ഗ്യാസ് സിലിണ്ടറുകളോ വാഹനങ്ങളോ പൊട്ടിത്തെറിക്കുന്നതിനെ കുറിച്ച് നമ്മൾ കേട്ടിട്ടുണ്ട്. എന്നാൽ ഒരു ദിവസം രാവിലെ എഴുന്നേറ്റ് പാന്റ്സ് ധരിക്കുമ്പോൾ അത് പൊട്ടിത്തെറിച്ചാലോ? കേൾക്കുമ്പോൾ തമാശയായി തോന്നിയേക്കാമെങ്കിലും, 1930-കളിൽ ന്യൂസിലൻഡിലെ പുരുഷന്മാർക്ക് ഇതൊരു പേടിസ്വപ്നമായിരുന്നു. (Exploding Pants Epidemic)
ലോകമഹായുദ്ധങ്ങൾക്കിടയിലുള്ള 1930-കളിൽ ന്യൂസിലൻഡിലെ ക്ഷീര കർഷകരെ കടുത്ത ഭീതിയിലാഴ്ത്തിയ ഒരു വിചിത്ര പ്രതിഭാസമായിരുന്നു ‘പൊട്ടിത്തെറിക്കുന്ന പാന്റുകൾ’. അക്കാലത്ത് വലിയ രീതിയിലുള്ള കാർഷിക പുരോഗതിയാണ് ന്യൂസിലൻഡിൽ ഉണ്ടായത്. ആടുവളർത്തലിൽ നിന്നും കർഷകർ വൻതോതിൽ പശുവളർത്തലിലേക്ക് മാറി. കൂടുതൽ സ്ഥലങ്ങൾ പശുക്കൾക്ക് മേയാനായി മാറ്റിവെച്ചതോടെ ‘രാഗ്വർട്ട്’ എന്ന വിഷച്ചെടികൾ പുൽമേടുകളിൽ വ്യാപകമായി പടർന്നുപിടിക്കാൻ തുടങ്ങി. പശുക്കൾക്ക് സാധാരണയായി ഈ ചെടി തിന്നാറില്ലെങ്കിലും, ഇവയുടെ അമിതമായ വളർച്ച കാരണം പശുക്കൾക്ക് മേയാൻ ആവശ്യമായ പുല്ല് ഇല്ലാതായി. പ്രതിസന്ധി രൂക്ഷമായതോടെ കർഷകർ അന്നത്തെ സർക്കാരിന്റെ സഹായം തേടുകയും സർക്കാർ ഒരു രാസനാശിനി കർഷകർക്കായി വിതരണം ചെയ്യുകയും ചെയ്തു.
‘സോഡിയം ക്ലോറേറ്റ്’ (Sodium Chlorate) എന്ന രാസനാശിനിയാണ് സർക്കാർ കർഷകർക്ക് നൽകിയത്. കർഷകർ ഇത് വ്യാപകമായി പുൽമേടുകളിൽ തളിച്ചതോടെ വിഷച്ചെടികൾ പൂർണ്ണമായി നശിച്ചു. എന്നാൽ, ഈ രാസവസ്തു ഉണങ്ങിക്കഴിയുമ്പോൾ അത്യന്തം അപകടകരമായ രീതിയിൽ കത്താൻ സാധ്യതയുള്ളതാണെന്ന കാര്യം അധികൃതർക്ക് അറിയില്ലായിരുന്നു. കളനാശിനി തളിക്കുന്നതിനിടയിൽ കർഷകർ അറിയാതെ തന്നെ ഈ ദ്രാവകം അവരുടെ വസ്ത്രങ്ങളിലും വീഴുന്നുണ്ടായിരുന്നു. സോഡിയം ക്ലോറേറ്റ് വെള്ളത്തിൽ കലക്കിയാണ് തളിച്ചിരുന്നത് എന്നതിനാൽ, വസ്ത്രങ്ങൾ പിന്നീട് ഉണങ്ങുമ്പോൾ ജലാംശം വറ്റിപ്പോവുകയും വസ്ത്രത്തിലെ നാരുകൾക്കിടയിൽ അത്യന്തം അപകടകരമായ സോഡിയം ക്ലോറേറ്റ് ക്രിസ്റ്റലുകൾ അവശേഷിക്കുകയും ചെയ്തു. ഇത് കർഷകരെ യഥാർത്ഥത്തിൽ നടന്നുപോകുന്ന ടൈം ബോംബുകളാക്കി മാറ്റുകയായിരുന്നു.
അടുപ്പിനരികിൽ ഉണക്കാനിട്ട പാന്റുകൾ ഉഗ്രശബ്ദത്തോടെ പൊട്ടിത്തെറിച്ച റിച്ചാർഡ് ബക്ക്ലി എന്ന കർഷകന്റെ അനുഭവം 1933 ഏപ്രിൽ 21-ലെ ന്യൂസിലൻഡിന്റെ ‘ഈവനിംഗ് പോസ്റ്റ്’ പത്രം വലിയ വാർത്തയാക്കിയിരുന്നു. ഇതിന് പിന്നാലെ കുതിര സവാരി ചെയ്യുന്നതിനിടയിൽ കർഷകന്റെ പാന്റ്സ് പൊട്ടിത്തെറിച്ച സംഭവവും റിപ്പോർട്ട് ചെയ്യപ്പെട്ടു. ഇരുട്ടുമുറിയിൽ വെളിച്ചത്തിനായി തീപ്പെട്ടി കത്തിച്ചപ്പോൾ വസ്ത്രത്തിന് തീപിടിച്ച സംഭവങ്ങൾ വരെയുണ്ടായി. ഈ വിചിത്ര പ്രതിഭാസം കാരണം രണ്ട് മരണങ്ങളും നിരവധി ഗുരുതരമായ പൊള്ളലുകളും അക്കാലത്ത് റിപ്പോർട്ട് ചെയ്യപ്പെട്ടു. വസ്ത്രത്തിൽ സോഡിയം ക്ലോറേറ്റ് ക്രിസ്റ്റലുകൾ അടിഞ്ഞുകൂടിയാൽ നേരിയ ഘർഷണമോ, ചെറിയൊരു ആഘാതമോ, അടുപ്പിനരികിലെ ചൂടോ അല്ലെങ്കിൽ കടുത്ത സൂര്യതാപമോ പോലും പാന്റുകൾ പൊട്ടിത്തെറിക്കാൻ കാരണമായിരുന്നു. 2004-ൽ ചരിത്രകാരനായ ജെയിംസ് വാട്സൺ പുറത്തിറക്കിയ ‘മിസ്റ്റർ റിച്ചാർഡ് ബക്ക്ലിയുടെ പൊട്ടിത്തെറിക്കുന്ന പാന്റുകളുടെ പ്രാധാന്യം’ (The Significance of Mr. Richard Buckley’s Exploding Trousers) എന്ന ഗവേഷണ പ്രബന്ധത്തിൽ ഈ സാങ്കേതിക മാറ്റത്തെക്കുറിച്ചും കർഷകർ നേരിട്ട ദുരന്തത്തെക്കുറിച്ചും വ്യക്തമായി പ്രതിപാദിക്കുന്നുണ്ട്.
Summary: During the 1930s, New Zealand dairy farmers faced a bizarre and dangerous epidemic of exploding trousers due to a government-distributed chemical herbicide. To eradicate toxic ragwort weeds from cattle pastures, farmers extensively sprayed sodium chlorate, which inadvertently soaked into their clothing. Once dry, volatile sodium chlorate crystals remained embedded in the fabric, causing the garments to explode or burst into flames from heat, friction, or minor impacts.
