കീവ്: യുക്രെയ്ൻ തലസ്ഥാനമായ കീവിൽ റഷ്യ നടത്തിയ വ്യാപക ഡ്രോൺ-മിസൈൽ ആക്രമണത്തിൽ രണ്ട് പേർ കൊല്ലപ്പെട്ടു. അഞ്ച് ആരോഗ്യ പ്രവർത്തകരടക്കം പതിനാറിലധികം പേർക്ക് പരിക്കേറ്റു. വ്യാഴാഴ്ച പുലർച്ചെ നഗരമധ്യത്തിലെ പ്രമുഖ ഹോട്ടലുകളും പാർപ്പിട സമുച്ചയങ്ങളും ലക്ഷ്യമിട്ടായിരുന്നു ആക്രമണം.(Kyiv Attack, Russia Launches Massive Drone And Missile Attack On Kyiv)
മണിക്കൂറുകളോളം നീണ്ടുനിന്ന വ്യോമാക്രമണത്തിൽ കീവിലെ പത്ത് ജില്ലകൾക്ക് നാശനഷ്ടങ്ങൾ സംഭവിച്ചു. പ്രീമിയർ പാലസ്, സിറ്റിഹോട്ടൽ റെസിഡൻസ് തുടങ്ങിയ ഹോട്ടലുകൾ സ്ഥിതി ചെയ്യുന്ന ഷെവ്ചെങ്കോ ബോളിവാർഡ് മേഖലയിൽ ഡ്രോൺ പതിച്ച് വലിയ തീപിടുത്തമുണ്ടായി. ഹോട്ടലിന്റെ മുകൾഭാഗവും മേൽക്കൂരയും പൂർണ്ണമായും കത്തിയമർന്നു.
ഒരു അപ്പാർട്ട്മെന്റ് കെട്ടിടത്തിന്റെ ആറ് നിലകൾ പൂർണ്ണമായും തകർന്നു വീണു. കീവ് ലക്ഷ്യമാക്കി എത്തിയ ഭൂരിഭാഗം ഡ്രോണുകളും വ്യോമപ്രതിരോധ സംവിധാനങ്ങൾ ഉപയോഗിച്ച് തകർത്തതായി മേയർ വിറ്റാലി ക്ലിറ്റ്ഷ്കോ അറിയിച്ചു. എന്നാൽ തകർന്നുവീണ ഡ്രോണുകളുടെ അവശിഷ്ടങ്ങൾ നഗരത്തിൽ വലിയ നാശനഷ്ടങ്ങൾക്കും തീപിടുത്തത്തിനും കാരണമായി.
സ്ഥലത്ത് അഗ്നിശമനസേനയും രക്ഷാപ്രവർത്തകരും യുദ്ധകാലാടിസ്ഥാനത്തിൽ രക്ഷാപ്രവർത്തനം തുടരുകയാണ്. ആക്രമണ മുന്നറിയിപ്പിനെ തുടർന്ന് ആയിരക്കണക്കിന് ആളുകൾ ഭൂഗർഭ മെട്രോ സ്റ്റേഷനുകളിലേക്ക് സുരക്ഷിതമായി മാറിയിരുന്നു. റഷ്യ വലിയൊരു ആക്രമണത്തിന് ഒരുങ്ങുന്നതായി മുന്നറിയിപ്പ് ലഭിച്ചതിനെ തുടർന്ന്, അയർലൻഡ് സന്ദർശനം പാതിവഴിയിൽ ഉപേക്ഷിച്ച് പ്രസിഡന്റ് വൊളോഡിമിർ സെലൻസ്കി യുക്രെയ്നിൽ തിരിച്ചെത്തിയിരുന്നു.
Story Summary
Russia launched a massive drone and missile assault on Kyiv early Thursday, killing two people and injuring at least sixteen, including five health workers. The attack caused widespread destruction, including severe damage to residential buildings and hotels in the city center. While Ukraine’s air defense systems intercepted most of the incoming projectiles, the resulting debris caused significant fire and structural damage across ten districts.
