അബർഡീൻ: വടക്കൻ കടലിലെ ഓയിൽ റിഗ്ഗിലേക്ക് കണ്ടെയ്നറിൽ ഒളിച്ചുകടന്ന മൂന്ന് മുയൽക്കുഞ്ഞുങ്ങളെ സ്കോട്ട്ലൻഡിലെ വന്യജീവി സംരക്ഷണ കേന്ദ്രം ഏറ്റെടുത്തു (Baby Rabbits North Sea Oil Rig). സ്കോട്ട്ലൻഡിലെ ഡണ്ടിയിൽ നിന്ന് എണ്ണക്കപ്പലിലേക്ക് കൊണ്ടുപോയ കണ്ടെയ്നറിനുള്ളിൽ അബദ്ധത്തിൽ കുടുങ്ങിയതാണ് ഈ മുയൽക്കുഞ്ഞുങ്ങളെന്ന് ഇറ്റാക്ക എനർജി സോഷ്യൽ മീഡിയയിലൂടെ അറിയിച്ചു. കടൽതീരത്ത് നിന്ന് ഏകദേശം 93 മൈൽ അകലെയുള്ള സൈഗ്നസ് പ്ലാറ്റ്ഫോമിലെ വലാരിസ് നോർവേ എന്ന ഓയിൽ റിഗ്ഗിലാണ് ഇവ ചെന്നെത്തിയത്.
ഡണ്ടിയിൽ നിന്ന് റോഡ് മാർഗം അബർഡീനിൽ എത്തിച്ച കണ്ടെയ്നർ അവിടെ നിന്നാണ് കപ്പൽ മാർഗം ഓയിൽ റിഗ്ഗിലേക്ക് അയച്ചത്. പൈപ്പ് ഡെക്കിലൂടെ രണ്ട് മുയൽക്കുഞ്ഞുങ്ങൾ ഓടിനടക്കുന്നത് കണ്ട കപ്പൽ ജീവനക്കാർ ഉടൻ തന്നെ അവയെ സുരക്ഷിതമായി പിടികൂടി. മുയലുകൾക്ക് ആവശ്യമായ വെള്ളവും പച്ചക്കറികളും റേഡിയോ റൂമിൽ ഒരുക്കി നൽകി. തുടർന്ന് ഇവയെ കരയിലേക്ക് തിരിച്ചയച്ചു. എന്നാൽ കപ്പൽ തിരികെ റിഗ്ഗിലേക്ക് പോയപ്പോൾ, ഫോർക്ക് ലിഫ്റ്റിനുള്ളിൽ ഒളിച്ചിരുന്ന മൂന്നാമതൊരു മുയൽക്കുഞ്ഞിനെ കൂടി കണ്ടെത്തുകയായിരുന്നു.
ഈ മുയൽക്കുഞ്ഞിനെയും കരയിലെത്തിച്ച് മറ്റ് രണ്ട് പേർക്കുമൊപ്പം ന്യൂ ആർക്ക് വൈൽഡ് ലൈഫ് റെസ്ക്യൂ സെന്ററിൽ എത്തിച്ചു. മൂന്ന് മുയൽക്കുഞ്ഞുങ്ങളും ഇപ്പോൾ സുരക്ഷിതരാണെന്നും നന്നായി ഭക്ഷണം കഴിക്കുന്നുണ്ടെന്നും റെസ്ക്യൂ സെന്റർ അധികൃതർ ഫേസ്ബുക്ക് പോസ്റ്റിൽ അറിയിച്ചു. കണ്ടെയ്നറിനുള്ളിൽ സുരക്ഷിതമായ സ്ഥലം തേടി കയറിയതാകാം ഇവയെന്നാണ് കരുതുന്നത്. എന്തായാലും സാഹസികമായ ഈ ‘കടൽയാത്ര’ കഴിഞ്ഞ് മുയൽക്കുട്ടികൾ ഇപ്പോൾ കരയിൽ സുഖമായി കഴിയുകയാണ്.
Summary: Three baby rabbits that accidentally stowed away in an offshore container found themselves on an oil rig in the North Sea, 93 miles off the coast. The bunnies traveled from Dundee to Aberdeen and then onto the Cygnus Platform. After being discovered by the crew, they were rescued and returned to the mainland, where they are now being cared for at the New Arc Wildlife Rescue center in Scotland.
