ഹവാന: നീണ്ട ശത്രുതയ്ക്കും ഉപരോധങ്ങൾക്കും മധ്യേ അമേരിക്കയും ക്യൂബയും തമ്മിൽ അപ്രതീക്ഷിത ചർച്ചകൾക്ക് തുടക്കമായി. അമേരിക്കൻ രഹസ്യാന്വേഷണ ഏജൻസിയായ സിഐഎയുടെ ഡയറക്ടർ ജോൺ റാറ്റ്ക്ലിഫിന്റെ നേതൃത്വത്തിലുള്ള പ്രതിനിധി സംഘം ഹവാനയിലെത്തി ക്യൂബൻ സർക്കാർ പ്രതിനിധികളുമായി കൂടിക്കാഴ്ച നടത്തി. പ്രസിഡന്റ് ഡോണൾഡ് ട്രംപ് തന്റെ ചൈനാ സന്ദർശനത്തിന് മുന്നോടിയായാണ് ഈ സുപ്രധാന നീക്കം നടത്തിയത്.(CIA Director John Ratcliffe Meets Cuban Government Amid Fuel Crisis And Sanctions)
അമേരിക്കൻ ഉപരോധം മൂലം ക്യൂബയിൽ ഇന്ധന പ്രതിസന്ധിയും സാമ്പത്തിക തകർച്ചയും രൂക്ഷമായ സാഹചര്യത്തിലാണ് സിഐഎ മേധാവിയുടെ സന്ദർശനം എന്നത് ശ്രദ്ധേയമാണ്. ക്യൂബയെ ഭീകരവാദ സ്പോൺസർമാരുടെ പട്ടികയിൽ ഉൾപ്പെടുത്തിയ നടപടി പിൻവലിക്കണമെന്നും തങ്ങൾ അമേരിക്കയുടെ സുരക്ഷയ്ക്ക് ഭീഷണിയല്ലെന്നും ക്യൂബൻ അധികൃതർ ചർച്ചയിൽ വ്യക്തമാക്കി. ക്യൂബ സഹായം അഭ്യർത്ഥിച്ചതായും അവരുമായി ചർച്ചയ്ക്ക് തയ്യാറാണെന്നും ചൈനയിലേക്ക് തിരിക്കും മുൻപ് ട്രംപ് പ്രതികരിച്ചിരുന്നു.
മെയ് ആദ്യവാരം ക്യൂബയ്ക്കെതിരായ ഉപരോധം വ്യാപിപ്പിക്കുന്ന ഉത്തരവിൽ ട്രംപ് ഒപ്പുവച്ചിരുന്നുവെങ്കിലും, ഇപ്പോഴത്തെ ചർച്ചകൾ പുതിയൊരു നയതന്ത്ര നീക്കത്തിന്റെ സൂചനയായാണ് കരുതപ്പെടുന്നത്. സോഷ്യലിസ്റ്റ് സമ്പദ്വ്യവസ്ഥ തുറന്നുകൊടുക്കണമെന്നും സ്വതന്ത്ര തിരഞ്ഞെടുപ്പ് നടത്തണമെന്നുമുള്ള യുഎസ് ആവശ്യങ്ങളിൽ ക്യൂബയുടെ നിലപാട് എന്താകുമെന്നാണ് ലോകം ഉറ്റുനോക്കുന്നത്.
Story Summary
In a significant diplomatic move, CIA Director John Ratcliffe met with the Cuban government to discuss the ongoing crisis and US sanctions. Despite President Trump recently tightening sanctions, he expressed readiness for dialogue as Cuba faces severe fuel shortages and economic pressure, marking a potential shift in US-Cuba relations.
