ഒട്ടാവ: ഹോട്ടൽ മുറിക്ക് പുറത്തായിപ്പോയ തനിക്ക് കൃത്യസമയത്ത് സഹായവുമായെത്തിയ ഇന്ത്യൻ വംശജനെ പ്രശംസിച്ച് കാനഡക്കാരനായ പതിനെട്ടുകാരൻ പങ്കുവെച്ച വീഡിയോ സോഷ്യൽ മീഡിയയിൽ വലിയ ചർച്ചയാകുന്നു (Canadian Man Praises Indian Stranger). ടൈസൺ ഹോക്ക്ലി എന്ന കനേഡിയൻ യുവാവാണ് തനിക്കുണ്ടായ അനുഭവം എക്സ് പ്ലാറ്റ്ഫോമിലൂടെ പങ്കുവെച്ചത്. ഹോട്ടലിലെ ഇലക്ട്രോണിക് കീ കാർഡ് കൃത്യമായി ഉപയോഗിക്കാൻ അറിയാതെ മുറിക്ക് പുറത്ത് കുടുങ്ങിപ്പോയ ടൈസനെ, അവിടെയുണ്ടായിരുന്ന ഒരു ഇന്ത്യൻ വംശജൻ മുന്നോട്ടുവന്ന് സഹായിക്കുകയായിരുന്നു. ഈ ചെറിയ സംഭവം മുൻനിർത്തി സോഷ്യൽ മീഡിയയിൽ ഇന്ത്യക്കാർക്കെതിരെ ഉയരുന്ന വിദ്വേഷ പ്രചാരണങ്ങൾക്കും വംശീയ അധിക്ഷേപങ്ങൾക്കും മറുപടിയായാണ് യുവാവ് വീഡിയോ ചിത്രീകരിച്ചത്. എല്ലാ ജനവിഭാഗങ്ങളിലും നല്ല മനുഷ്യരുണ്ടെന്ന് ഓർമ്മിപ്പിച്ച ടൈസൺ, കാനഡയ്ക്ക് ഇനിയും കൂടുതൽ ഇന്ത്യക്കാരെ ആവശ്യമുണ്ടെന്നും തന്റെ കുറിപ്പിൽ വ്യക്തമാക്കി.
കാനഡയിലെ കുടിയേറ്റത്തെക്കുറിച്ചും വംശീയമായ മുൻവിധികളെക്കുറിച്ചും വലിയ സംവാദങ്ങൾക്കാണ് ഈ വീഡിയോ നിലവിൽ വഴിവെച്ചിരിക്കുന്നത്. ചുരുങ്ങിയ സമയം കൊണ്ട് ദശലക്ഷക്കണക്കിന് ആളുകൾ കണ്ട വീഡിയോയ്ക്ക് താഴെ അനുകൂലിച്ചും പ്രതികൂലിച്ചും നിരവധി അഭിപ്രായങ്ങളാണ് വരുന്നത്. തങ്ങളുടെ അയൽപക്കത്തുള്ള ഇന്ത്യൻ കുടുംബങ്ങൾ വളരെ മാന്യമായാണ് പെരുമാറുന്നതെന്നും അവരെപ്പോലെയുള്ളവരെ അയൽക്കാരായി കിട്ടിയത് ഭാഗ്യമാണെന്നും ചില കനേഡിയൻ പൗരന്മാർ വീഡിയോയ്ക്ക് താഴെ കുറിച്ചു. കാനഡയിലെ ഇന്ത്യൻ സമൂഹത്തെ ഒന്നടങ്കം പ്രശംസിക്കുന്ന ഈ പോസ്റ്റ് ആഗോളതലത്തിൽ തന്നെ വലിയ രീതിയിൽ ശ്രദ്ധിക്കപ്പെട്ടിരിക്കുകയാണ്.
I just got saved by an Indian guy.
This is why we need MORE Indians in Canada. 🇨🇦 pic.twitter.com/qWGdgvemdK
— Tyson Hockley (@HockleyTyson) May 20, 2026
