കാലിഫോർണിയ: ആഡംബര കാറുകൾ കരടി ആക്രമിച്ചുവെന്ന് വരുത്തിത്തീർത്ത് ഇൻഷുറൻസ് തുക തട്ടാൻ ശ്രമിച്ച മൂന്ന് പേർക്ക് കോടതി തടവുശിക്ഷ വിധിച്ചു. കാലിഫോർണിയ സ്വദേശികളായ അൽഫിയ സുക്കർമാൻ, റൂബൻ തംറാസിയൻ, വാഹെ മുറാദ്ഖന്യൻ എന്നിവർക്കാണ് 180 ദിവസം (6 മാസം) ജയിൽശിക്ഷ വിധിച്ചത്. കേസിലെ നാലാം പ്രതിയായ അരരാത് ചിർകിനിയന്റെ വിചാരണ സെപ്റ്റംബറിൽ നടക്കും (Insurance Fraud California Bear Suit).
‘ഓപ്പറേഷൻ ബിയർ ക്ലോ’എന്ന് പേരിട്ട അന്വേഷണത്തിലൂടെയാണ് കാലിഫോർണിയ ഇൻഷുറൻസ് വകുപ്പ് പ്രതികളെ കുടുക്കിയത്. പ്രതികൾ സമർപ്പിച്ച വീഡിയോ ദൃശ്യങ്ങളിൽ കരടിയുടെ ചലനങ്ങൾ മനുഷ്യന്റേതിന് സമാനമാണെന്ന് ഇൻഷുറൻസ് ഇൻവെസ്റ്റിഗേറ്റർമാർക്ക് തോന്നിയതാണ് കേസിൽ വഴിത്തിരിവായത്. ആഡംബര കാറുകളായ റോൾസ് റോയ്സ് ഗോസ്റ്റ്, മെഴ്സിഡസ് ബെൻസ് തുടങ്ങിയവയ്ക്കുള്ളിൽ കരടി കയറി നാശനഷ്ടങ്ങൾ വരുത്തിയെന്നായിരുന്നു പ്രതികളുടെ പരാതി. എന്നാൽ വന്യജീവി വിദഗ്ധർ വീഡിയോ പരിശോധിച്ചപ്പോൾ അത് കരടി വേഷം ധരിച്ച മനുഷ്യനാണെന്ന് സ്ഥിരീകരിച്ചു. കൂടാതെ, കാലിഫോർണിയയിൽ 1920-കൾക്ക് ശേഷം തവിട്ട് കരടികളെ കണ്ടിട്ടില്ലെന്ന വസ്തുതയും പ്രതികൾക്ക് തിരിച്ചടിയായി.
പ്രതികളുടെ വീട്ടിൽ നടത്തിയ പരിശോധനയിൽ കൃത്രിമ നഖങ്ങളോട് കൂടിയ കരടി വേഷം പോലീസ് കണ്ടെടുത്തു. ഒരേ സ്ഥലത്ത് ഒരേ ദിവസം മൂന്ന് വ്യത്യസ്ത കമ്പനികളിലായി സമാനമായ പരാതികൾ നൽകിയതും തട്ടിപ്പ് വേഗത്തിൽ കണ്ടെത്താൻ സഹായിച്ചു. “ഇൻഷുറൻസ് തട്ടിപ്പ് ഗൗരവകരമായ കുറ്റകൃത്യമാണ്. ഇത് സാധാരണക്കാരുടെ ഇൻഷുറൻസ് പ്രീമിയം തുക വർദ്ധിക്കാൻ കാരണമാകുന്നു,” കാലിഫോർണിയ ഇൻഷുറൻസ് കമ്മീഷണർ റിക്കാർഡോ ലാറ പറഞ്ഞു. വിചിത്രമായ ഇത്തരം തട്ടിപ്പുകൾ മുൻപ് ശ്രദ്ധയിൽപ്പെട്ടിട്ടില്ലെന്ന് അന്വേഷണ ഉദ്യോഗസ്ഥരും വ്യക്തമാക്കി.
Summary: Three individuals in California were sentenced to 180 days in jail for an insurance fraud scheme dubbed “Operation Bear Claw.” The suspects used a human in a bear costume to damage luxury cars, including a Rolls Royce and two Mercedes, to claim insurance payouts. Investigators became suspicious of the “bear’s” human-like movements in the videos provided. Wildlife experts confirmed brown bears haven’t been in California for a century. Police later recovered the bear suit and fake claws from the suspects’ residence.
