ന്യൂഡൽഹി: കഴിഞ്ഞ മൂന്ന് മാസമായി തുടരുന്ന പശ്ചിമേഷ്യൻ യുദ്ധത്തിന് അന്ത്യം കുറിച്ചുകൊണ്ട് അമേരിക്കയും ഇറാനും തമ്മിലുള്ള ചരിത്രപരമായ സമാധാനക്കരാർ ഏതാനും മണിക്കൂറുകൾക്കകം പ്രഖ്യാപിച്ചേക്കുമെന്ന് യു.എസ് വിദേശകാര്യ സെക്രട്ടറി മാർക്കോ റൂബിയോ (Marco Rubio on US Iran Peace Deal). നാല് ദിവസത്തെ ഔദ്യോഗിക സന്ദർശനത്തിനായി ഇന്ത്യയിലെത്തിയ അദ്ദേഹം, വിദേശകാര്യ മന്ത്രി എസ്. ജയശങ്കറുമായി നടത്തിയ സംയുക്ത വാർത്താസമ്മേളനത്തിലാണ് ലോകത്തിന് ഉടൻ തന്നെ ‘നല്ല വാർത്ത’ പ്രതീക്ഷിക്കാമെന്ന നിർണ്ണായക സൂചന നൽകിയത്. യു.എസ്-ഇസ്രായേൽ സംയുക്ത ആക്രമണത്തിന് മറുപടിയായി ഇറാൻ ഭാഗികമായി തടഞ്ഞിട്ടിരിക്കുന്ന തന്ത്രപ്രധാനമായ ഹോർമുസ് കടലിടുക്കിലെ പ്രതിസന്ധി പരിഹരിക്കാൻ ഈ കരാറിലൂടെ സാധിക്കുമെന്നും റൂബിയോ വ്യക്തമാക്കി. ഇറാന് ഒരിക്കലും ഒരു ആണവായുധം സ്വന്തമാക്കാൻ കഴിയില്ലെന്ന് ഉറപ്പാക്കുകയാണ് അമേരിക്കയുടെ അന്തിമ ലക്ഷ്യമെന്നും, അന്താരാഷ്ട്ര ജലപാതയിലൂടെയുള്ള വാണിജ്യ കപ്പലുകളെ ഇറാൻ ഭീഷണിപ്പെടുത്തുന്നത് അന്താരാഷ്ട്ര നിയമങ്ങളുടെ ലംഘനമാണെന്നും അദ്ദേഹം ഡൽഹിയിൽ ഓർമ്മിപ്പിച്ചു.
ഇസ്രായേൽ പ്രധാനമന്ത്രി ബെന്യാമിൻ നെതന്യാഹുവുമായും മറ്റ് പ്രാദേശിക സഖ്യകക്ഷികളുമായും നടത്തിയ ചർച്ചകൾക്ക് ശേഷം ഇറാനുമായുള്ള സമാധാനക്കരാർ ഏകദേശം പൂർത്തിയായതായി യു.എസ് പ്രസിഡന്റ് ഡൊണാൾഡ് ട്രംപ് നേരത്തെ വ്യക്തമാക്കിയിരുന്നു. കരാറിന്റെ അന്തിമ വിശദാംശങ്ങൾ ചർച്ച ചെയ്യുകയാണെന്നും ട്രംപ് തന്റെ ട്രൂത്ത് സോഷ്യൽ പ്ലാറ്റ്ഫോമിൽ കുറിച്ചു. ഈ സമാധാന ധാരണയുടെ ഭാഗമായി ഹോർമുസ് കടലിടുക്ക് വീണ്ടും തുറക്കുമെന്നും ട്രംപ് അവകാശപ്പെട്ടിരുന്നു. എന്നാൽ, ട്രംപിന്റെ ഈ അവകാശവാദങ്ങളെ തള്ളിക്കൊണ്ട് ഇറാന്റെ റെവല്യൂഷണറി ഗാർഡ് രംഗത്തെത്തിയിട്ടുണ്ട്. ഹോർമുസ് കടലിടുക്കിന്റെ നിയന്ത്രണം ഇറാൻ തന്നെ നിലനിർത്തുമെന്നും, കപ്പലുകളുടെ ഗതാഗതം യുദ്ധത്തിന് മുൻപുള്ള അവസ്ഥയിലേക്ക് കൊണ്ടുവരാൻ മാത്രമേ സമ്മതിച്ചിട്ടുള്ളൂവെന്നും അവർ വ്യക്തമാക്കി. കൂടാതെ ട്രംപിന്റെ പ്രസ്താവന വെറും ‘പ്രചാരണം’ മാത്രമാണെന്നും ഈ ഘട്ടത്തിൽ ആണവ പദ്ധതികളെക്കുറിച്ച് യാതൊരു ചർച്ചയും നടന്നിട്ടില്ലെന്നും ഇറാൻ മാധ്യമങ്ങൾ റിപ്പോർട്ട് ചെയ്യുന്നു.
Summary: During his official visit to India, US Secretary of State Marco Rubio announced that a potential peace deal between the US and Iran could be reached shortly. US President Donald Trump stated that the historic agreement, which aims to reopen the blockade at the strategic Strait of Hormuz, has been largely negotiated with regional allies. However, Iran’s Revolutionary Guard dismissed Trump’s claims as propaganda, asserting that Tehran still holds control over the waterway and has made no commitments regarding its nuclear program.
