ഗാസ: ഗാസ ഭൂപ്രദേശത്തിന്മേലുള്ള സൈനിക നിയന്ത്രണം ഗണ്യമായി വർദ്ധിപ്പിക്കുമെന്ന ഇസ്രായേൽ പ്രധാനമന്ത്രി ബെന്യാമിൻ നെതന്യാഹുവിന്റെ പ്രഖ്യാപനത്തിനെതിരെ കടുത്ത പ്രതിഷേധവുമായി ഹമാസും അന്താരാഷ്ട്ര സമൂഹവും രംഗത്ത് (Israel Gaza Border Expansion). കഴിഞ്ഞ ഒക്ടോബറിലുണ്ടാക്കിയ വെടിനിർത്തൽ കരാർ പ്രകാരം ഗാസയുടെ 53 ശതമാനം ഭാഗമായിരുന്നു ഇസ്രായേൽ സൈന്യത്തിന്റെ നിയന്ത്രണത്തിലുണ്ടായിരുന്നത്. എന്നാൽ ഇത് ഘട്ടങ്ങളായി 70 ശതമാനത്തിലേക്ക് വ്യാപിപ്പിക്കുമെന്നാണ് നെതന്യാഹു വെള്ളിയാഴ്ച വ്യക്തമാക്കിയത്.
ഇസ്രായേലിന്റെ ഈ നീക്കം പലസ്തീനികളെ കൂട്ടത്തോടെ ആട്ടിയോടിക്കാനും ഗാസയിൽ വംശീയ ശുദ്ധീകരണം നടത്താനുമുള്ള അപകടകരമായ നീക്കമാണെന്ന് ഹമാസ് ഭരണകൂടത്തിന്റെ മീഡിയ ഓഫീസ് തലവൻ ഇസ്മായിൽ അൽ തവാബ്ത കുറ്റപ്പെടുത്തി. നിലവിൽ വെടിനിർത്തൽ കരാറിലെ ‘മഞ്ഞരേഖ’ ലംഘിച്ച് ഇസ്രായേൽ ഏകദേശം 64 ശതമാനത്തോളം ഭാഗം ഇതിനകം തന്നെ തങ്ങളുടെ നിയന്ത്രണത്തിലാക്കിയിട്ടുണ്ടെന്നാണ് പുറത്തുവരുന്ന മാപ്പുകൾ സൂചിപ്പിക്കുന്നത്.
അന്താരാഷ്ട്ര സമാധാന ബോർഡിന്റെ മധ്യസ്ഥതയിൽ രൂപീകരിച്ച വെടിനിർത്തൽ കരാർ നിലവിലുണ്ടെങ്കിലും ഹമാസിന്റെ നിരായുധീകരണം, ഇസ്രായേൽ സൈന്യത്തിന്റെ പൂർണ്ണമായ പിന്മാറ്റം തുടങ്ങിയ തർക്കവിഷയങ്ങളിൽ ഇപ്പോഴും അന്തിമ തീരുമാനമായിട്ടില്ല. നഗരങ്ങളിൽ ഇസ്രായേൽ നടത്തുന്ന തുടർച്ചയായ ആക്രമണങ്ങളും കടുത്ത നിയന്ത്രണങ്ങളും കാരണം ഗാസയിലെ രണ്ട് ദശലക്ഷത്തിലധികം വരുന്ന ജനങ്ങൾ കടുത്ത ദുരിതത്തിലാണ്.
ഇസ്രായേൽ കൂടുതൽ പ്രദേശങ്ങൾ കൈക്കലാക്കുന്നതോടെ അഭയാർത്ഥി ക്യാമ്പുകളിൽ കഴിയുന്ന ജനങ്ങൾക്ക് ഇനി എങ്ങോട്ട് പോകണം എന്നറിയാത്ത അവസ്ഥയാണ്. അതിനിടെ, ഗാസയെ സ്ഥിരമായി വിഭജിക്കാനുള്ള ഏതൊരു നീക്കത്തെയും ശക്തമായി എതിർക്കുമെന്ന് ബ്രിട്ടൻ, ജർമ്മനി തുടങ്ങിയ യൂറോപ്യൻ രാജ്യങ്ങൾ വ്യക്തമാക്കിയിട്ടുണ്ട്. ഇസ്രായേലിൽ ഈ വർഷം നടക്കാനിരിക്കുന്ന പൊതുതിരഞ്ഞെടുപ്പിൽ വോട്ടർമാരെ സ്വാധീനിക്കാനും തന്റെ രാഷ്ട്രീയ പ്രതിച്ഛായ വർദ്ധിപ്പിക്കാനുമാണ് നെതന്യാഹു വെടിനിർത്തൽ ലംഘിച്ച് ഇത്തരം കടുത്ത നടപടികളിലേക്ക് കടക്കുന്നതെന്ന് രാഷ്ട്രീയ നിരീക്ഷകർ വിലയിരുത്തുന്നു.
Summary: Hamas has strongly condemned Israeli Prime Minister Benjamin Netanyahu’s announcement to expand military control over Gaza to 70%, calling it a dangerous escalation and a plan for ethnic cleansing. Despite an established ceasefire deal, critical disputes such as the disarmament of Hamas and full Israeli withdrawal remain unresolved, leaving over two million residents in dire humanitarian conditions. European nations including Britain and Germany have voiced deep concern, opposing any permanent division or further occupation of the Palestinian territory.
