തിരുവനന്തപുരം: സംസ്ഥാനത്ത് കനത്ത മഴ തുടരുന്നതിനിടെ വിവിധ ജില്ലകളിൽ വെള്ളപ്പൊക്കവും മണ്ണിടിച്ചിലും രൂക്ഷമായി. പത്തനംതിട്ടയിലെ ആറന്മുള മേഖലയിൽ സ്ഥിതിഗതികൾ അതീവ ഗുരുതരമായി തുടരുകയാണ്. റാന്നിയിൽ നിന്നുള്ള പ്രളയജലം കൂടി ഒഴുകിയെത്തിയതോടെ താഴ്ന്ന പ്രദേശങ്ങൾ പൂർണമായും ഒറ്റപ്പെട്ടു. കഴുത്തോളം വെള്ളം കയറിയിട്ടും വീടുകളുടെ മുകളിലത്തെ നിലയിൽ സുരക്ഷിതരാണെന്ന വിശ്വാസത്തിൽ പലരും മാറാൻ തയ്യാറാകാത്തത് രക്ഷാപ്രവർത്തകർക്ക് ആശങ്കയുണ്ടാക്കുന്നുണ്ട്.(Kerala Heavy Rains Severe Flooding in Aranmula Orange Alert Issued for 10 Districts)
തിരുവനന്തപുരം, കൊല്ലം എന്നിവിടങ്ങളിൽ നിന്നുള്ള മത്സ്യത്തൊഴിലാളികളും ഫയർഫോഴ്സും ചേർന്നാണ് ഇവിടെ രക്ഷാപ്രവർത്തനം നടത്തുന്നത്. വൈദ്യുതി ബന്ധം വിച്ഛേദിക്കപ്പെട്ടത് ആശയവിനിമയം തടസ്സപ്പെടുത്തിയിട്ടുണ്ട്. മലപ്പുറം പാണക്കാട് എടായിപ്പാലത്ത് നാടുകാണി സംസ്ഥാന പാതയിൽ ലൈവ് റിപ്പോർട്ടിംഗിനിടെ കുന്നിടിഞ്ഞു വീണു. ഗതാഗതം മുൻകൂട്ടി നിയന്ത്രിച്ചിരുന്നതിനാൽ വലിയ ദുരന്തം ഒഴിവായി. കോഴിക്കോട് കണ്ണാടിക്കലിൽ ഇരുനൂറിലധികം വീടുകളിൽ വെള്ളം കയറിയതിനെ തുടർന്ന് കിടപ്പുരോഗികളെയും വയോധികരെയും ബോട്ടുകളിൽ ദുരിതാശ്വാസ ക്യാമ്പുകളിലേക്ക് മാറ്റി.
എറണാകുളത്തെ മൂവാറ്റുപുഴയിലും കോട്ടയത്തെ പാലായിലും പ്രളയജലം ഉയർന്ന നിലയിലാണ്. മൂവാറ്റുപുഴയിൽ വീടുകൾ വൃത്തിയാക്കി തിരിച്ചെത്തിയവർ വെള്ളം വീണ്ടും ഉയർന്നതോടെ ക്യാമ്പുകളിലേക്ക് തന്നെ മടങ്ങി. പാലാ-കോട്ടയം റൂട്ടിൽ വലിയ വാഹനങ്ങൾക്ക് മാത്രമാണ് നിലവിൽ സഞ്ചരിക്കാനാകുന്നത്. മഴ കടുക്കുന്ന സാഹചര്യത്തിൽ 10 ജില്ലകളിൽ കേന്ദ്ര കാലാവസ്ഥാ വകുപ്പ് ഓറഞ്ച് അലർട്ട് പ്രഖ്യാപിച്ചു. പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, മലപ്പുറം, കോഴിക്കോട്, വയനാട്, കണ്ണൂർ, കാസർകോട് എന്നീ ജില്ലകളിലാണ് അതിശക്തമായ മഴ മുന്നറിയിപ്പുള്ളത്.
Story Summary
Heavy rains across Kerala have triggered severe flooding and landslides in multiple districts, with Aranmula facing a critical flood situation. Relief and rescue operations involving Fire and Rescue services and fishermen are underway to evacuate stranded residents. The IMD has issued an Orange Alert for 10 districts, predicting continued heavy rainfall.
