ബ്യൂണസ് ഐറിസ്: പറന്നുയർന്ന വിമാനത്തിൽ നിന്നും ഇൻസ്ട്രക്ടർ താഴേക്ക് ചാടി ആത്മഹത്യ ചെയ്തതിനെ തുടർന്ന് നിയന്ത്രണം നഷ്ടപ്പെട്ട വിമാനം പൈലറ്റ് വിദ്യാർത്ഥിനി അത്ഭുതകരമായി നിലത്തിറക്കി. അർജന്റീനയിലെ മധ്യ പ്രവിശ്യയായ ടോളിഡോയിലാണ് സിനിമാക്കഥകളെ വെല്ലുന്ന ഞെട്ടിക്കുന്ന സംഭവം നടന്നത്. ഫ്ലൈറ്റ് ഇൻസ്ട്രക്ടറായ ലിയാൻഡ്രോ ആൻഡ്രേസ് ബെർട്ടാസോ (42) ആണ് പറക്കുന്ന വിമാനത്തിന്റെ വാതിൽ തുറന്ന് താഴേക്ക് ചാടി മരിച്ചത്. വിമാനത്തിലുണ്ടായിരുന്ന 22 വയസ്സുകാരിയായ റൊസാരിയോ എന്ന വിദ്യാർത്ഥിനിയാണ് വൻ ദുരന്തം ഒഴിവാക്കി വിമാനം സുരക്ഷിതമായി ലാൻഡ് ചെയ്തത്.(Flight Instructor Jumps From Moving Plane To His Death In Argentina Leaving Student To Land Safely)
ശനിയാഴ്ച ‘സെസ്ന 150’ എന്ന ചെറുവിമാനത്തിൽ പരിശീലന പറക്കൽ നടത്തുന്നതിനിടെയാണ് സംഭവം. വിമാനം ആകാശത്തുവെച്ച് പെട്ടെന്ന് ലിയാൻഡ്രോ തന്റെ ഹെഡ്സെറ്റും സീറ്റ് ബെൽറ്റും അഴിച്ചുമാറ്റുകയായിരുന്നു. പരിഭ്രാന്തയായ വിദ്യാർത്ഥിനിയോട് “നിനക്ക് എന്താണ് ചെയ്യേണ്ടതെന്ന് നന്നായി അറിയാം, അത് തുടരുക” എന്ന് മാത്രം പറഞ്ഞുകൊണ്ട് ഇയാൾ വിമാനത്തിന്റെ വാതിൽ ബലമായി തുറന്ന് പുറത്തേക്ക് ചാടുകയായിരുന്നുവെന്ന് പ്രൊസിക്യൂട്ടർമാർ പുറത്തുവിട്ട റിപ്പോർട്ടിൽ പറയുന്നു.
മണിക്കൂറിൽ 200 കിലോമീറ്ററിലധികം വേഗതയിൽ സഞ്ചരിക്കുന്ന വിമാനത്തിന്റെ വാതിൽ ആകാശത്തുവെച്ച് തുറക്കുക എന്നത് അതീവ സങ്കീർണ്ണമാണെന്നും മാനസികമായ കടുത്ത സമ്മർദ്ദത്തിലാകാം ലിയാൻഡ്രോ ഇത്തരമൊരു പടിയെടുത്തതെന്നും ഫ്ലൈയിംഗ് സ്കൂൾ ഡയറക്ടർ എഡ്വേർഡോ അൽവാരസ് വ്യക്തമാക്കി. ഇൻസ്ട്രക്ടർ പെട്ടെന്ന് ആകാശത്ത് അപ്രത്യക്ഷനായതോടെ റൊസാരിയോ കടുത്ത ആഘാതത്തിലായെങ്കിലും, മനസ്സാന്നിധ്യം വീണ്ടെടുത്ത് വിമാനം യാതൊരു കേടുപാടുകളും കൂടാതെ റൺവേയിൽ എത്തിക്കുകയായിരുന്നു.
Story Summary
A 42-year-old flight instructor, Leandro Andrés Bertazzo, tragically died after jumping out of a moving Cessna 150 aircraft during a training session in Argentina. Despite being in complete shock, his 22-year-old student, Rosario, managed to take control and land the aircraft safely without any damage.
