ്യൻ പ്രതിരോധ മന്ത്രാലയത്തിന്റെ അവകാശവാദം.
Summary: Russia launched a massive and devastating overnight attack on Ukraine’s capital Kyiv, firing around 600 drones and 90 missiles. Ukrainian President Volodymyr Zelenskyy confirmed that Russia deployed the powerful Oreshnik hypersonic ballistic missile, causing widespread destruction to civilian infrastructure including markets and schools. While Kyiv reported four deaths and dozens of injuries among civilians, the Russian Defense Ministry claimed the strikes targeted military command facilities and airbases.
